පෙරහැර සහ අනෙකුත් ආගමික උත්සව සඳහා හීලෑ අලි ඇතුන් ලබාදීමේ ක්රියාවලිය නීතිමය වශයෙන් විධිමත් කිරීම සඳහා වන නව ගැසට් නිවේදනය නුදුරේදීම ප්රකාශයට පත් කිරීමට නියමිත බව පරිසර නියෝජ්ය අමාත්ය ඇන්ටන් ජයකොඩි මහතා පාර්ලිමේන්තුවේදී තහවුරු කළේය. මෙම පියවර හරහා සංස්කෘතිකමය හා ආගමික වැදගත්කමකින් යුත් පෙරහැර මංගල්යයන් වෙනුවෙන් අලි ඇතුන් සපයාදීමේ සේවාව කිසිදු බාධාවකින් තොරව අඛණ්ඩව පවත්වාගෙන යාම තහවුරු කිරීම රජයේ මූලික අරමුණ වී තිබේ.
විපක්ෂ පාර්ලිමේන්තු මන්ත්රී චමින්ද්රාණී කිරිඇල්ල මහත්මිය විසින් යොමු කරන ලද ප්රශ්නයකට පිළිතුරු දෙමින් නියෝජ්ය අමාත්යවරයා මෙම කරුණු අනාවරණය කළේය. එහිදී මන්ත්රීවරිය පෙන්වා දුන්නේ වර්තමානයේ පෙරහැර සංස්කෘතිය වෙනුවෙන් බහුලව යොදාගනු ලබන අලි ඇතුන්ගෙන් වැඩි පිරිසක් වයස අවුරුදු 65 ත් 70 ත් අතර මහලු වියේ පසුවන සතුන් බවයි.
පෙරහැර හෝ ආගමික කටයුතු සඳහා අලි ඇතුන් සැපයීම සම්පූර්ණයෙන්ම අත්හිටුවීමට රජය කිසිදු තීරණයක් ගෙන නොමැති බව මෙහිදී පැහැදිලි කළ නියෝජ්ය අමාත්යවරයා, මීට පෙර පැවැති ගැසට් පත්රයේ ඇතැම් වගන්ති අධිකරණ තීන්දු කිහිපයක් හේතුවෙන් ඉවත් කිරීමට සිදු වූ බව සඳහන් කළේය. ඒ අනුව බුද්ධශාසන අමාත්යාංශය ඇතුළු විෂය භාර නිලධාරීන් සහ අදාළ පාර්ශ්ව සමඟ දීර්ඝ ලෙස සාකච්ඡා කර නව ගැසට් පත්රය සකස් කළ බවත්, එහි අවසන් අදියරේ කටයුතු මේ වන විට ක්රියාත්මක වන බවත් ඔහු වැඩිදුරටත් පැවසීය.