යාපනය නාගදීප ගණේෂා විද්යාලයේ විදුහල්පතිවරයා බෝට්ටුවකින් ගමන් කරමින් සිටියදී මුහුදට වැටී මියයාමේ සිද්ධිය සම්බන්ධයෙන් ඔහුගේ ඥාතීන් විසින් බලධාරීන්ට නව පැමිණිල්ලක් ඉදිරිපත් කර තිබේ. එහිදී ඥාතීන් පෙන්වා දෙන්නේ මෙම මරණය අනතුරක් නොවන බවත්, බෝට්ටුවේ ගමන් කළ වෙනත් පුද්ගලයෙකු විසින් විදුහල්පතිවරයාව මුහුදට තල්ලු කර ඇති බවට තමන් තුළ දැඩි සැකයක් පවතින බවත්ය.
මේ හේතුවෙන් සිද්ධිය පිළිබඳව විධිමත් හා පුළුල් පරීක්ෂණයක් පවත්වන ලෙස මියගිය විදුහල්පතිවරයාගේ පවුලේ සාමාජිකයෝ යාපනය බලධාරීන්ගෙන් ඉල්ලා සිටිති.පසුගිය මැයි මස 28 වැනිදා නාගදීප ගණේෂා විද්යාලයේ විදුහල්පතිවරයා වූ නඬරාසා මයුරන් මහතා පාසල වෙත යමින් සිටියදී බෝට්ටුවෙන් මුහුදට වැටී මියගිය බවට මුලින්ම වාර්තා කර තිබුණේ එම බෝට්ටුකරු විසිනි. ඒ අනුව සිදුකළ මූලික පරීක්ෂණවලින් එය දියේ ගිලීමෙන් සිදු වූ මරණයක් බවට තහවුරු කෙරුණු අතර, දේහය පිළිබඳ අවසන් කටයුතු සිදු කිරීම සඳහා ඥාතීන් වෙත භාර දීමටද පියවර ගෙන තිබුණි. කෙසේ වෙතත්, මෙම අනතුර සිදුවන අවස්ථාවේදී විදුහල්පතිවරයා සමඟ තවත් පුද්ගලයෙකු බෝට්ටුවේ ගමන් කර ඇති බව මේ වන විට අනාවරණය වී ඇත.
ඥාතීන් සිය පැමිණිල්ල මඟින් පෙන්වා දෙන්නේ බෝට්ටුවේ ගමන් කළ අදාළ පුද්ගලයා මියගිය විදුහල්පතිවරයාට එරෙහිව නිරන්තරයෙන්ම පෙත්සම් ඉදිරිපත් කළ අයෙකු බවයි. ඔහුගේ බිරිඳ එම පළාතේ ග්රාම නිලධාරිනියක ලෙස සේවය කරන අතර, පෙත්සම් ගැසීමට අමතරව ඔහු සමාජ මාධ්ය ජාල ඔස්සේද විදුහල්පතිවරයාට එරෙහිව ද්වේශසහගත ප්රකාශ නිතර නිතර පළ කර තිබේ. එමෙන්ම, මෙම සිදුවීමෙන් පසුව අදාළ පුද්ගලයා ගොඩබිමට පැමිණ සිනාසෙමින් කිසියම් අයෙකුට දුරකථන ඇමතුමක් ලබා දී දීර්ඝ වේලාවක් කතා කරමින් සිටිනු දුටු සාක්ෂිකරුවන්ද සිටින බව ඥාතීන් ප්රකාශ කරයි.
මේ වන විට කයිට්ස් පොලිසිය විසින් සිද්ධිය සම්බන්ධයෙන් වැඩිදුර පරීක්ෂණ ආරම්භ කර ඇති අතර, ප්රශ්න කිරීම් සඳහා අදාළ බෝට්ටුකරු යළි අත්අඩංගුවට ගෙන රඳවා තබා ගැනීමට පියවර ගෙන තිබේ. මේ අතර, මියගිය විදුහල්පතිවරයාගේ පුත්රයා පසුගියදා නිකුත් වූ අපොස සාමාන්ය... පළ විභාගයෙන් "ඒ" සාමාර්ථ 9ක් ලබා ගනිමින් විශිෂ්ට ලෙස විභාගය සමත් වී ඇතත්, තම දරුවාගේ එම සුවිශේෂී ජයග්රහණය දැක සතුටු වීමට විදුහල්පති නඬරාසා මයුරන් මහතා ජීවතුන් අතර නොසිටියේය.
