මීගමුව බන්ධනාගාරය තුළදී බන්ධනාගාර නිලධාරීන් අටදෙනකු අමානුෂික ලෙස වධහිංසා පමුණුවා ඝාතනය කිරීමේ සිද්ධියට සම්බන්ධ රැඳවියන් පිරිසක් නැවත අත්අඩංගුවට ගෙන ඔවුන්ට එරෙහිව මිනීමැරුම් චෝදනා යටතේ නඩු පැවරීමට අපරාධ පරීක්ෂණ දෙපාර්තමේන්තුව මේ වනවිට කටයුතු සූදානම් කරමින් සිටියි. මෙම සාහසික අපරාධයට සෘජුවම සම්බන්ධ බවට සැකකෙරෙන රැඳවියන් 75 දෙනකුගේ පමණ අනන්යතාවන් සහ නම්-ගම් ඇතුළු තොරතුරු මේ වනවිටත් අනාවරණය කරගෙන ඇති අතර, ඔවුන් අත්අඩංගුවට ගැනීම සඳහා වන විශේෂ විමර්ශන ඉදිරි දින කිහිපය තුළදී ක්රියාත්මක කිරීමට නියමිතව ඇත.
මේ පිළිබඳව අදහස් දක්වමින් වැඩබලන පොලිස්පති සංජීව ධර්මරත්න මහතා සඳහන් කර ඇත්තේ, අදාළ නිලධාරීන් ඝාතනය කළ සැකකරුවන් හඳුනාගැනීම සඳහා අපරාධ පරීක්ෂණ දෙපාර්තමේන්තුව විසින් සිදුකරන විමර්ශන කටයුතු ඉතා සාර්ථක මට්ටමක පවතින බවයි. එමෙන්ම වරදකරුවන්ට එරෙහිව උපරිම නීතිමය පියවර ගන්නා බවද ඔහු අවධාරණය කළේය. බන්ධනාගාර නිලධාරීන්ට අමානුෂික ලෙස පහරදුන් පුද්ගලයන් නිවැරදිව හඳුනාගැනීම සඳහා සිද්ධිය සිදුවන අවස්ථාවේදී මීගමුව බන්ධනාගාරය තුළ රැඳී සිටි සියලුම රැඳවියන්ගෙන් ප්රකාශ සටහන් කරගනිමින් දීර්ඝ ලෙස ප්රශ්න කිරීම් දැනටමත් ආරම්භ කර තිබේ.
විමර්ශන කටයුතු තවදුරටත් ශක්තිමත් කිරීම සඳහා බන්ධනාගාරය තුළ සවිකර තිබූ සීසීටීවී කැමරා පද්ධතියේ දර්ශන ඇතුළත් ඩී.වී.ආර්. යන්ත්ර සොයා පොලිස් නිලධාරීන් විසින් මීගමුව බන්ධනාගාර පරිශ්රය දැඩි සෝදිසි කිරීමකට ලක්කරමින් සිටියි. මෙම අපරාධයට සම්බන්ධ සැකකාර රැඳවියන්ගෙන් ප්රකාශ ලබාගැනීමෙන් අනතුරුව, ඔවුන් නිල වශයෙන් අත්අඩංගුවට ගෙන මිනීමැරුම් චෝදනා යටතේ අධිකරණය හමුවට පැමිණවීමට පොලිසිය විසින් ඉදිරි පියවර ගනිමින් සිටී.
මෙම අවාසනාවන්ත සිදුවීමෙන් ජීවිතක්ෂයට පත්ව ඇත්තේ බන්ධනාගාර හදිසි උපක්රමික බළකායට අනුයුක්තව සේවය කළ නිලධාරීන් අටදෙනෙකි. සිදුකළ මරණ පරීක්ෂණ වාර්තාවලට අනුව අනාවරණය වී ඇත්තේ ඔවුන් රැඳවියන්ගේ දරුණු ප්රහාරයන්ට සහ අතිශය කෲර වධහිංසාවන්ට ලක්ව මියගොස් ඇති බවයි. එහිදී ඇතැම් නිලධාරීන්ගේ හිස මතට විශාල ගල් අතහැර හිස්කබල් පොඩි කර දමා තිබූ අතර, තවත් පිරිසකගේ මුඛයට සහ ගුද මාර්ගයට කොසු මිටවල් ඇතුළු කර අමානුෂික ලෙස වධහිංසා පමුණුවා තිබූ බවද එම වාර්තාවල සඳහන් වේ. මෙම ප්රහාරය මෙහෙයවූ සහ ඊට දායක වූ රැඳවියන්ගේ නම් ගම් ඇතුළු සවිස්තරාත්මක තොරතුරු රාශියක් මේ වනවිටත් විමර්ශන නිලධාරීන් අතට පත්වෙමින් පවතී.