වසර 35 ක කාලයක් නෝර්වේ රාජ්යය පාලනය කළ යුරෝපයේ වයෝවෘද්ධතම රාජකීයයා වන පස්වැනි හැරල්ඩ් රජු වයස අවුරුදු 89 ක්ව සිටියදී අභාවප්රාප්ත වීමත් සමඟ ඔහුගේ පුත් අටවැනි හෝකොන් රජු ලෙස සිංහාසනාරූඪ වී තිබේ. 1991 වසරේ සිට රාජ්යත්වයේ පසුවූ හැරල්ඩ් රජු, රක්තාණු සෛල විනාශ වීමේ රෝගී තත්ත්වයක් සහ ඉන් පසුව ඇතිවූ ආසාදනයක් සඳහා ප්රතිකාර ලබමින් සිටියදී ඕස්ලෝ විශ්වවිද්යාල රෝහලේදී පසුගිය සිකුරාදා (අගෝස්තු 28) උදෑසන 06:35 ට පමණ අවසන් හුස්ම හෙලීය.
රජුගේ වියෝව සැලවීමත් සමඟ රාජකීය මාළිගය ඉදිරිපිට දසදහස් සංඛ්යාත ජනතාවක් එක්රොක් වී මල් සහ ජාතික කොඩි තබමින් තම ගෞරවාදරය පුද කළහ.
නෝර්වේ රාජ්යයේ ආණ්ඩුක්රම ව්යවස්ථාවට අනුව රජුගේ අභාවයෙන් පසු ඔහුගේ පුත්රයා ස්වයංක්රීයවම අටවැනි හෝකොන් රජු ලෙස බලයට පත්වූ අතර, ඔහු "සියල්ල නෝර්වේ උදෙසා" යන්න තමාගේ තේමා පාඨය ලෙස තෝරාගෙන ඇත. සෙනසුරාදා දින රූපවාහිනිය ඔස්සේ ජාතිය අමතමින් අතිශය සංවේදී අදහස් දැක්වීමක නිරත වූ නව රජු, තම පියා ඉතා යහපත් පියෙකු වූ බවත් එදින තම දෙමාපියන්ගේ 58 වැනි විවාහ සංවත්සරය යෙදී තිබූ බවත් සිහිපත් කළේය. ජනතාව වෙනුවෙන් සැමවිටම කැපවී අවධානයෙන් කටයුතු කරන බවට ප්රතිඥා දුන් හෝකොන් රජු, ලබන අඟහරුවාදා පාර්ලිමේන්තුව හමුවේ ආණ්ඩුක්රම ව්යවස්ථාපිත දිවුරුමද දීමට නියමිත අතර, නව රජ පරම්පරාවේ මීළඟ කිරුළ හිමි තැනැත්තිය ලෙස ඉන්ග්රිඩ් ඇලෙක්සැන්ඩ්රා රාජකුමරිය පත්ව සිටින්නීය.
