උච්ච අධිකරණ විනිසුරුවරුන්ගේ විශ්‍රාම යෑමේ වයස් සීමාව ඉහළ නැංවීමට අදාළව යෝජිත 22 වන ආණ්ඩුක්‍රම ව්‍යවස්ථා සංශෝධනය සම්බන්ධයෙන් මහා නායක හිමිවරුන් විසින් ජනාධිපති අනුර කුමාර දිසානායක මහතා වෙත ලිපියක් යොමු කර ඇති බව මල්වතු පාර්ශ්වයේ මහානායක අතිපූජ්‍ය තිබ්බටුවාවේ ශ්‍රී සුමංගල මහා නාහිමියෝ තහවුරු කළහ. ආණ්ඩුව විසින් මෙතෙක් කල් එවැනි ලිපියක් ජනාධිපතිවරයා වෙත ලැබී නොමැති බව ප්‍රකාශ කර තිබූ පසුබිමක උන්වහන්සේ මෙම අනාවරණය සිදු කළහ.
කෙසේ වෙතත්, අදාළ ලිපිය යැවූ නමුත් එය ජනාධිපතිවරයා අතට ලැබී ඇත්දැයි යන්න පිළිබඳව ස්ථිරවම ප්‍රකාශ කළ නොහැකි බව මාධ්‍ය හමුවේ ඒකාබද්ධ විපක්ෂ නියෝජිත පිරිසක් හමුවේ අදහස් දක්වමින් උන්වහන්සේ සඳහන් කළහ.ආණ්ඩුව මගින් ගෙන ඒමට සූදානම් වන මෙම ආණ්ඩුක්‍රම ව්‍යවස්ථා සංශෝධන කෙටුම්පතට එරෙහිව විපක්ෂයේ දේශපාලන පක්ෂ ගෙන යන විරෝධතා ව්‍යාපාරයේ පියවරක් ලෙස ඒකාබද්ධ විපක්ෂයේ නියෝජිතයන් පිරිසක් මල්වතු සහ අස්ගිරි උභය මහා විහාරීය මහානායක හිමිවරුන් හමුවී යෝජිත සංශෝධනය පිළිබඳව උන්වහන්සේලා දැනුවත් කළහ. මෙම යෝජිත ව්‍යවස්ථා සංශෝධනය සම්බන්ධයෙන් ජනතාවගේ මතය විමසීම සඳහා ජනමත විචාරණයක් පැවැත්විය යුතු බව විපක්ෂ නියෝජිත පිරිස මෙහිදී අවධාරණය කළහ.
මෙම නියෝජිත පිරිසට හිටපු අමාත්‍යවරුන් වන මහාචාර්ය ජී. එල්. පීරිස්, පාටලී චම්පික රණවක, රාජිත සේනාරත්න, ලසන්ත අලගියවන්න සහ සමගි ජන බලවේගයේ පාර්ලිමේන්තු මන්ත්‍රී දයාසිරි ජයසේකර යන මහත්වරුන් ඇතුළත් වූහ. සාකච්ඡාව අතරතුරදී මන්ත්‍රී දයාසිරි ජයසේකර මහතා පෙන්වා දුන්නේ අදාළ ලිපිය මාධ්‍ය වෙත ද ලැබී නොමැති බවයි. ඊට පිළිතුරු දෙමින් මහානායක හිමියන් ප්‍රකාශ කළේ තමන් වහන්සේලා ලිපිය යැවූ නමුත් ජනාධිපතිවරයාට එය ලැබී තිබේද යන්න තහවුරු නොමැති බවයි. මීට අමතරව, මෙම පිරිස අස්ගිරි පාර්ශ්වයේ මහානායක අතිපූජ්‍ය වරකගොඩ ශ්‍රී ඥානරතන මහා නාහිමියන්ද හමුවී සාකච්ඡා පැවැත්වූහ.
සාකච්ඡාවෙන් අනතුරුව මාධ්‍ය වෙත අදහස් දැක්වූ හිටපු අමාත්‍ය මහාචාර්ය ජී. එල්. පීරිස් මහතා චෝදනා කළේ දේශපාලන පක්ෂ, නීති ක්ෂේත්‍රයේ ප්‍රජාව හෝ ආගමික නායකයන් ඇතුළු කිසිදු පාර්ශ්වයක් සමඟ සාකච්ඡා කිරීමෙන් තොරව ආණ්ඩුව ඉතා හදිසියෙන් මෙම සංශෝධනය ඉදිරිපත් කිරීමට කටයුතු කරන බවයි. මෙමගින් අධිකරණය විධායකයේ පාලනයට නතු කර ගැනීමට ආණ්ඩුව උත්සාහ දරන බවත්, මෙය ආරම්භ වුවහොත් නතර වන තැනක් කිව නොහැකි බවත් පැවසූ ඒ මහතා, මෙය ආඥාදායකත්වයකට මග පාදන ක්‍රියාවලියක් බවටද අනතුරු ඇඟවීය.
එමෙන්ම, මල්වතු මහානායක හිමියන් සිවිල් සංවිධාන නියෝජිතයන් පිරිසක්ද හමුවී ඇති අතර, මෙම මතභේදාත්මක විෂය සම්බන්ධයෙන් උන්වහන්සේලාගේ අදහස් ඇතුළත් ලිපිය ජනාධිපතිවරයා වෙත යොමු කර ඇති බව එහිදීද ප්‍රකාශ කර තිබේ.