මීගමුව බන්ධනාගාරයේ හටගත් දරුණු නොසන්සුන්කාරී තත්ත්වයෙන් බරපතළ තුවාල ලබා කොළඹ ජාතික රෝහලේ ප්රතිකාර ලබමින් සිටි බන්ධනාගාර නිලධාරීන් දෙදෙනෙකු ඊයේ (13) සහ අද (14) අලුයම ජීවිතක්ෂයට පත්ව ඇති බව පොලිස් මූලස්ථානය පවසයි. වයස අවුරුදු 25 සහ 39 යන වයස් සීමාවන්හි පසුවන මෙම නිලධාරීන් දෙදෙනාගේ අභාවයත් සමඟ, අදාළ ගැටුමෙන් මියගිය සමස්ත බන්ධනාගාර නිලධාරීන් සංඛ්යාව 10 දක්වා ඉහළ ගොස් තිබේ.
පසුගිය ජූලි 5 සහ 6 යන දිනවල බන්ධනාගාරය තුළ සිදු වූ මෙම ගැටුම්කාරී සිදුවීම් හේතුවෙන් රැඳවියන් 21 දෙනෙකු ද මියගොස් ඇති අතර, ඒ අනුව මේ වන විට වාර්තා වන සමස්ත ජීවිත හානි සංඛ්යාව 31 දක්වා වර්ධනය වී ඇත. මෙම සිද්ධියෙන් තුවාල ලැබූ තවත් බන්ධනාගාර නිලධාරීන් සහ රැඳවියන් පිරිසක් කොළඹ ජාතික රෝහලේ සහ මීගමුව මහ රෝහලේ තවදුරටත් නේවාසිකව වෛද්ය ප්රතිකාර ලබති.මේ අතර, මීගමුව බන්ධනාගාරයේ ඇති වූ මෙම අවාසනාවන්ත සිදුවීමෙන් ජීවිතක්ෂයට පත් වූ නිලධාරීන් සහ රැඳවියන් සිහිපත් කරමින් ඔවුන්ට පින් අනුමෝදන් කිරීම උදෙසා විශේෂ මතක බණ ධර්ම දේශනයක් ඊයේ (13දා) පෙරවරුවේ අධිකරණ සහ ජාතික ඒකාබද්ධතා අමාත්යාංශයේදී පවත්වනු ලැබීය. මීගොඩ සුඛිත ස්වාමීන් වහන්සේගේ වැඩමවීමෙන් පැවැත්වුණු මෙම ආගමික වැඩසටහන සඳහා අධිකරණ සහ ජාතික ඒකාබද්ධතා අමාත්යාංශයේ ලේකම්, ජනාධිපති නීතිඥ අයේෂා ජිනසේන මෙනවිය සහ වැඩබලන බන්ධනාගාර කොමසාරිස් ජනරාල් ප්රසාද් හේමන්ත කුමාර මහතා ඇතුළු අමාත්යාංශයේ මෙන්ම බන්ධනාගාර දෙපාර්තමේන්තුවේ උසස් නිලධාරීන් රැසක් එක්ව සිටියහ.
එමෙන්ම, මීගමුව බන්ධනාගාරයේ සිට ආරක්ෂිත පියවරක් ලෙස බූස්ස බන්ධනාගාරය වෙත මාරු කර යවා සිටි රැඳවියෙකු පෙරේදා (12දා) සන්ධ්යා කාලයේදී සිය සිරමැදිරිය අසල පිහිටි වැසිකිළිය තුළදී ගෙල වැලලාගෙන සියදිවි නසා ගැනීමට උත්සාහ කර ඇති බව බන්ධනාගාර අධිකාරි කාර්යාලය අනාවරණය කරයි. ලුනුවිල කිරිමැටියාන වත්තේ පදිංචි 31 හැවිරිදි මෙම රැඳවියා ඉකුත් 6 වැනිදා මීගමුවේ සිට බූස්ස බන්ධනාගාරය වෙත රැගෙන ආ අයෙකු වන අතර, ඔහු ගෙල වැලලා ගැනීමට තැත් කළ අවස්ථාවේදී එහි සිටි අනෙකුත් රැඳවියන් වහා ක්රියාත්මක වී ඔහුව බේරා ගැනීමට සමත්ව තිබේ.
මීගමුව බන්ධනාගාරය තුළ මෑතකදී රැඳවියන් කණ්ඩායම් දෙකක් අතර ඇති වූ මෙම දරුණු ප්රචණ්ඩකාරී ගැටුමෙන් බන්ධනාගාර නිලධාරීන් ඇතුළු 29 දෙනෙකු මුල් අවස්ථාවේදීම ජීවිතක්ෂයට පත්ව තවත් 100 කට වැඩි පිරිසක් තුවාල ලැබූහ. මෙම සිදුවීමෙන් පසුව ආරක්ෂක හේතූන් මත රැඳවියන් විශාල පිරිසක් වෙනත් බන්ධනාගාර වෙත මාරු කිරීමට පියවර ගත් අතර, ඔවුන් නඩු විභාග සඳහා අදාළ අධිකරණ වෙත ඉදිරිපත් කිරීමේදී බන්ධනාගාර බලධාරීන්ට දැඩි ප්රවාහන හා සැපයුම් අභියෝගයන්ට මුහුණ දීමට සිදු විය. ඒ අනුව, මීගමුව බන්ධනාගාරයේ සිට වෙනත් බන්ධනාගාර වෙත මාරු කරන ලද රැඳවියන්ගේ අධිකරණ කටයුතු, අදාළ අධිකරණ මඟින් නියම කරනු ලබන පරිදි සූම් (Zoom) තාක්ෂණය ඔස්සේ මාර්ගගතව පැවැත්වීමට බන්ධනාගාර දෙපාර්තමේන්තුව පියවර ගෙන ඇත.
බන්ධනාගාර මාධ්ය ප්රකාශක සහ කොමසාරිස් ඒ.සී. ගජනායක මහතා ප්රකාශ කළේ මෙම නඩු විභාගයන් මාර්ගගත ක්රමයට සංවිධානය කරන ලෙස අදාළ අධිකරණවලින් ඉල්ලීම් කර ඇති බවත්, ඒ අනුව ලැබෙන නියෝග මත කටයුතු කිරීමට දෙපාර්තමේන්තුව සූදානමින් සිටින බවත්ය. මීට අමතරව, තවමත් රැඳවියන් 600 කට ආසන්න පිරිසක් මීගමුව බන්ධනාගාරයේ රැඳී සිටින අතර, ඔවුන්ව ද කඩිනමින් වෙනත් බන්ධනාගාර පහසුකම් වෙත මාරු කිරීමට නිලධාරීන් කටයුතු යොදමින් පවතී.