ශ්රී ලංකාවේ පාන වර්ග සඳහා අනිවාර්ය කර තිබූ වර්ණ කේත සහිත සීනි ලේබල් කිරීමේ රෙගුලාසි රජය විසින් යාවත්කාලීන කර ඇත. සෞඛ්ය සහ ජනමාධ්ය අමාත්ය වෛද්ය නලින්ද ජයතිස්ස මහතා විසින් ආහාර උපදේශක කමිටුවේ එකඟතාවය මත ආහාර පනත යටතේ මෙම සංශෝධන සිදු කර තිබේ.
2023 වසරේදී හඳුන්වා දුන් නීති තවදුරටත් වෙනස් කරමින් පසුගිය ජුනි 23 වැනි දින නිකුත් කරන ලද අතිවිශේෂ ගැසට් නිවේදනයක් මගින් මෙය ප්රකාශයට පත් කර ඇත. මෙම නව පියවර හරහා ඇසුරුම් කිරීමේ අවශ්යතා වෙනස් කිරීම, නීති ක්රියාත්මක කිරීමේ කාලසීමාව දීර්ඝ කිරීම සහ ව්යාපාරික කටයුතු සඳහා යොදාගන්නා ආහාර නිෂ්පාදන ද මෙම නියාමනයට යටත් කිරීම සිදු කර තිබේ.නව රෙගුලාසි වලට අනුකූලව, සෑම පානයක්ම මිලිලීටර් 100ක ප්රමාණයක් තුළ අඩංගු සීනි ප්රතිශතය මත පදනම්ව නිශ්චිත වර්ණ ලාංඡනයක් ප්රදර්ශනය කළ යුතුය. ඒ අනුව ග්රෑම් 8කට වඩා වැඩි සීනි ප්රමාණයක් පවතී නම් රතු පැහැති ලාංඡනයක් ද, ග්රෑම් 2.5ත් 8ත් අතර සීනි ප්රමාණයක් අඩංගු නම් ඇම්බර් හෙවත් කහ පැහැති ලාංඡනයක් ද යොදා ගැනීම අනිවාර්ය වේ. යම් පානයක සීනි ප්රමාණය ග්රෑම් 2.5කට වඩා අඩු නම් ඒ සඳහා යෙදිය යුත්තේ කොළ පැහැති ලාංඡනයයි.
සම්මත ලාංඡනය ප්රදර්ශනය කිරීම සඳහා ප්රමාණවත් ඉඩකඩක් නොමැති වීදුරු බෝතල් වෙනුවෙන් විශේෂ විකල්ප ලාංඡන සැලසුමක් ද මෙම නව නීති හරහා හඳුන්වා දී ඇත. එහිදී එම විකල්ප ලාංඡන සඳහා නිශ්චිත අවම ප්රමාණයේ අවශ්යතාවයන් නියම කර ඇති අතර, පානයේ අඩංගු සංඛ්යාත්මක සීනි අගය සිංහල, දෙමළ සහ ඉංග්රීසි යන භාෂා ත්රිත්වයෙන්ම පැහැදිලිව සටහන් කර තිබීම අත්යවශ්ය වේ.
මීට අමතරව, පාරිභෝගිකයින් වෙත සෘජුවම අලෙවි කිරීමට බලාපොරොත්තු නොවන නමුත්, වෙනත් ආහාර සැකසීමක්, සූදානම් කිරීමක් හෝ නැවත විකිණීමක් සඳහා සපයනු ලබන නිෂ්පාදන "ව්යාපාර අතර හුවමාරු වන ආහාර නිෂ්පාදන" (business-to-business food products) ලෙස මෙහිදී අලුතින් අර්ථ දක්වා තිබේ. ඒ අනුව අදාළ කාණ්ඩයේ නිෂ්පාදන සියල්ලම ද මෙම නව සීනි ලේබල් කිරීමේ නීති රාමුව යටතට ඇතුළත් වනු ඇත.
