කුරුණෑගල, පිලැස්ස, දොරටියාව ප්‍රදේශයේ ව්‍යාපාරිකයෙකු ගෙල සිරකර මරා දමා, ඔහුගේ මළ සිරුර තමන්ටම අයත් ජීප් රථය තුළ දමා ගිනි තැබීමේ සිද්ධිය සම්බන්ධයෙන් අත්අඩංගුවට ගත් සැකකරුවන් දෙදෙනා පැය 48ක කාලයක් රඳවාගෙන ප්‍රශ්න කිරීමට මහව මහෙස්ත්‍රාත් අධිකරණය පොලිසියට අවසර ලබා දී තිබේ. මෙම අපරාධය සිදු කිරීමෙන් අනතුරුව, ව්‍යාපාරිකයා සතුව තිබූ රුපියල් ලක්ෂ ගණනක මුදලක් සහ පවුම් දහයක රන් අත්පලඳනාවක් ඇතුළු වටිනා භාණ්ඩ රැසක් ද කොල්ලකා තිබිණි.

 කුරුණෑගල, මිල්ලව ප්‍රදේශයේ පිහිටි රන්දොල හෝටලයේ හිමිකරු වූ ව්‍යාපාරිකයා ඝාතනය කිරීමේ සිද්ධියට අදාළව, එම හෝටලයේම හිටපු කළමනාකරුවෙකු සහ ඔහුගේ මිතුරෙකු පසුගිය 30 වන දා විශේෂ පොලිස් කණ්ඩායමක් විසින් අත්අඩංගුවට ගන්නා ලදී.

 මහව, දියබැටේ ප්‍රදේශයේ කැලෑවක නවතා තිබූ ජීප් රථයක් තුළ පිළිස්සුම් තුවාල සහිතව මියගොස් සිටි කුරුණෑගල ප්‍රදේශයේ ව්‍යාපාරිකයෙකුගේ මරණය, වයරයක් වැනි දෙයකින් ගෙල සිර කිරීමෙන් සිදු වූවක් බව පශ්චාත් මරණ පරීක්ෂණයේදී තහවුරු වී තිබේ. ඝාතනයට ලක්ව ඇත්තේ කමල් කුරුප්පු නමැති 50 හැවිරිදි, එක්දරු පියෙකි. 

කුරුණෑගල මිල්ලව ප්‍රදේශයේ කෝටිපති ව්‍යාපාරිකයකු වන කමල් සම්පත් කුරුප්පු මහතාගේ පිළිස්සුණ සිරුර  කැලෑවක තිබුණ ජීප්රථයකින් අබිරහස් අන්දමින් හමුවීම ආන්දෝලනයක් ඇති කර තිබේ. කිසියම් පිරිසක් විසින් පැහැරගෙන ගොස් ඝාතනය කර ඔහුගේ සිරුර ජීප් රථයකට දමා පුලුස්සා තිබියදී මෙලෙස හමුව ඇති බවට එක් සකැයක් මතුව ඇති අතර තවත් සැකයක් වන්නේ ‍මෙය සියදිවිනසාගැනීමක්ද යන්නයි.