වර්තමාන ලෝක යුදමය තත්ත්වයන් හේතුවෙන් දැඩි පීඩාවකට පත්ව ඇති මෙරට ජනතාව ඉන් මුදාගැනීම අරමුණු කරගනිමින් රජයේ නවතම ආර්ථික සහන පැකේජය ඉදිරිපත් කිරීම සඳහා ජනාධිපති අනුර කුමාර දිසානායක මහතා අද දිනයේ පාර්ලිමේන්තුවට පැමිණියේය. එහිදී විශේෂයෙන්ම ඉන්ධන සහ බලශක්ති ක්ෂේත්ර කෙරෙහි රජයේ දැඩි අවධානය යොමු වී ඇති බව අවධාරණය කළ ජනාධිපතිවරයා, ඉන්ධන පිරිවැය වෙනස්වීම් ජන ජීවිතයට ඍජුවම බලපාන බව පෙන්වා දුන්නේය.
මේ වන විට වෙළෙඳපොළ වටිනාකමට අනුව ඩීසල් ලීටරයක මිල රුපියල් 600 සීමාව ඉක්මවා ගොස් ඇති පසුබිමක, ලබන මැයි මස පළමුවැනිදා හෝ ඒ ආසන්න දිනයකදී පසුගිය මාසයේ සැබෑ දත්ත මත පදනම්ව නව ඉන්ධන පිරිවැය ගැලපුමක් සිදු කිරීමට නියමිත බව හෙතෙම සඳහන් කළේය. එම ගැලපුමේදී ජනතාවට සහනයක් සැලසීම වෙනුවෙන් ඩීසල් ලීටරයක් සඳහා රුපියල් 100ක සහ පෙට්රල් ලීටරයක් සඳහා රුපියල් 20ක සහනාධාරයක් ලබා දීමට රජය තීරණය කර ඇති අතර, ඒ සඳහා මසකට රුපියල් බිලියන 20ක් එනම් රුපියල් කෝටි දෙදහසක් වැයවනු ඇතැයි ගණනය කර තිබේ. ඉලක්කගත ප්රජාවකට මාස තුනක කාලයක් සඳහා මෙම සහනය හිමිවන අතර, නිසි දත්ත නොමැතිකම හේතුවෙන් සුපර් ඩීසල් සහ සුපර් පෙට්රල් සඳහා මෙම සහනාධාරය හිමි නොවන අතර ඒවා වෙළෙඳපොළ මිලටම අලෙවි කෙරෙනු ඇත. කෙසේ වෙතත්, සාමාන්ය ඩීසල් සඳහා ලබාදෙන රුපියල් 100ක සහනාධාරය වෙනුවෙන් මාස තුනක් සඳහා රුපියල් කෝටි 6,000ක මුදලක් දැරීමට රජයට සිදුවනු ඇත.
ඉන්ධන මිල ඉහළ යාම සහ පවතින වියළි කාලගුණය හේතුවෙන් විදුලි ජනනය සඳහා තාප බලාගාර යෙදවීමට සිදුවීමෙන් අමතර පිරිවැයක් දැරීමට සිදුවුවද, එම බර පාරිභෝගිකයා මත පැටවීම වෙනුවට මාස තුනක කාලයක් සඳහා එය රජය විසින් දැරීමට ද මෙහිදී යෝජනා විය. ඒ යටතේ මාසිකව විදුලි ඒකක 90ට අඩුවෙන් පරිභෝජනය කරන ජනතාවට සහන සැලසීම උදෙසා රුපියල් බිලියන 15ක මුදලක් වෙන් කිරීමට පියවර ගෙන තිබේ.
මීට අමතරව 'අස්වැසුම' වැඩසටහන යටතේ ලියාපදිංචි වී සිටින අඩු ආදායම්ලාභී පවුල් සඳහා ඔවුන්ගේ පවුලේ සාමාජික සංඛ්යාව නොසලකා 2026 වසරේ අප්රේල් මාසය වෙනුවෙන් විශේෂ අමතර දීමනාවක් ලබා දීමටද ජනාධිපතිවරයා යෝජනා කළේය. ඒ අනුව අන්ත දිළිඳු කාණ්ඩයේ පවුලක් සඳහා රුපියල් 7,500ක්, දුප්පත් කාණ්ඩයේ පවුලක් සඳහා රුපියල් 5,000ක් සහ සංක්රාන්තික පවුලක් සඳහා රුපියල් 2,500ක් වශයෙන් මෙම මූල්ය සහනාධාරය හිමිවනු ඇත.
කෘෂිකර්මාන්තය නඟාසිටුවීම සහ ගොවි ජනතාවට සහන සැලසීමේ අරමුණින් ඉදිරි යල කන්නය සඳහා ලබාදෙන පොහොර සහනාධාරයද ඉහළ නංවා තිබේ. ඒ යටතේ හෙක්ටයාරයකට රුපියල් 25,000ක්ව පැවති පොහොර සහනාධාරය රුපියල් 30,000ක් දක්වාත්, අතිරේක භෝග සඳහා ලබාදුන් රුපියල් 15,000ක සහනාධාරය රුපියල් 18,000ක් දක්වාත් වැඩි කෙරෙනු ඇත. එසේම යල කන්නය සඳහා ගොවිජන සේවා මධ්යස්ථාන හරහා යූරියා කිලෝග්රෑම් 50ක පොහොර මිටියක් රුපියල් 10,200ක ස්ථාවර මිලකට ගොවීන්ට ලබා දීමටද කටයුතු සම්පාදනය කර තිබේ.
ධීවර ප්රජාව මුහුණ දී ඇති දුෂ්කරතා සැළකිල්ලට ගනිමින් ඔවුන් සඳහාද විශේෂ සහන වැඩපිළිවෙළක් ක්රියාත්මක කිරීමට රජය තීරණය කර ඇත. ඒ අනුව එක්දින ධීවර යාත්රා සඳහා දිනකට ඉන්ධන ලීටර 25ක් බැගින් මසකට උපරිම දින 25ක් සඳහා ලීටරයකට රුපියල් 50ක සහනාධාරයක් මාස තුනක කාලයක් මුළුල්ලේ ලබා දීමට නියමිතය. ඊට සමගාමීව ඉදිරි මාස තුන ඇතුළත බහුදින ධීවර යාත්රා හිමියන් සඳහා රුපියල් 150,000ක එක්වරක් පමණක් ගෙවනු ලබන විශේෂ දීමනාවක්ද ලබාදීමට රජය විසින් යෝජනා කර තිබේ.
