ශ්රී ලංකාවේ පෞද්ගලික අංශය තුළ පවතින පුරප්පාඩු සංඛ්යාව හාරලක්ෂයකට අධික බවත්, දේශීය වශයෙන් පවතින දැඩි ශ්රම හිඟය නිසා එම හිදැස පිරවීම සඳහා විදේශීය ශ්රමිකයන් බඳවා ගැනීමට කර්මාන්ත හිමියන්ට සිදුව ඇති බවත් කර්මාන්ත හා ව්යවසාය සංවර්ධන අමාත්ය සුනිල් හඳුන්නෙත්ති මහතා ප්රකාශ කළේය. විශේෂයෙන්ම නිපුණ සහ නිපුණ නොවන යන අංශ දෙකෙහිම ශ්රමිකයන්ගේ හිඟයක් පැවතීම හේතුවෙන් චීනය සහ ඉන්දියාව වැනි රටවලින් ශ්රමිකයන් ගෙන්වා ගැනීමට පෞද්ගලික අංශය පෙළඹී සිටින බව අමාත්යවරයා වැඩිදුරටත් සඳහන් කර ඇත.
ඉදිකිරීම් ක්ෂේත්රය, මෝටර් රථ කර්මාන්තය, පාවහන් හා සම් භාණ්ඩ නිෂ්පාදනය මෙන්ම උළු හා අදාළ උපාංග නිෂ්පාදන කර්මාන්ත වැනි රටේ ආර්ථිකයට වැදගත් වන ප්රධාන ක්ෂේත්ර රැසකට මෙම ශ්රම හිඟය බලපෑම් එල්ල කර තිබේ. පවතින කාර්මික මෙහෙයුම් අඛණ්ඩව පවත්වාගෙන යාම සඳහා ප්රමාණවත් දේශීය ශ්රම බලකායක් නොමැති වීම මෙම තත්ත්වයට මූලික හේතුව වී ඇති බව දැක්වේ.
කර්මාන්ත හා ව්යවසාය සංවර්ධන අමාත්යාංශය, පුනරුත්ථාපන කාර්යාංශය, වෘත්තීය පුහුණු අධිකාරිය සහ ජාතික අන්තරායකර ඖෂධ පාලක මණ්ඩලය එක්ව ක්රියාත්මක කරන ඒකාබද්ධ වැඩසටහනක් පිළිබඳ පැවති සාකච්ඡාවකදී අමාත්යවරයා මෙම කරුණු අනාවරණය කළේය. මෙවැනි ශ්රම හිඟයන්ට විසඳුමක් ලෙස, පුනරුත්ථාපනය වූ තරුණයන් වෘත්තීය පුහුණුව ලබා දී කාර්මික ශ්රම බලකායට එකතු කර ගැනීම සඳහා අවශ්ය ක්රමානුකූල වැඩපිළිවෙළක් අමාත්යාංශයේ සෘජු අධීක්ෂණය යටතේ ක්රියාත්මක කරන ලෙස ඔහු අදාළ නිලධාරීන්ට උපදෙස් ලබා දී තිබේ.