2008 සහ 2009 වසරවලදී කොළඹ සහ තදාසන්න ප්රදේශවලින් තරුණයන් 11 දෙනෙකු කප්පම් ලබාගැනීමේ අරමුණින් පැහැරගෙන ගොස් අතුරුදන් කිරීමේ සිද්ධියට අදාළව අපරාධ පරීක්ෂණ දෙපාර්තමේන්තුව (CID) විසින් සිදුකළ විමර්ශනවලදී ත්රිකුණාමලයේ නාවික හමුදාවට අයත් ‘ගන්සයිට්’ කඳවුර සම්බන්ධයෙන් අතිශය තීරණාත්මක තොරතුරු රැසක් එළිදරව් වී තිබේ. අදාළ තරුණයන් මෙම කඳවුරේ රඳවාගෙන සිට ඇති බව අධිකරණය හමුවේ තහවුරු වී ඇති අතර, එහි බිත්තියක සටහන්ව තිබූ ලිපිනයක් පරීක්ෂා කිරීමේදී එය පැහැරගැනීමට ලක්වූ ශාන්ත සමරවීර නැමැත්තාගේ අත්අකුරු බවට තහවුරු කරගෙන ඇත.
මෙම විමර්ශනවලදී අනාවරණය වී ඇති වඩාත් තිගැස්මදායක කරුණ වන්නේ එකී ‘ගන්සයිට්’ කඳවුර තුළ කාන්තාවන් 6 දෙනෙකු ද නීති විරෝධී ලෙස රඳවාගෙන සිට ඇති අතර, ඔවුන්ගෙන් පස්දෙනෙකුම ඝාතනය කර ඇති බවයි. එලෙස රඳවාගෙන සිටි එක් කාන්තාවක් ගැබ්ගෙන සිට ඇති අතර, ඇය මුදාහැරියහොත් නාවික හමුදාවට චෝදනා එල්ල වේ යැයි බියෙන් මෙම ඝාතනය සිදුකර ඇති බව අපරාධ පරීක්ෂණ දෙපාර්තමේන්තුව අනාවරණය කරගෙන තිබේ. මීට පෙර සාක්ෂි නොමැති වීම හේතුවෙන් ත්රිකුණාමලය මහේස්ත්රාත් අධිකරණයේ (B2020/2011, B2863/2008, B2513/2008) අත්හිටුවා තිබූ නඩු කටයුතු, මෙම ඝාතන පිළිබඳ තොරතුරු අනාවරණය වීමත් සමඟ නැවත සක්රිය වී ඇති අතර, ඉදිරි පරීක්ෂණ අපරාධ පරීක්ෂණ දෙපාර්තමේන්තුවේ සමූහ මංකොල්ල විමර්ශන අංශය වෙත පවරන ලෙස මහේස්ත්රාත්වරයා විසින් පොලිස්පතිවරයාට නියෝග කර ඇත.
නාවික හමුදාව තුළ ක්රියාත්මක වූ කප්පම් කල්ලියක් විසින් සිදුකරන ලද මෙම අමානුෂික අපරාධය සම්බන්ධයෙන් කස්තුරි ආරච්චිගේ ජෝ රීට්, රජීව් නාගනාදන්, ප්රදීප් විශ්වනාදන් ඇතුළු තරුණයන් 11 දෙනෙකු මරා දැමීමට කුමන්ත්රණය කිරීම, පැහැරගැනීම, අයුතු ලෙස සිරකර තැබීම සහ සාක්ෂි වසන් කිරීම ඇතුළු චෝදනා 667ක් යටතේ නීතිපතිවරයා විසින් විත්තිකරුවන්ට එරෙහිව නඩු පවරා තිබේ. මෙම සම්පූර්ණ සිදුවීම් මාලාවට අදාළව වසන්ත කරන්නාගොඩ, රවීන්ද්ර විජේගුණරත්න සහ නිශාන්ත උළුගෙතැන්න යන හිටපු නාවික හමුදාපතිවරුන් තිදෙනාට එරෙහිව චෝදනා එල්ල වී ඇත.
එවකට නාවික හමුදාපතිවරයා ලෙස කටයුතු කළ වසන්ත කරන්නාගොඩ මහතා මෙම පැහැරගැනීම් පිළිබඳව දැනුවත්ව සිටි බවත්, ඔහුගේ පෞද්ගලික ආරක්ෂක නිලධාරියා දෙහිවලදී තරුණයන් 5 දෙනෙකු පැහැරගැනීමට සෘජුවම සම්බන්ධ වී ඇති බවත් CIDය අධිකරණයට පවසා තිබුණි. ඔහුට එරෙහිව මුලින් අධිචෝදනා ගොනු කළද පසුව නීතිපතිවරයා විසින් නඩුවෙන් ඉවත් කරගත් අතර ඊට එරෙහිව වින්දිතයන්ගේ ඥාතීන් ශ්රේෂ්ඨාධිකරණය හමුවට ගොස් ඇත. එමෙන්ම, සිද්ධියේ ප්රධාන සැකකරු වන ‘නේවි සම්පත්’ නැමැත්තාට සැඟවී සිටීමට ආධාර කිරීම සහ සාක්ෂිකරුවන්ට බලපෑම් කිරීමේ චෝදනා හිටපු නාවික හමුදාපති රවීන්ද්ර විජේගුණරත්න මහතාට එරෙහිව එල්ල විය.
පොල්ගහවෙල මහෙස්ත්රාත් අධිකරණයේ විභාග වන ශාන්ත සමරවීර පැහැරගෙන ගොස් ඝාතනය කිරීමේ සිදුවීමට අදාළව නාවික හමුදා නිලධාරී සුමිත් රණසිංහ සමඟ හිටපු නාවික හමුදාපතිවරයකු වන නිශාන්ත උළුගෙතැන්න ද අත්අඩංගුවට ගැනුණි. හිටපු නාවික හමුදාපති ට්රැවිස් සින්නයියා ලබාදුන් ප්රකාශයකට අනුව, ත්රිකුණාමලය ‘ගන්සයිට්’ කලාපයට ඔහුට පවා ඇතුළුවීමට අවසර නොතිබූ අතර, එහි සම්පූර්ණ පාලනය පවත්වාගෙන ගොස් ඇත්තේ වසන්ත කරන්නාගොඩ මහතාගේ පෞද්ගලික සහකාර ලෙස කටයුතු කළ ඩී.කේ.පී. දසනායක විසිනි. මීට පෙර ගෝඨාභය රාජපක්ෂ මහතාගේ පාලන සමයේදී ස්ථාපිත කළ දේශපාලන පළිගැනීම් පිළිබඳ කොමිසම මඟින් මෙම නඩු විභාගය නැවැත්වීමට නිර්දේශ කළද, එල්ල වූ දැඩි මහජන විරෝධය හමුවේ එම නිර්දේශ හකුළා ගැනීමට සිදුවිය. මෙම අපරාධ මාලාව සම්බන්ධයෙන් වන ඉදිරි විමර්ශන තවදුරටත් ක්රියාත්මක වන අතර, ඊට සම්බන්ධ තවත් නාවික හමුදා නිලධාරීන් පිරිසක් ඉදිරියේදී අත්අඩංගුවට පත්වීමට නියමිත බව වාර්තා වේ.