කුරුණෑගල, පිලැස්ස, දොරටියාව ප්රදේශයේ ව්යාපාරිකයෙකු ගෙල සිරකර මරා දමා, ඔහුගේ මළ සිරුර තමන්ටම අයත් ජීප් රථය තුළ දමා ගිනි තැබීමේ සිද්ධිය සම්බන්ධයෙන් අත්අඩංගුවට ගත් සැකකරුවන් දෙදෙනා පැය 48ක කාලයක් රඳවාගෙන ප්රශ්න කිරීමට මහව මහෙස්ත්රාත් අධිකරණය පොලිසියට අවසර ලබා දී තිබේ. මෙම අපරාධය සිදු කිරීමෙන් අනතුරුව, ව්යාපාරිකයා සතුව තිබූ රුපියල් ලක්ෂ ගණනක මුදලක් සහ පවුම් දහයක රන් අත්පලඳනාවක් ඇතුළු වටිනා භාණ්ඩ රැසක් ද කොල්ලකා තිබිණි.
මෙම සාහසික අපරාධයට අදාළව මහව මූලස්ථාන පොලිසිය විසින් අධිකරණයට ඉදිරිපත් කළ වැඩිදුර වාර්තාවක් සහ කරුණු දැක්වීමක් සලකා බැලූ මහව මහෙස්ත්රාත් නර්තනී කංචනී අභිමානි සෙනවිරත්න මෙනෙවිය, පොලිසියේ ඉල්ලීම පරිදි මෙම රැඳවුම් නියෝගය ලබා දුන්නාය. එමෙන්ම, සිද්ධිය සම්බන්ධයෙන් සිදුකරන විමර්ශනවල වත්මන් ප්රගතිය දැක්වෙන වාර්තාවක් කඩිනමින් අධිකරණයට ඉදිරිපත් කරන ලෙස ද මහෙස්ත්රාත්වරිය පොලිසියට නියම කළාය.
ඝාතනයට ලක් වූ ව්යාපාරිකයාගේ මරණය සම්බන්ධයෙන් පැවැත්වූ පශ්චාත් මරණ පරීක්ෂණයේ වාර්තාව අධිකරණය වෙත යොමු කරන ලෙස කුරුණෑගල ශික්ෂණ රෝහලේ විශේෂඥ අධිකරණ වෛද්ය නිලධාරී අජී ජයසේන මහතාට ද අධිකරණය විසින් නියෝගයක් නිකුත් කරනු ලැබිණි. පොලිසිය අධිකරණයට දන්වා සිටියේ, අත්අඩංගුවේ පසුවන සැකකරුවන් දෙදෙනා මෙම ඝාතනය සිදුකළ බවට ස්වයං පාපෝච්චාරණයක් සිදුකර ඇති බවයි.
සැකකරුවන්ගෙන් සිදුකරන ප්රශ්න කිරීම් හරහා, ව්යාපාරිකයාගෙන් කොල්ලකන ලද රුපියල් ලක්ෂ ගණනක මුදල සහ සෙසු රන් භාණ්ඩ සොයා ගැනීමට හැකිවනු ඇතැයි පොලිසිය අධිකරණය හමුවේ විශ්වාසය පළ කළේය. මෙම අපරාධයේ සියලු තොරතුරු අනාවරණය කර ගැනීම සඳහා සැකකරුවන්ගෙන් තවදුරටත් දීර්ඝ ලෙස ප්රශ්න කිරීමේ අවශ්යතාව පොලිසිය පෙන්වා දුන් අතර,
අධිකරණය එම ඉල්ලීමට අනුමැතිය ලබා දුන්නේය.
වයඹ පළාත භාර ජ්යෙෂ්ඨ නියෝජ්ය පොලිස්පති අජිත් රෝහණ සහ කුරුණෑගල දිසාව භාර නියෝජ්ය පොලිස්පති සරත් කුමාර යන මහත්වරුන්ගේ පූර්ණ අධීක්ෂණය යටතේ මෙම විමර්ශන ක්රියාත්මක වේ. මහව මූලස්ථාන ප්රධාන පොලිස් පරීක්ෂක ඒ.ඒ.ඒ.පී.ඒ. කුලතුංග මහතාගේ උපදෙස් මත, අපරාධ විමර්ශන අංශයේ ස්ථානාධිපති, උප පොලිස් පරීක්ෂක තිළිණ මධුසංක මහතාගේ මෙහෙයවීමෙන් යුත් පොලිස් කණ්ඩායම් කිහිපයක් විසින් වැඩිදුර පරීක්ෂණ සිදුකරනු ලබයි.
Comments
Post a Comment
Your comment will be visible after approval