ශ්රීලංකන් ගුවන් සේවයේ නව ප්රධාන විධායක නිලධාරී (CEO) ලෙස ඉන්දියානු ජාතික ගුවන්යානා ඉංජිනේරු ක්ෂේත්රයේ ප්රවීණයෙකු වන විපුල් මිශ්රා (Vipul Misra) 2026 සැප්තැම්බර් 9 වන දින සිට ක්රියාත්මක වන පරිදි පත් කර ඇත. 2024 වසරේදී ඉංජිනේරු ප්රධානී සහ වගකීම්දාරී කළමනාකරු (Accountable Manager) ලෙස මෙම සමාගමට එක්වූ ඔහුගේ මෙම අභ්යන්තර උසස්වීම පිළිබඳව වාර්තා කර තිබේ.
සාමාන්යයෙන් ගුවන් නියමුවෙකු හෝ මුල්ය අංශයේ පසුබිමක් සහිත අයෙකු පත්වන මෙම තනතුර සඳහා තාක්ෂණික විශේෂඥයෙකු පත්වීම කැපී පෙනෙන වෙනසකි.කටුනායක බණ්ඩාරනායක ජාත්යන්තර ගුවන් තොටුපළ මධ්යස්ථානය කරගනිමින් ගුවන්යානා 23ක පමණ බලඇණියකින් ගමනාන්ත 35කට ආසන්න සංඛ්යාවකට පියාසර කරන ශ්රීලංකන් ගුවන් සේවය 'වන්වර්ල්ඩ්' (oneworld) සන්ධානයේ සාමාජිකයෙකු වන අතර ඉන්දියානු වෙළඳපොළ එහි ප්රධානතම ආදායම් මාර්ගයකි. පසුගිය කාලය පුරා පැවති නායකත්ව හිස්තැන හමුවේ 2025 මාර්තු සිට යසන්ත දිසානායක වැඩබලන ප්රධාන විධායක ලෙස කටයුතු කළ අතර, 2026 මාර්තු මාසයේදී සභාපති සරත් ගණේගොඩ ඉල්ලා අස්වීමෙන් පසු ඩිමාල් අරන්දර වැඩබලන සභාපති ලෙස කටයුතු කළේය. ඉන්පසු සැප්තැම්බර් 7-8 කාලයේදී සරත් ගණේගොඩගේ ප්රධානත්වයෙන් යුත් නව අධ්යක්ෂ මණ්ඩලයක් නැවත පත් කරන ලදී.
මෙම නායකත්ව වෙනස සිදුවන්නේ රුපියල් බිලියන 340කට ආසන්න සමුච්චිත පාඩුවක් සහිතව දැඩි මුල්ය අර්බුදයක පසුවන රජයේ හිමිකාරීත්වය සහිත ගුවන් සේවය ප්රතිසංස්කරණය කිරීමේ උපායමාර්ගික වැඩපිළිවෙලක් අතරතුරදීය. මේ සඳහා 2026 ජූනි මාසයේදී ඩිජිටල් ආර්ථිකය පිළිබඳ ජනාධිපති ජ්යෙෂ්ඨ උපදේශක හෑන්ස් විජයසූරියගේ ප්රධානත්වයෙන් කමිටුවක් පත් කළ අතර, ඊට දුමින්ද හුලංගමුව, දේෂාල් ද මෙල්, දුමිත් ප්රනාන්දු, අමාත්යාංශ ලේකම්වරුන් සහ ගුවන් සමාගමේ සභාපතිවරයා ඇතුළත් වූහ. ජාත්යන්තර මුදල් සංස්ථාවේ (IFC) උපදේශකත්වය ලබන මෙම කමිටුවේ නිර්දේශ මත මාස හයක් ඇතුළත ප්රතිසංස්කරණ ආරම්භ කරන බව සිවිල් ගුවන්සේවා නියෝජ්ය අමාත්ය ජනිත රුවන් කොඩිතුවක්කු ප්රකාශ කර තිබුණි.
ශ්රී ලංකාවේ තනතුර භාර ගැනීමට පෙර දිල්ලි නගරය පදනම් කරගෙන කටයුතු කළ විපුල් මිශ්රා, වසර විස්සකට වැඩි පළපුරුද්දක් සහිත බලපත්රලාභී ගුවන්යානා නඩත්තු ඉංජිනේරුවෙකි (AME). ඔහු නල්සාර් (NALSAR) නීති විශ්වවිද්යාලයෙන් අභ්යවකාශ නීතිය පිළිබඳ ස්නාතකෝත්තර උපාධියක් (2020-2022), වෙලින්ගාර් ආයතනයෙන් ව්යාපාර කළමනාකරණය පිළිබඳ පශ්චාත් උපාධි ඩිප්ලෝමාවක් (2015-2017) සහ ෂෝබිත් විශ්වවිද්යාලයෙන් විද්යාවේදී උපාධියක් ලබා ඇත. ශ්රී ලංකා සිවිල් ගුවන්සේවා අධිකාරියට අනුව ගුවන්යානාවල සුරක්ෂිතභාවය සහ පියාසර යෝග්යතාවය පිළිබඳ අවසාන වගකීම දරන 'වගකීම්දාරී කළමනාකරු' තනතුර ද ඔහු මීට පෙර හොබවා ඇත.
2004 සිට 2006 දක්වා එයර් ඩෙකෑන් සමාගමෙන් සිය වෘත්තීය ගමන ඇරඹූ ඔහු, පසුව කිංෆිෂර් (2006-2013), ඉන්ඩිගෝ (2013-2014), විස්ටාරා (2014-2018), ස්පයිස්ජෙට් (2018-2023) සහ එයර් ඉන්දියා (2023-2024) යන සමාගම්වල ජ්යෙෂ්ඨ ඉංජිනේරු සහ තාක්ෂණික කළමනාකරණ තනතුරු හොබවා තිබේ. ප්රසිද්ධ මාධ්යවල නිතර නොපෙනෙන, හතළිස් වන වියේ පසුවන වෘත්තීයවේදියෙකු වන මිශ්රාගේ මෙම කාර්මික හා කළමනාකරණ අත්දැකීම්, පවතින අර්බුදකාරී වාතාවරණය හමුවේ ශ්රීලංකන් ගුවන් සේවයේ මෙහෙයුම් කාර්යක්ෂමතාව, මූල්ය ස්ථාවරත්වය සහ සංවිධානාත්මක වෙනස්කම් ඇති කිරීමට යොදාගැනීම ප්රධාන අරමුණ වී ඇත.
