පොළොන්නරුව ජාතික වකුගඩු රෝහලේ මුළුතැන්ගෙයි ගෑස් කාන්දුවක් හේතුවෙන් පසුගිය 26 වැනිදා අලුයම 4.30 ට පමණ සිදුවූ දරුණු පිපිරීමකින් තුවාල ලැබූ පුද්ගලයින් හත් දෙනෙකුගෙන් එක් අයෙකු ජීවිතක්ෂයට පත්ව ඇතැයි පොලීසිය තහවුරු කරයි. මෙම අනතුර සිදුවීමෙන් අනතුරුව තුවාලකරුවන් සියලු දෙනාම පොළොන්නරුව මහ රෝහල වෙත ඇතුළත් කිරීමට පියවර ගෙන තිබුණි.
මෙලෙස අවාසනාවන්ත ලෙස මියගොස් ඇත්තේ ගල්ඔය, නව ධර්මපාල මාවත ප්රදේශයේ පදිංචිව සිටි යූ.ආර්. අසේල චානක විජේතුංග නම් සෞඛ්ය කාර්ය සහායකවරයෙකි. අනතුරින් තුවාල ලැබූ සෙසු පුද්ගලයින් හය දෙනා අතරින් එක් රෝගියෙකු වැඩිදුර ප්රතිකාර සඳහා අනුරාධපුර ශික්ෂණ රෝහල වෙත මාරුකර යවා ඇති අතර, අනෙකුත් පිරිස තවදුරටත් පොළොන්නරුව මහ රෝහලේ ප්රතිකාර ලබති. මෙම අනතුරට මුහුණ දුන් පිරිස අතරට සෞඛ්ය කාර්ය සහායකයින් දෙදෙනෙකු, එක් ආරක්ෂක නිලධාරියෙකු, නේවාසිකව ප්රතිකාර ලබමින් සිටි රෝගියෙකු සහ ඔහුගේ උපස්ථායකයෙකු, පිරිසිදු කිරීමේ සේවකයෙකු මෙන්ම රෝහල් සූපවේදියෙකු ද අයත් වේ.
හදිසි පිපිරීමත් සමඟම රෝහල් කාර්ය මණ්ඩලය දැඩි පරිශ්රමයක් යොදා වාට්ටු කිහිපයක ප්රතිකාර ලබමින් සිටි රෝගීන් එකසිය පනහකට අධික පිරිසක් වහාම රෝහල් ගොඩනැගිල්ලෙන් පිටතට ගෙන ගොස් ඔවුන්ගේ ආරක්ෂාව තහවුරු කිරීමට කටයුතු කර ඇත. මෙම මහා පරිමාණ හානියට මුලික හේතුව මුළුතැන්ගෙයි සිදුවූ ගෑස් කාන්දුවක් බවට මූලික පොලිස් විමර්ශනවලදී අනාවරණය වී තිබේ.
සිද්ධිය වූ ස්ථානය නිරීක්ෂණය කිරීම සඳහා නිවාස, ඉදිකිරීම් සංවර්ධන හා ජල සම්පාදන නියෝජ්ය අමාත්ය ටී.බී. සරත් මහතා පැමිණි අතර, රෝහලට සිදුව ඇති දැවැන්ත දේපළ හානිය කඩිනමින් පිළිසකර කර යථා තත්ත්වයට පත් කරන බව ඔහු මාධ්ය හමුවේ ප්රකාශ කළේය. මීට අමතරව, සෞඛ්ය හා ජනමාධ්ය අමාත්ය නලින්ද ජයතිස්ස මහතා ද රෝහල වෙත පැමිණි අතර, මියගිය සේවකයා වෙනුවෙන් රජයේ බලවත් ශෝකය පළ කළේය. මියගිය අයගේ පවුලේ සාමාජිකයින්ට වන්දි මුදලක් ලබාදීමටත්, තුවාලකරුවන්ගේ පවුල්වල ඉදිරි සුබසාධන කටයුතු සම්බන්ධයෙන් ජනාධිපතිවරයා සමග සාකච්ඡා කර පියවර ගන්නා බවත් ඔහු පැවසීය. මෙම ඛේදවාචකය සම්බන්ධයෙන් වහාම විධිමත් පරීක්ෂණයක් පවත්වා වාර්තාවක් ලබාදෙන ලෙසත්, රෝහලේ යථා තත්ත්වය කඩිනමින් ස්ථාපිත කරන ලෙසත් සෞඛ්ය අමාත්යවරයා අදාළ බලධාරීන්ට වැඩිදුරටත් උපදෙස් ලබා දී ඇත.
