දිවයින පුරා කිසිදු පූර්ව දැනුම් දීමකින් තොරව සිදුවන බව කියන විදුලි කප්පාදුව පිළිබඳව එල්ල වන චෝදනා ප්රතික්ෂේප කරන බව බලශක්ති අමාත්ය කුමාර ජයකොඩි මහතා අද (07) පාර්ලිමේන්තුවේදී ප්රකාශ කළේය. පද්ධතියේ හටගන්නා යම් යම් තාක්ෂණික දෝෂ හේතුවෙන් ඇතැම් අවස්ථාවල විදුලිය බිඳවැටීම් සිදුවිය හැකි නමුත්, ඒවා කඩිනමින් යථා තත්ත්වයට පත් කිරීමට පියවර ගන්නා බව අමාත්යවරයා එහිදී අවධාරණය කළේය.
පාර්ලිමේන්තු මන්ත්රී මුජිබර් රහුමාන් මහතා විසින් නඟන ලද ප්රශ්නයකට පිළිතුරු ලබාදෙමින් හෙතෙම මේ බව තහවුරු කර සිටියේය. පසුගිය අප්රේල් 04 වැනිදා සිට රටේ විවිධ ප්රදේශවලට පැය භාගයක සිට පැය දෙකක් දක්වා කාලයක් පුරා රහසිගතව විදුලිය විසන්ධි කරන බවට රහුමාන් මහතා සභාව හමුවේ චෝදනා කර තිබුණි. විශේෂයෙන්ම ඊයේ දහවල් කාලයේ කොළඹ 07 විපක්ෂ නායක කාර්යාලය අවට ප්රදේශයට ද විදුලිය නොතිබූ බව ඔහු වැඩිදුරටත් පෙන්වා දුන්නේය.
නොරොච්චෝලය විදුලි බලාගාරයේ උත්පාදන ධාරිතාව අඩුවීම මෙන්ම කරදියන බලශක්ති ව්යාපෘතියේ කටයුතු නතර වීම හේතුවෙන් මතුව ඇති විදුලි අර්බුදය වසන් කිරීමේ අරමුණින් ආණ්ඩුව මෙලෙස කටයුතු කරන්නේ දැයි මන්ත්රීවරයා එහිදී ප්රශ්න කර සිටියේය.
මෙම අදහස් දැක්වීම්වලට ප්රතිචාර දක්වමින් බලශක්ති අමාත්යවරයා පැහැදිලි කළේ, රජය කිසිදු විටෙක සැලසුම්සහගත අයුරින් විදුලිය කපා හැරීමට කටයුතු නොකරන බවයි. යම් හෙයකින් විදුලි කප්පාදුවක් සිදු කිරීමට අවශ්යතාවක් මතු වුවහොත්, ඒ පිළිබඳව මහජනතාව කල්තියා දැනුවත් කිරීමට අනිවාර්යයෙන්ම පියවර ගන්නා බව ඔහු වගකීමෙන් යුතුව ප්රකාශ කළේය.
මේ හේතුවෙන් වර්තමානයේ සිදුවන මෙම තත්ත්වය විදුලි කප්පාදුවක් ලෙස නොව, හුදෙක්ම පද්ධතියේ බිඳවැටීමක් ලෙස පමණක් වටහාගත යුතු බව අමාත්ය ජයකොඩි මහතා පැවසීය. මේ වන විටත් ජාතික විදුලිබල පද්ධතිය වඩාත් ශක්තිමත් කිරීමේ ව්යාපෘති රැසක් ක්රියාත්මක වෙමින් පවතින බැවින්, ජනතාව නොමඟ යවන සුළු මෙවැනි ප්රකාශ සිදු කිරීමෙන් වළකින ලෙස ද ඔහු විපක්ෂයෙන් ඉල්ලා සිටියේය.
