ශ්‍රී ලංකා පොදුජන පෙරමුණ නියෝජනය කළ කොළඹ මහනගර සභාවේ හිටපු නාගරික මන්ත්‍රී මහින්ද කහඳගම මහතා අද (06) පෙරවරුවේ අයිස් මත්ද්‍රව්‍ය සමඟ මධ්‍යම අපරාධ විමර්ශන කාර්යාංශය (CID) විසින් අත්අඩංගුවට ගනු ලැබීය. ඔහු අයිස් මත්ද්‍රව්‍ය ජාවාරමේ නිරත වන බවට ලැබුණු තොරතුරක් මත සිදු කළ විමර්ශනයකින් අනතුරුව උපාය දූතයෙකුට රැවටී අයිස් විකිණීමේ ඕඩරයක් ඩිලිවරි කිරීමට නුගේගොඩ අවන්හලක අයිස් සමග රැඳී සිටියදී මෙම අත්අඩංගුවට ගැනීම සිදු විය.
ඉන් අනතුරුව සිදු කළ වැඩිදුර විමර්ශනවලදී, කහඳගම මහතා සංවිධානාත්මක මත්ද්‍රව්‍ය ජාවාරම්කරුවන් සහ පාතාල සාමාජිකයන් සමඟ ඉතා සමීප සබඳතා පවත්වා ඇති බවට තොරතුරු රැසක් අනාවරණය වී තිබේ.
ඔහු ඩුබායි රාජ්‍යයට ගොස් මත්ද්‍රව්‍ය ජාවාරම්කරුවන් පිරිසක් සමඟ සාද පවත්වන දර්ශන පෙළක් ද විමර්ශන නිලධාරීන්ට හමු වී ඇත. එම දර්ශනවල 'මෝදර නිපුන' නමැති අපරාධකරුගේ සහෝදරයා වන චතුර දිල්රුක්ෂාන් සහ 'කෙසෙල්වත්තේ දිනූෂ' නමැති මත්ද්‍රව්‍ය ජාවාරම්කරු සිටින අතර, ඔවුන් කහඳගම මහතා සමඟ ඉතා සමීපව කටයුතු කරන ආකාරය මෙන්ම ඔහුව 'ඩැඩා' යනුවෙන් ආමන්ත්‍රණය කරන අයුරු ද එහි දැක්වෙන බව වාර්තා වේ.
එමෙන්ම 'ඉබ්බගේවත්තේ සුජී' නමැති මත්ද්‍රව්‍ය ජාවාරම්කරු සමඟ ද ඔහු සමීප සබඳතා පවත්වා ඇති අතර, ඔවුන් අතර සිදු වූ දුරකථන සංවාදවල තොරතුරු ද විමර්ශකයන් සොයාගෙන ඇත. සුජීගෙන් ලබාගත් අයිස් මත්ද්‍රව්‍ය සඳහා මුදල් ගෙවීම පැහැර හැරීම හේතුවෙන් කහඳගම මහතාට මරණ තර්ජන පවා එල්ල වී තිබූ බව ද විමර්ශනවලදී හෙළි වී තිබේ.
මේ අතර, මත්ද්‍රව්‍ය ජාවාරම්කරුවෙකු විසින් කහඳගම මහතාට සහ ඔහුගේ දියණියට මරණ තර්ජන එල්ල කරමින් සිදු කළ බව කියන ආන්දෝලනාත්මක දුරකථන සංවාදයක හඬපටයක් ද ප්‍රසිද්ධියට පත්ව තිබේ.
එම හඬපටයට අනුව, ජාවාරම්කරු මුලින්ම කහඳගම මහතාගේ දියණිය අමතා පරුෂ වචනයෙන් බැණ වදිමින් මරණ තර්ජන එල්ල කරයි. ඇයගේ පියා තමන්ගෙන් ලබාගත් අයිස් ග්‍රෑම් 500කට අදාළ මුදල මාස තුනක් ගත වී ඇතත් තවමත් ගෙවා නොමැති බවත්, මීට පෙර ද එවැනිම ගනුදෙනුවක හිඟ මුදල් පැහැර හැර ඇති බවත් ඔහු එහිදී පවසයි. මුදල් නොගෙවන්නේ නම් ඇයගේ පියාට වෙඩි තබන බවටත්, ඔවුන්ගේ වෙළෙඳසැලට පහර දී වෙඩි තබන බවටත් ඔහු දැඩි ලෙස තර්ජනය කරන ආකාරය හඬපටයේ සටහන්ව ඇත.
අනතුරුව එම සංවාදයට එක්වන කහඳගම මහතා, කලබල නොවන ලෙස අදාළ පුද්ගලයාගෙන් අයැද සිටින අයුරු ඇසේ. තමන් කිසිවෙකුට මුදල් වංචා කිරීමට උත්සාහ නොකරන බවත්, හිඟ මුදල් පියවීම සඳහා ඉඩමක් කඩිනමින් විකුණා දැමීමට කටයුතු කරමින් සිටින බවත් ඔහු එහිදී පවසයි. පසුගිය දිනක ගැනුම්කරුවන් පිරිසක් ඉඩම බැලීමට පැමිණි බව කියන ඔහු, අඩු මුදලකට හෝ ඉඩම විකුණා හැකි ඉක්මනින් මුදල් ලබා දෙන බවට ජාවාරම්කරු හමුවේ පොරොන්දු වන අයුරු ද හඬපටයේ ඇතුළත් වේ.
මහින්ද කහඳගම මහතාගෙ දියණිය ඉබ්බගේවත්තේ සුජීව නමැත්තා සමඟ සිදුවන දුරකථන සංවාදයක් මේ.
"උඹල තාත්තා මගෙන් අයිස් පන්සියයක් අරන් පොලු දැම්මා. උඹල තාත්තාටම වෙඩිත් තියෙනවා. උඹේ කඩේටත් වෙඩි තියෙනවා. හරිද, දැන් මාස තුනක් වෙනවා සල්ලි දුන්නෙ නෑ. ඊට කලින් දෙසියයක් ගත්තා. පොල්ල දැම්මා. උඹගේ කට වෑඩියි උඹේ කඩේටත් ගහනවා."
මීට අමතරව තවත් අයිස් විකිණීමට අදාළ ඔහුගේ හඩ පට එළියට පැමිණ තිබෙන අතර ඔහු කාලයක් තිස්සේ මේ මගින් විශාල වශයෙන් මුදල් එක්රැස් කරගෙන තිබෙන බව පෙන්නුම් කරයි.
මේ අතර, කහඳගම මහතාගෙන් ලද තොරතුරු මත පදනම්ව සිදු කළ වැටලීමකදී, මෙම මත්ද්‍රව්‍ය ජාලයට සම්බන්ධ තවත් සැකකරුවෙකු අයිස් මත්ද්‍රව්‍ය මිලිග්‍රෑම් 1100ක් සමඟ නුගේගොඩ ප්‍රදේශයේදී අත්අඩංගුවට ගෙන ඇත.
සැකකරුවන් දෙදෙනා වැඩිදුර විමර්ශන සඳහා නාරාහේන්පිට පිහිටි මධ්‍යම අපරාධ විමර්ශන කාර්යාංශය වෙත රැගෙන ගොස් ඇති අතර, ඔවුන් අද (06) මාලිගාකන්ද මහේස්ත්‍රාත් අධිකරණයට ඉදිරිපත් කර රැඳවුම් නියෝග ලබා ගැනීමට නියමිතය.
