දිවයිනේ ප්‍රධාන තිරිඟු පිටි නිෂ්පාදකයන් වන ප්‍රීමා සහ සෙරන්ඩිබ් සමාගම් විසින් තිරිඟු පිටි මිල ඉහළ නැංවීමට පියවර ගැනීමත් සමඟම ආපනශාලා හිමියන් ද පිටි ආශ්‍රිත කෑම වර්ගවල මිල ගණන් ඉහළ දැමීමට තීරණය කර තිබේ.
මෙම මිල සංශෝධනය යටතේ ප්‍රීමා සමාගම විවිධ පිටි වර්ග කිලෝග්‍රෑමයක මිල රුපියල් 15 සිට 20 දක්වා වූ ගණනකින් ඉහළ නංවා ඇති අතර සෙරන්ඩිබ් සමාගම සියලුම තිරිඟු පිටි කිලෝග්‍රෑමයක මිල රුපියල් 20කින් ඉහළ දමා ඇත. පිටි මිල ඉහළ යෑමට සාපේක්ෂව ක්‍රියාත්මක වූ සමස්ත ලංකා ආපනශාලා හිමියන්ගේ සංගමය, පරාටා, රොටි සහ කෙටි ආහාරවල මිල රුපියල් 5කින් ද, ආප්පයක මිල රුපියල් 2කින් ද, ඉඳිආප්පයක මිල රුපියලකින් ද ඉහළ දැමීමට පියවර ගෙන තිබේ.
තිරිඟු පිටි කිලෝග්‍රෑමයක මිල සාමාන්‍යයෙන් රුපියල් 17කින් පමණ ඉහළ යෑමට හේතුව ගෝලීය වශයෙන් පවතින යුදමය වාතාවරණය හමුවේ භාණ්ඩ ප්‍රවාහන හා රක්ෂණ ගාස්තු ඉහළ යෑම බව වෙළඳ, වාණිජ හා ආහාර සුරක්ෂිතතා නියෝජ්‍ය අමාත්‍ය ආර්. එම්. ජයවර්ධන මහතා සඳහන් කළේය. මොනරාගල ප්‍රදේශයේ නළලිං අලුත්වැඩියා කිරීමේ වැඩසටහනකට එක්වීමෙන් අනතුරුව මාධ්‍ය හමුවේ අදහස් දැක්වූ නියෝජ්‍ය අමාත්‍යවරයා කියා සිටියේ, පාරිභෝගිකයන්ට සිදුවන පීඩනය අවම කිරීම සඳහා ජනාධිපතිවරයා සහ අදාළ අමාත්‍යාංශ මට්ටමින් රජය සැලකිය යුතු මැදිහත්වීමක් සිදු කරන බවයි.
මේ අතර, තිරිඟු පිටි මිල ඉහළ යෑම හමුවේ පාන් ඇතුළු බේකරි නිෂ්පාදනවල මිල ගණන් සංශෝධනය කිරීම සම්බන්ධයෙන් තීරණය කිරීම සඳහා සමස්ත ලංකා බේකරි හිමිකරුවන්ගේ සංගමයේ මධ්‍යම කාරක සභාව එළඹෙන සඳුදා රැස්වීමට නියමිතය. එදින පැවැත්වෙන සාකච්ඡාවෙන් අනතුරුව බේකරි නිෂ්පාදනවල ඉදිරි මිල ගණන් පිළිබඳ අවසන් තීරණය ගන්නා බව එම සංගමයේ සභාපති එන්.කේ. ජයවර්ධන මහතා ප්‍රකාශ කළේය.