පෞද්ගලික ඉන්ධන සැපයුම්කරුවන්ට තමන් දරන පිරිවැය පදනම් කරගනිමින් මිල තීරණය කිරීමේ හැකියාව පැවතියද, රජයට බලපෑම් එල්ල කරමින් කෘත්‍රිමව හෝ අත්තනෝමතික ලෙස මිල ඉහළ දැමීමේ අරමුණින් සැපයුම් සීමා කිරීමට කිසිසේත්ම ඉඩ නොදෙන බවට බලශක්ති අමාත්‍ය අනුර කරුණාතිලක අනතුරු අඟවයි. බලධාරීන්ට බලපෑම් කොට අධික ලෙස මිල වැඩි කරවා ගැනීම උදෙසා බෙදාහැරීම් සීමා කරන්නේ නම්, ඊට එරෙහිව නීතිමය පියවර ගන්නා බව ඔහු අවධාරණය කරයි.
ඇතැම් පෞද්ගලික ඉන්ධන පිරවුම්හල් මේ වන විටත් බෙදාහැරීම් සීමා කිරීමට කටයුතු කර ඇති බව පෙන්වා දෙන අමාත්‍යවරයා, ඒ හේතුවෙන් පාරිභෝගික ජනතාව දැඩි අපහසුතාවන්ට මුහුණ දී සිටින බව ප්‍රකාශ කළේය. එවැනි පීඩනයන් හමුවේ හිතුමතේ මිල ඉහළ දැමීමට හෝ සැපයුම අඩපණ කරමින් අධික මිල වැඩිවීම් බලහත්කාරයෙන් ලබාගැනීමට රජය කිසිදු ඉඩක් නොතබන බව හෙතෙම කියා සිටියේය.
ආයෝජකයන්ට අවශ්‍ය සහයෝගය ලබාදීම රජයේ එක් අරමුණක් වුවද, පාරිභෝගිකයා සුරැකීම සහ රට තුළ අඛණ්ඩ ඉන්ධන සැපයුමක් පවත්වාගෙන යාම රජයේ ප්‍රමුඛතම වගකීම බව අමාත්‍යවරයා සඳහන් කළේය.
බහුජාතික සමාගම්වල හෝ ඉන්ධන බෙදාහරින්නන්ගේ අසාධාරණ බලපෑම්වලට රජය කිසිසේත් යටත් නොවන බව පැහැදිලි කළ අමාත්‍ය අනුර කරුණාතිලක, මේ අයුරින් සැපයුම් සීමා කිරීම් තවදුරටත් අඛණ්ඩව සිදුවුවහොත් අවශ්‍ය නීතිමය පියවර ගැනීමට පසුබට නොවන බවට දැඩිව අවධාරණය කර සිටියේය.
