කැනඩාවේ ටොරොන්ටෝ නුවර සුප්රකට 'හොස්පිට්ල් ෆෝ සික් චිල්ඩ්රන්' (SickKids) රෝහලේ සේවය කළ 44 හැවිරිදි වෛද්ය ඩිලාන් දිසානායක නමැත්තා ළමා ලිංගික අපයෝජන හා සූරාකෑමේ දර්ශන ළඟ තබා ගැනීම සහ අන්තර්ජාලය ඔස්සේ ඒවා ලබාගැනීමේ චෝදනා මත ටොරොන්ටෝ පොලිසිය විසින් අත්අඩංගුවට ගෙන තිබේ.
ටොරොන්ටෝ පොලිසියේ අන්තර්ජාල ළමා සූරාකෑම් විමර්ශන ඒකකය මඟින් මෙහෙයවන ලද පරීක්ෂණයකින් පසුව මෙම අත්අඩංගුවට ගැනීම සිදු කර ඇති අතර, විද්යුත් උපකරණයක් භාවිත කරමින් අන්තර්ජාලයෙන් ළමා ලිංගික අපයෝජන ද්රව්ය ලබාගැනීම පිළිබඳව ලැබුණු තොරතුරකට අනුව 2026 ජනවාරි මාසයේදී මෙම විමර්ශන ආරම්භ කර ඇත. පසුව පසුගිය පෙබරවාරි මාසයේදී විමර්ශකයන් විසින් අදාළ වෛද්යවරයාගේ නිවස සහ ඔහු සේවය කළ රෝහල් පරිශ්රය සෙවුම් වරෙන්තු සහිතව පරීක්ෂාවට ලක් කර ඇති අතර, එහිදී රාජකාරි පරිගණකය ද ඇතුළුව විද්යුත් උපකරණ කිහිපයක් අත්අඩංගුවට ගෙන තිබේ.
අධිකරණය හමුවට පැමිණවීමට නියමිතව තිබූ අදාළ වෛද්යවරයාට එරෙහි චෝදනා මෙතෙක් අධිකරණය හමුවේ තහවුරු වී නොමැති අතර, පොලිස් විමර්ශන තවදුරටත් ක්රියාත්මක වේ. කෙසේ වෙතත්, අදාළ ළමා ලිංගික අපයෝජන ද්රව්ය වෛද්යවරයාගේ වෛද්ය වෘත්තියට හෝ ඔහුගෙන් ප්රතිකාර ලැබූ රෝගීන්ට සම්බන්ධ බවට මෙතෙක් කිසිදු සාක්ෂියක් ලැබී නොමැති බව පොලිසිය අවධාරණය කරයි.
මෙම සිදුවීම සම්බන්ධයෙන් නිවේදනයක් නිකුත් කරමින් SickKids ළමා රෝහල සඳහන් කර ඇත්තේ අදාළ පුවත පිළිබඳව තමන් දැඩි කම්පනයට හා කනගාටුවට පත්ව සිටින අතර, චෝදනා ලැබූ බරපතල හැසිරීම දැඩි ලෙස හෙළා දකින බවයි. විමර්ශන පිළිබඳව දැනගැනීමට ලැබුණු සැනින්ම අදාළ වෛද්යවරයා වහාම ක්රියාත්මක වන පරිදි සේවයෙන් තහනම් කිරීමට පියවර ගත් බවත්, රෝගීන්ගේ සහ ඔවුන්ගේ පවුල්වල ආරක්ෂාවට ඉහළම ප්රමුඛතාව ලබා දෙන බවත් රෝහල් පාලනාධිකාරිය වැඩිදුරටත් පවසයි.
ළමා රෝග පිළිබඳ විශේෂඥ වෛද්යවරයකු මෙන්ම ටොරොන්ටෝ විශ්වවිද්යාලයේ සහකාර මහාචාර්යවරයකු වන ඩිලාන් දිසානායක සම්බන්ධයෙන් ටොරොන්ටෝ විශ්වවිද්යාලය ද ප්රකාශයක් නිකුත් කරමින් පවසා සිටින්නේ සිද්ධිය දැනගත් වහාම ඔහුව පරිපාලනමය වශයෙන් සේවයෙන් තහනම් කළ බවයි. ඉදිරියේදී සිදුවන පරීක්ෂණවලින් මෙම වැරදි තහවුරු වුවහොත් ඔහු සමඟ පවතින සියලු සබඳතා අවසන් කිරීමට පියවර ගන්නා බව ද එම විශ්වවිද්යාලය වැඩිදුරටත් පවසා ඇත.
