ගම්පොළ නගරයේ පිහිටි ප්රමුඛ බෞද්ධ විද්යාලයක භූමියෙන් වසර විස්සකට වඩා පැරැණි බවට සැකකෙරෙන රහසිගත විශාල භූගත කාමරයක් හමුවීමේ පුවතක් වාර්තා වේ. පාසල් පරිශ්රයේ සංවිධානය කර තිබූ ඩෙංගු මර්දන ශ්රමදාන ව්යාපාරයක් අතරතුරදී මෙම අසාමාන්ය ඉදිකිරීම අහඹු ලෙස අනාවරණය වී ඇත.
මේ පිළිබඳව විදුහල්පතිවරයා විසින් කලාප අධ්යාපන කාර්යාලය මෙන්ම ගම්පොළ පොලිස් ස්ථානය වෙත ද නිල වශයෙන් පැමිණිලි කර තිබේ.සිසුන් සහ ගුරු මණ්ඩලය එක්ව අක්කර දෙකහමාරක් පමණ වන පාසල් වත්ත පිරිසිදු කිරීමේ කටයුතුවල නිරතව සිට ඇත්තේ වර්තමානයේ පවතින ඩෙංගු මදුරු ව්යාප්තිය පාලනය කිරීමේ අරමුණිනි. එහිදී පාසල් ආපනශාලාවෙන් පිටවන අපජලය විධිමත් ලෙස බැහැර කිරීම සඳහා උපදෙස් පරිදි අඩි එකහමාරක් හෝ දෙකක් පමණ ගැඹුරු වළක් කැපීමට පිරිස පියවර ගෙන ඇත. එම අවස්ථාවේදී පොළොව යට තිබූ සිමෙන්ති කොන්ක්රීට් තට්ටුවක් හමුවී ඇති අතර, එය පැරණි අපවහන පද්ධතියක කොටසක් යැයි සිතා අපජල නළය එම කොන්ක්රීට් ස්ථරය විද ඇතුළට යොමු කිරීමට ඔවුන් ක්රියා කර තිබේ.
කෙසේ වෙතත්, මෙම සිදුවීමෙන් පසු පාසල් මායිමට යාබදව පදිංචි නිවසක කාන්තාවක පැමිණ අපූරු පැමිණිල්ලක් සිදු කර ඇත. පාසල් භූමියේ සිට පහළට දමා ඇති බටයකින් තමන්ගේ කාමරයේ විදුලි පංකාව අසලට අපජලය ගලා එන බව ඇය පවසා තිබේ. ගම්පොළ නුවර වීදිය අසල, උස් පාසල් භූමියට පහළින් පිහිටි මෙම නිවසේ හිමිකරුවන් විසින් අඩි හතළිහක් පමණ වන ගොඩනැගිලි කොටසක් පාසල් බිමට යටින් අභ්යන්තරයට වන්නට ඉදිකර ඇති බව ඉන් පසුව අනාවරණය විය. අදාළ පාර්ශවය ප්රකාශ කර ඇත්තේ එය තමන්ගේ ගරාජය සහ බඩු ගබඩා කරන කාමරය ලෙස භාවිත කළ බවයි.
රාජ්ය දේපළක් වන පාසල් භූමියක් යට මෙවැනි ඉදිකිරීමක් සිදුකර, ඒ මත අඩි එකහමාරක් පමණ පස් දමා වසා තිබීම හේතුවෙන් මෙය වසර විස්සක් තිහක් තිස්සේම රහසක්ව පැවති බව හෙළි වේ. මීට පෙර මෙරට දැඩි ආන්දෝලනයකට තුඩු දුන් සහරාන්ගේ ත්රස්ත කල්ලි සාමාජිකයන් කිහිපදෙනෙකු ද ගම්පොළ ප්රදේශයේදී අත්අඩංගුවට පත් වූ අතර, ඔවුන් මෙවැනි රහසිගත ස්ථානවල සාකච්ඡා පැවැත්වූ බව එකල හෙළි වී තිබිණි. මෙම බංකරය වැනි ස්ථානය ආසන්නයේම පාසලේ උදෑසන රැස්වීම් පවා පවත්වා ඇති අතර, නවසියයක් පමණ වන සිසුන් සහ ගුරුවරුන්ගේ ආරක්ෂාව පිළිබඳව දැඩි අවදානමක් මතුව ඇති බව ගුරු මණ්ඩලය පෙන්වා දෙති. වත්මන් විදුහල්පතිවරයා ප්රමුඛ පාලනාධිකාරිය මැදිහත් වීමෙන් මේ වන විට පොලිස් පරීක්ෂණ ක්රියාත්මකය.
