2015 ජනාධිපතිවරණ සමයේ සිදුවූ ඝාතන සිද්ධියක් සම්බන්ධයෙන් මරණීය දණ්ඩනය නියම වී, පසුව අභියාචනාධිකරණයෙන් නිදොස් කොට නිදහස් ලැබූ හිටපු රාජ්‍ය අමාත්‍ය ප්‍රේමලාල් ජයසේකර මහතා අත්අඩංගුවට ගෙන අධිකරණයට ඉදිරිපත් කරන ලෙස නියෝග කරමින් ශ්‍රේෂ්ඨාධිකරණය අද විවෘත වරෙන්තුවක් නිකුත් කළේය. අදාළ නඩුව අද දින කැඳවූ අවස්ථාවේදී ඔහු අධිකරණය මඟහැර විදේශගතව සිටින බව අනාවරණය වීමත් සමඟ මෙම නියෝගය ප්‍රකාශයට පත් විය.
අපරාධ පරීක්ෂණ දෙපාර්තමේන්තුවේ අධ්‍යක්ෂවරයා මාර්ගයෙන් මෙම විවෘත වරෙන්තුව නිකුත් කිරීමට නියෝග කළ ශ්‍රේෂ්ඨාධිකරණය, එය කඩිනමින් ක්‍රියාත්මක කිරීම සඳහා අවශ්‍ය සියලු පියවර ගන්නා ලෙස පොලිස්පතිවරයාට ද නියෝග කර තිබේ.
අද දින නඩුව කැඳවූ අවස්ථාවේදී ප්‍රේමලාල් ජයසේකර මහතා අධිකරණය හමුවේ පෙනී නොසිටි අතර, ඔහු මේ වන විට විදේශගතව සිටින බව නීතිපතිවරයා වෙනුවෙන් පෙනී සිටි නියෝජ්‍ය සොලිසිටර් ජනරාල් ජනක බණ්ඩාර මහතා විසින් අධිකරණයට දැනුම් දෙනු ලැබීය. එහෙත් අධිකරණය හමුවේ පෙනී සිටි සෙසු විත්තිකරුවන් දෙදෙනා රක්ෂිත බන්ධනාගාරගත කිරීමට විනිසුරු මඬුල්ල නියෝග කළේය.
මෙම නීතිමය ක්‍රියාවලියේ පසුබිම 2015 ජනාධිපතිවරණ සමය දක්වා දිව යයි. එවක ජනාධිපති අපේක්ෂක මෛත්‍රීපාල සිරිසේන මහතාගේ කහවත්ත ප්‍රදේශයේ පැවති ප්‍රචාරක රැළියකට වෙඩි ප්‍රහාරයක් එල්ල කරමින් පුද්ගලයෙකු ඝාතනය කිරීමේ චෝදනාව මත ප්‍රේමලාල් ජයසේකර මහතා ඇතුළු විත්තිකරුවන් තිදෙනෙකුට රත්නපුර මහාධිකරණය විසින් මරණීය දණ්ඩනය නියම කරනු ලැබීය. කෙසේ වෙතත්, එම තීන්දුවට එරෙහිව ඉදිරිපත් කළ අභියාචනයක් විභාග කිරීමෙන් අනතුරුව අභියාචනාධිකරණය විසින් ඔවුන් තිදෙනාම නිදොස් කොට නිදහස් කිරීමට නියෝග කරන ලදී.
අද දින මෙම තීරණාත්මක තත්ත්වය උද්ගත වූයේ අභියාචනාධිකරණයේ එම නිදහස් කිරීමේ තීන්දුවට එරෙහිව අගතියට පත් පාර්ශ්වය විසින් ඉදිරිපත් කළ අභියාචනා පෙත්සමකට අදාළවය. අදාළ පෙත්සම් විභාගය පසුගිය සැප්තැම්බර් 04 වැනිදා අවසන් කළ ශ්‍රේෂ්ඨාධිකරණය, අද දින අධිකරණය හමුවේ පෙනී සිටින ලෙස විත්තිකරුවන් තිදෙනාටම මින් පෙර නොතීසි නිකුත් කර තිබිණි.
අගවිනිසුරු ප්‍රීති පද්මන් සූරසේන, අචල වෙංගප්පුලි සහ ගිහාන් කුලතුංග යන මහත්වරුන්ගෙන් සමන්විත ත්‍රිපුද්ගල ශ්‍රේෂ්ඨාධිකරණ විනිසුරු මඩුල්ල විසින් මෙම නියෝග නිකුත් කරනු ලැබීය.