මේ වසරේ ඔක්තෝබර් සිට දෙසැම්බර් දක්වා වූ සිව්වන කාර්තුව සඳහා විදුලි ගාස්තු වැඩි කිරීමේ කිසිදු අවශ්‍යතාවක් නොමැති බව ජාතික පද්ධති ක්‍රියාකරු සමාගම හෙවත් NSO පෞද්ගලික ආයතනය අවධාරණය කර සිටී.
මෙම දැනුම් දීම සිදු කෙරුණේ 2026 වර්ෂයේ සිව්වන කාර්තුව සඳහා යෝජිත විදුලි ගාස්තු සංශෝධනය පිළිබඳව අද (05) පැවති පාර්ශ්වකරුවන්ගේ උපදේශන සාකච්ඡාවේදීය. අදාළ කාලසීමාව තුළ ගාස්තු ඉහළ නැංවීමක් සිදු නොවිය යුතු බවට ජාතික පද්ධති ක්‍රියාකරු සමාගම එහිදී සිය ස්ථාවරය පාර්ශ්වකරුවන් හමුවේ පැහැදිලි කර තිබේ.
මෙම ස්ථාවරයට එළඹීම සඳහා එම සමාගම ප්‍රධාන වශයෙන් පාරිසරික සහ කාලගුණික සාධක පදනම් කරගෙන ඇත. මේ වන විට විදුලිය උත්පාදනය කෙරෙන ජලාශවල පවතින ජල සංචිත මට්ටම් ඊට බලපා ඇති ප්‍රධානතම හේතුවක් ලෙස ඔවුන් පෙන්වා දෙයි.
ඊට අමතරව, එල් නිනෝ කාලගුණික තත්ත්වයන් යටතේ ඉදිරියේදී සාමාන්‍ය මට්ටමට වඩා ඉහළ වර්ෂාපතනයක් ලැබෙනු ඇතැයි කෙරෙන පුරෝකථනයන් ද මෙම තීරණය සඳහා ඍජුවම දායක වී තිබේ.
එම වාසිදායක වර්ෂාපතන තත්ත්වයන් සහ ජලාශවල පවතින ජල ධාරිතාව යන කරුණු සියල්ල සැලකිල්ලට ගනිමින්, ඔක්තෝබර් සිට දෙසැම්බර් දක්වා කාලසීමාව තුළ විදුලි ගාස්තු ඉහළ දැමීමක් කිසිසේත්ම අවශ්‍ය නොවන බව අදාළ සාකච්ඡාවේදී වැඩිදුරටත් තහවුරු කර ඇත.