වත්මන් ජාතික ජන බලවේගය රජය විසින් සේවක අර්ථසාධක අරමුදල (EPF) සහ සේවක නියුක්තයන්ගේ භාර අරමුදල (ETF) ඒකාබද්ධ කිරීමට උත්සාහ කරමින් සිටින බව පෙරටුගාමී සමාජවාදී පක්ෂය අනාවරණය කරයි. පසුගිය පහළොස්වන දින රැස්වූ කැබිනට් මණ්ඩලය විසින් මෙම අරමුදල් දෙක ඒකාබද්ධ කිරීමේ යෝජනාවක් සම්මත කර ඇති බවත්, මෙය සේවකයන් සතු අරමුදල් කොල්ලකෑමේ වුවමනාවක කොටසක් බවත් එම පක්ෂයේ නායක කුමාර් ගුණරත්නම් මහතා පෙන්වා දෙයි.
මෙමඟින් වසර ගණනාවක් පුරා මෙරට වැඩකරන ජනතාව සතු වූ දැවැන්තම මූල්ය සුරක්ෂිතතාව දැඩි අවදානමකට ලක්ව ඇති බව පසුගියදා පැවැති සාකච්ඡාවකදී එම පක්ෂයේ නායකත්වයේ අවධානයට යොමුව තිබේ.මෙම අරමුදල් දෙක පවත්වාගෙන යනු ලබන්නේ එකිනෙකට වෙනස් අරමුණු දෙකක් වෙනුවෙන් වන අතර, ඒවා එකිනෙක ඒකාබද්ධ කිරීම හරහා සේවකයන්ට හිමිවන ප්රතිලාභ අහිමි වී යන බව පෙරටුගාමී සමාජවාදී පක්ෂයේ අධ්යාපන ලේකම් පුබුදු ජයගොඩ මහතා සඳහන් කරයි. රජය විසින් මෙම අරමුදල් පාලනය කිරීම සඳහා රජය සහ පෞද්ගලික අංශය ඒකාබද්ධ වූ විශේෂ යාන්ත්රණයක් යෝජනා කර ඇති අතර, එය නරියට කුකුල් කොටුව බාර දීම වැනි ක්රියාවක් බව ඔහු උපමා කරයි. අරමුදලෙන් රජයට ණය දීම වැළැක්වීමේ මුවාවෙන්, මෙරට පෞද්ගලික අංශයේ ධනපතියන් අතට මෙම සේවක මුදල්වල භාරකාරීත්වය පැවරීමට වත්මන් පාලනය සූදානම් වන බවත්, එමඟින් අරමුදල්වල සැබෑ වටිනාකම පහළ වැටී සාමාජික මුදල් බරපතළ අනතුරක වැටෙන බවත් පක්ෂය අවධාරණය කරයි.
සේවක අර්ථසාධක අරමුදල රැකගැනීම වෙනුවෙන් විපක්ෂයේ වෘත්තීය සමිති මෙන්ම ජනතා විමුක්ති පෙරමුණ සහ ජාතික ජන බලවේගය වැනි පාර්ශවයන් මීට පෙර වසර ගණනාවක් තිස්සේ අරගල කළ ඉතිහාසයක් පවතී. මහින්ද රාජපක්ෂ රජය සමයේදී ද මෙම අර්ථසාධක අරමුදල රජයට පවරා ගැනීමට උත්සාහ කළ ද, ඊට එරෙහිව ඇති වූ දැවැන්ත විරෝධතා මධ්යයේ පොලිස් වෙඩි තැබීමකින් රොෂේන් චානක නම් පෞද්ගලික අංශයේ සේවකයා ජීවිතක්ෂයට පත්වීමත් සමඟ එම උත්සාහය ව්යර්ථ විය. එදා රාජපක්ෂ ආණ්ඩුවට කර ගැනීමට නොහැකි වූ එම ක්රියාවලිය වත්මන් පාලකයන් විසින් ඉටු කිරීමට සැරසෙන බව පෙරටුගාමී සමාජවාදී පක්ෂයේ දුමින්ද නාගමුව මහතා පෙන්වා දෙයි.
මෙම තත්ත්වය හමුවේ අදාළ අරමුදල් මුහුණ දී ඇති අවදානම පිළිබඳව රටේ පොදු ජනතාව දැනුවත් කිරීමේ අත්යවශ්යතාව පක්ෂ නායකත්වය විසින් සාකච්ඡා කර ඇත. කුමාර් ගුණරත්නම්, පුබුදු ජයගොඩ, දුමින්ද නාගමුව සහ චමීර කොස්වත්ත ඇතුළු පිරිසකගේ ප්රධානත්වයෙන් පැවැති මෙම සාකච්ඡාවේදී තීරණය වී ඇත්තේ කම්කරුවන් ඒකරාශී කරමින් මීට එරෙහිව දැවැන්ත අරගලයක් ආරම්භ කිරීමටයි. ඒ අනුව, වැඩකරන ජනතාව මේ පිළිබඳව මූලික වශයෙන් දැනුවත් කිරීමේ සහ සංවිධානය කිරීමේ වගකීම දුමින්ද නාගමුව මහතා වෙත පවරා තිබේ.