දේශීය ආදායම් දෙපාර්තමේන්තුවේ ප්‍රධාන කාර්යාලය සහ ප්‍රාදේශීය කාර්යාල වෙත අනවශ්‍ය ලෙස පැමිණීමෙන් වළකින ලෙස එම දෙපාර්තමේන්තුව මහජනතාවගෙන් ඉල්ලා සිටියි. බදු ගෙවන්නන් හඳුනාගැනීමේ අංක (TIN) සහතික ලබාගැනීම සඳහා වන අයදුම්පත් අන්තර්ජාලය ඔස්සේ ද ඉදිරිපත් කළ හැකි බව පෙන්වා දෙමින් දෙපාර්තමේන්තුව මෙම දැනුම්දීම සිදුකර තිබේ.
වයස අවුරුදු 18 සහ ඊට වැඩි සියලුම පුද්ගලයන් සඳහා ටින් අංකයක් ලබාගැනීම 2024 ජනවාරි 1 වැනිදා සිට නීතිමය අවශ්‍යතාවක් බවට පත් කර ඇති අතර, දෙපාර්තමේන්තුව මඟින් මහජනතාව වෙත අඛණ්ඩව එම අංක නිකුත් කරනු ලබයි. කෙසේ වෙතත්, 2026 නොවැම්බර් 1 වැනිදා සිට ක්‍රියාත්මක වන පරිදි නිශ්චිත ආර්ථික ක්‍රියාකාරකම් අටක් සඳහා ටින් අංකය අනිවාර්ය කර ඇති බව දේශීය ආදායම් දෙපාර්තමේන්තුවේ මාධ්‍ය ප්‍රකාශක නන්දන කුමාර මහතා ප්‍රකාශ කළේය.
බැංකු ගිණුම් විවෘත කිරීම, ගොඩනැගිලි සැලසුම් සඳහා අනුමැතිය ලබාගැනීම, මෝටර් රථ වාහන ලියාපදිංචි කිරීම සහ මෝටර් රථ වාහන බලපත්‍ර අලුත් කිරීම ඊට ඇතුළත් වේ. මීට අමතරව ඉඩම් සහ දේපළ ලියාපදිංචි කිරීම, ව්‍යාපාර ලියාපදිංචි කිරීම, ශ්‍රී ලංකාවේ සංස්ථාපිත සමාගම්වල කොටස් පැවරීම මෙන්ම ණයපත් ලබාගැනීම යන කාර්යයන් සඳහා ද මෙම අංකය අනිවාර්ය කර ඇත.
මේ හේතුවෙන් ටින් සහතික ලබාගැනීමට දෙපාර්තමේන්තු කාර්යාල වෙත පැමිණෙන පුද්ගලයන්ගෙන් මාධ්‍ය ප්‍රකාශකවරයා ඉල්ලා සිටින්නේ, අදාළ අංශ වෙත පිවිසිය යුත්තේ එම නිශ්චිත ක්‍රියාකාරකම් අටෙන් එකක් සඳහා සහතිකය අවශ්‍ය වන්නේ නම් පමණක් බවයි. අනවශ්‍ය ලෙස කලබල වීමට හෝ කඩිමුඩියේ කටයුතු කිරීමට කිසිදු අවශ්‍යතාවක් නොමැති බව පෙන්වා දෙන ඔහු, මෙම ක්‍රියාවලිය කාර්යක්ෂමව කළමනාකරණය කරගැනීම සඳහා මහජන සහයෝගය අපේක්ෂා කරන බව සඳහන් කළේය.
අන්තර්ජාලය ඔස්සේ ද ටින් සහතික සඳහා ඉල්ලුම් කළ හැකි බවත්, ඉදිරිපත් කරන ලද තොරතුරු තහවුරු කරගැනීමට සිදුවන බැවින් එම ක්‍රියාවලිය සඳහා යම් කාලයක් ගතවන බවත් නන්දන කුමාර මහතා වැඩිදුරටත් කියාසිටියේය. කෙසේ වෙතත්, ටින් අංකය සකස් කර අවසන් වූ පසු අයදුම්කරුවන් ප්‍රාදේශීය කාර්යාලයක් වෙත පැමිණීමට අවශ්‍ය නොවන අතර, අදාළ සහතිකය අයදුම්පතේ සඳහන් කර ඇති ලිපිනය වෙතම තැපැල් මඟින් යොමු කෙරේ. එලෙස ලැබෙන සහතිකය ටින් අංකයක් අවශ්‍ය වන ඕනෑම ගනුදෙනුවක් සඳහා පසුව භාවිත කළ හැකි බව ද ඔහු වැඩිදුරටත් පැහැදිලි කළේය.