ශ්‍රී ලංකා 'ඒ' කණ්ඩායම නියෝජනය කළ හිටපු පළමු පෙළ ක්‍රිකට් ක්‍රීඩකයෙකු මෙන්ම, ඔස්ට්‍රේලියාවේ මෙල්බර්න් නුවර ප්‍රමුඛ පෙළේ ක්‍රිකට් පුහුණුකරුවෙකු ලෙස ඉහළ කීර්තියක් දිනා සිටි සුරංජිත් සිල්වා (සුරා සිල්වා), ලිංගික අතවර කිරීමේ චෝදනාවකට වරදකරු වී තිබේ.
ඔස්ට්‍රේලියාවේ වික්ටෝරියා ප්‍රාන්තයේ සන්බරි ප්‍රදේශයේදී කාන්තාවකට ලිංගික අතවර කිරීම සම්බන්ධයෙන් ඔහු මෙලෙස වරදකරු වී ඇති බව, 2026 ඔක්තෝබර් 16 වැනිදා ‘හෙරල්ඩ් සන්’ සහ ‘ලීඩර්’ පුවත්පත් වාර්තා කළේය.
ජ්‍යේෂ්ඨ අධිකරණ වාර්තාකරු ඉම්රාන් අලි විසින් අනාවරණය කරන ලද එම පුවත්පත් වාර්තාවලට අනුව, අදාළ කාන්තාවගේ ඉණෙන් අල්ලාගෙන ඇගේ ගෙල සිපගැනීම සම්බන්ධයෙන් ඔහුට එරෙහිව මෙම ලිංගික අතවර චෝදනාව ගොනු කර තිබූ අතර, අධිකරණය හමුවේ එය ඔප්පු වී ඇත. කෙසේ වෙතත්, ඔහුට නියම වූ දඬුවම, එනම් සිරදඬුවමක් හෝ දඩයක් නියම වූයේද යන්න පිළිබඳ නිශ්චිත තොරතුරු මෙතෙක් විවෘත මූලාශ්‍ර හරහා තහවුරු වී නොමැත.ඔහුට දඬුවම් නියම කිරීමට පෙර සමාජ විශෝධන නියෝගයක් ලබාදීම සම්බන්ධයෙන් ඇගයීම් වාර්තාවක් කැඳවීමට අධිකරණය දන්වා ඇත.
මෙම වරදකරු වීමේ තීන්දුවත් සමග, මෙල්බර්න් නුවර ළමා හා තරුණ ක්‍රීඩකයින්ගේ ගෞරවයට පාත්‍ර වූ පුහුණුකරුවෙකු ලෙස ඔහු ගොඩනගාගෙන තිබූ දිගුකාලීන කීර්තිනාමය මුළුමනින්ම බිඳවැටී ඇති බව ඔස්ට්‍රේලියානු මාධ්‍ය පෙන්වා දෙයි.
සුරංජිත් සිල්වා යනු ක්‍රිකට් ක්ෂේත්‍රය තුළ පුළුල් පසුබිමක් සහිත අයෙකි. ශ්‍රී ලංකා වයස අවුරුදු 19, 20 සහ 24 න් පහළ මෙන්ම ශ්‍රී ලංකා 'ඒ' කණ්ඩායමද නියෝජනය කර ඇති ඔහු, පළමු පෙළ තරග 127 කදී කඩුලු 379 ක් සහ ලකුණු 2,488 ක් ලබාගෙන ඇත. එංගලන්තයේ සහ ඔස්ට්‍රේලියාවේ වෘත්තීය ක්‍රීඩකයෙකු සහ පුහුණුකරුවෙකු ලෙස දශකයකට වැඩි අත්දැකීම් ඇති ඔහු, එංගලන්තයේ සහ ඔස්ට්‍රේලියාවේ ඉහළ පෙළේ පුහුණුකරු සුදුසුකම්ද ලබා ඇත.
ඔහු ශ්‍රී ලංකාවේ පළමු පෙළ කණ්ඩායම්වල පුහුණුකරුවෙකු ලෙස කටයුතු කර ඇති අතර, ඩිල්රුවන් පෙරේරා, ප්‍රසන්න ජයවර්ධන, චාමර සිල්වා, සුජීව ද සිල්වා සහ චරිත බුද්ධික ප්‍රනාන්දු වැනි ක්‍රීඩකයින්ටද මගපෙන්වීම් ලබා දී ඇති බව ඔහුගේ නිල තොරතුරු වල සඳහන් වේ. මීට පෙර ඔහු ශ්‍රී ලංකාවේ සෙලාන් බැංකුවේ විධායක නිලධාරියෙකු ලෙසද සේවය කර ඇත.
පසුකාලීනව ඔස්ට්‍රේලියාවේ පදිංචි වූ ඔහු, SS Sports & Tours ආයතනයේ නිර්මාතෘවරයා සහ කළමනාකාර අධ්‍යක්ෂවරයා ලෙස කටයුතු කළේය. ඊට අමතරව 2017 වසරේ පමණ සිට මෙල්බර්න් හි ක්‍රියාත්මක වූ Silva Spin Bowling Clinic හරහා දඟපන්දු යැවීමේ පුහුණුකරුවෙකු ලෙසද, මෙල්බර්න් වෙස්ට් සහ මෙල්බර්න් සවුත් ඊස්ට් යන ක්‍රිකට් ඇකඩමිවල සම නිර්මාතෘවරයෙකු සහ ඉහළ කාර්යසාධන පුහුණුකරුවෙකු ලෙසද ඔහු කටයුතු කරමින් සිටියේය. ක්‍රීඩා සංචාර, විශේෂයෙන්ම ඔස්ට්‍රේලියානු කණ්ඩායම් ශ්‍රී ලංකාවට රැගෙන ඒමේ සංචාර සංවිධානය කිරීමද ඔහුගේ ව්‍යාපාරික කටයුතුවල ප්‍රධාන අංගයක් විය.
සිය ක්‍රිකට් ඇකඩමි සහ පුහුණු සැසි හරහා තරුණ පරපුරට ක්‍රීඩාවේ විනය සහ තාක්ෂණය කියා දුන්, සමාජයේ ඉහළ පිළිගැනීමක් සහිත වෘත්තිකයෙකුගේ සැබෑ ස්වරූපය මෙම ලිංගික අතවර නඩුවත් සමග සමාජය හමුවේ නිරාවරණය වී ඇති බව වාර්තා වේ.
