රිජ්වේ ආර්යා ළමා රෝහල වෙත සීටී ස්කෑනර් (CT Scan) යන්ත්‍රයක් ලබාදෙන බව පවසමින් රුපියල් මිලියන 10ක මුදලක් සාපරාධී ලෙස සාවද්‍ය පරිහරණය කළ බවට එල්ල වූ චෝදනා මත අත්අඩංගුවට ගත් හිටපු ජනාධිපති මහින්ද රාජපක්ෂ මහතාගේ බිරිඳ වන ශිරන්ති රාජපක්ෂ මහත්මිය ලබන ඔක්තෝබර් 13 වැනිදා දක්වා රක්ෂිත බන්ධනාගාරගත කිරීමට කොළඹ ප්‍රධාන මහේස්ත්‍රාත් අධිකරණය අද (07) නියෝග කළේය. ඇයගේ රෝග තත්වයන් සලකා බලන ලෙස ඉල්ලා ඇති ඇප අයදුම සලකා බලන්නට නියමිතව ඇත්තේද 13 වනදාය.අධිකරණ නියෝගයත් සමඟ ඇයව කොළඹ රිමාන්ඩ් බන්ධනාගාරයේ කාන්තා අංශයේ ආරක්ෂිත ස්ථානයක රඳවා තැබීමට බලධාරීන් පියවර ගෙන තිබේ.
බන්ධනාගාර කොමසාරිස් සහ බන්ධනාගාර මාධ්‍ය ප්‍රකාශක සේනක පල්ලේතැන්න මහතා තහවුරු කළේ, සැකකාර ශිරන්ති රාජපක්ෂ යන අය කොළඹ රිමාන්ඩ් බන්ධනාගාරයේ කාන්තා අංශයේ පිහිටි ආරක්ෂිත ස්ථානයක රඳවා තැබීමට අවශ්‍ය කටයුතු සූදානම් කර ඇති බවයි. අල්ලස් හෝ දූෂණ චෝදනා විමර්ශන කොමිෂන් සභාව මගින් අද පෙරවරුවේ ඇයව අත්අඩංගුවට ගනු ලැබූ අතර, පස්වරුවේ අධිකරණයට ඉදිරිපත් කිරීමෙන් අනතුරුව මෙලෙස රක්ෂිත බන්ධනාගාරගත කෙරිණි.
මෙම නඩුකරයට පාදක වී ඇත්තේ ‘සිරිලිය සවිය’ සංවිධානය සහ එහි ගිණුම හරහා සිදුවූ බව කියන මූල්‍ය ගනුදෙනුවක් සම්බන්ධයෙන් සිදුකෙරෙන විමර්ශනයකි. රිජ්වේ ආර්යා ළමා රෝහලට පරිගණකගත ටොමෝග්‍රැෆි ස්කෑනර් (CT) යන්ත්‍රයක් මිලදී ගෙන ලබාදෙන බව ප්‍රකාශ කරමින්, ඒ වෙනුවෙන් ජාතික ඉතිරි කිරීමේ බැංකුවෙන් රුපියල් මිලියන 10ක (රු. 10,000,000/-) මුදලක් ලබාගෙන තිබුණද, අදාළ යන්ත්‍රය රෝහල වෙත ලබා නොදී රජයේ මුදල් සාපරාධී සාවද්‍ය ලෙස පරිහරණය කර ඇතැයි ඇයට චෝදනා එල්ල වී ඇත. ඒ ඔස්සේ ‘දූෂණය’ නමැති වරද සහ පොදු දේපළ පනත යටතේ වන වැරදි සිදුකිරීම සම්බන්ධයෙන් අල්ලස් කොමිසම මගින් මෙම නීතිමය පියවර ගෙන තිබිණි.
මේ අතර, අදාළ නඩුකරයටම සම්බන්ධ කරමින් අද දිනයේ අත්අඩංගුවට ගෙන අධිකරණයට ඉදිරිපත් කළ ජාතික ඉතිරි කිරීමේ බැංකුවේ හිටපු සභාපති ප්‍රදීප් කාරියවසම් මහතා ඇප මත මුදාහැරීමට අධිකරණය නියෝග කළේය. ලක්ෂ 100 බැගින් වූ ශරීර ඇප දෙකක් මත ඇප ලබා දෙන ලදි.
ඒ අනුව, එකම සිදුවීමකට අදාළව අධිකරණය හමුවට පැමිණි සැකකරුවන් දෙදෙනාගෙන් ශිරන්ති රාජපක්ෂ මහත්මිය ලබන 13 වැනිදා දක්වා රක්ෂිත බන්ධනාගාරය වෙත යොමු කෙරුණු අතර හිටපු බැංකු සභාපතිවරයා ඇප හිමිකර ගත්තේය.
