විම්බල්ඩන් ටෙනිස් තරගාවලියට සහභාගී වන නාඕමි ඔසාකා තමන්ගේ දක්ෂතා මෙන්ම තරග බිමට පිවිසෙන විලාසිතා හරහාද මේ වන විට ලෝකයේ අවධානය දිනා ගැනීමට සමත් වී තිබේ. වරක් ජපන් සම්ප්රදායික කිමෝනාවකින් සැරසී පැමිණි ඇය, මෙවර විම්බල්ඩන් තරගාවලියේදී ජපන් සංස්කෘතියේ අංග මුසු කළ ඇඳුම් විලාසිතාවන්ගෙන් සැරසී පිටියට පිවිසෙමින් සිය සුවිශේෂී අනන්යතාව විදහා දක්වයි.
තරග බිමට පිවිසීමේදී ඇතිවන දැඩි ස්නායු ආතතිය මගහරවා ගැනීමට සහ තමන්ගේ ආත්ම විශ්වාසය ඉහළ නංවා ගැනීමට මෙම විලාසිතා තමන්ට මහත් රුකුලක් වන බව ඇය පවසයි.සිය දෙවන තරගයේදී සම්ප්රදායික ජපන් ඇඳුමක කොටසක් වන 'ඔබි' (Obi) පටියක් සහ නයිකි බෝම්බර් ජැකට්ටුවක් අලංකාර ලෙස මුසු කරමින් ඇය පැමිණි අතර, එමගින් ඇයගේ විලාසිතා පිළිබඳ පවතින සුවිශේෂී නිර්මාණශීලී බව මනාව පැහැදිලි විය. තරගාවලියේ දැඩි සුදු ඇඳුම් නීති රීතිවලට අනුගත වෙමින්ම, ජපන් අභාෂය සහිතව මෙවැනි පෙනුමක් ලබාගැනීම පිළිබඳ ඇය අදහස් දක්වමින් කියා සිටියේ, එය ඉතා ආකර්ෂණීය අත්හදා බැලීමක් වූ බවයි. ඇයගේ විලාසිතා පිළිබඳව විවිධ පාර්ශ්වයන්ගෙන් විවේචන එල්ල වුවද, ඇය පවසන්නේ තමන් කිසිදු පූර්ව සැලසුමකින් තොරව මෙම විලාසිතා තෝරා ගන්නා බවයි.
එළිමහනේදී මෙන්ම පුද්ගලික ජීවිතයේදී ඉතා ලැජ්ජාශීලී අයෙකු බව පවසන ඔසාකා, ටෙනිස් පිටිය තුළදී එම ස්වභාවය අභිබවා යමින් තම ඉලක්කය කරා ගමන් කරයි. රුසියානු ක්රීඩිකා ඇනස්ටේෂියා ගසනෝවා පරාජය කරමින් විම්බල්ඩන් තරගාවලියේ තෙවන වටයට සුදුසුකම් ලැබීමට ඇය සමත් වූ අතර, එය ඇයගේ ක්රීඩා දිවියේ යළි පිබිදීමක් සනිටුහන් කරයි. සිය ක්රීඩා දිවියේ ජයග්රහණ අත්කර ගන්නා අතරම, 2023 වසරේදී උපත ලැබූ තම දියණියගේ ඉදිරි අනාගතය වෙනුවෙන්ද වැඩි කාලයක් ගත කිරීමට ඇය උනන්දු වෙයි.
