තමන් හැඳ සිටි තිසරපටය තුළ සූක්ෂම ලෙස සඟවාගෙන හෙරොයින් මත්ද්‍රව්‍ය ජාවාරම් කිරීමේ නිරත වූ බවට එල්ල වී තිබූ චෝදනාවකට වරදකාරිය වූ කාන්තාවකට කොළඹ මහාධිකරණය විසින් බරපතළ වැඩ සහිත ජීවිතාන්තය දක්වා වූ සිරදඬුවමක් නියම කර තිබේ.
මෙලෙස අදාළ දඬුවමට යටත් වූයේ වැල්ලම්පිටිය ප්‍රදේශයේ පදිංචිව සිටි, 'කුඩු බට්ටි' යන අන්වර්ථ නාමයෙන් හඳුන්වනු ලැබූ මොහොමඩ් ජාහිර් පාතිමා රිසානා නැමැති තිදරු මවකි.
මෙම නඩුව විභාග කළ කොළඹ මහාධිකරණ විනිසුරු ලංකා ජයරත්න මෙනෙවිය විසින් අදාළ නඩු තීන්දුව ප්‍රකාශයට පත් කරන ලදී.
විත්තිකාර කාන්තාවට එරෙහිව පැමිණිලි පාර්ශ්වය විසින් අධිකරණය හමුවේ ඉදිරිපත් කර තිබූ චෝදනා සාධාරණ සැකයකින් තොරව මනාව ඔප්පු වී ඇති බවට තීරණය කිරීමෙන් අනතුරුව, මහාධිකරණ විනිසුරුවරිය විසින් විත්තිකාරියට එරෙහිව මෙම ජීවිතාන්තය දක්වා වූ බරපතළ වැඩ සහිත සිරදඬුවම නියම කර ඇත.
