එක්සත් රාජධානිය තුළ මෙලනෝමා නමැති දරුණුතම සමේ පිළිකා වර්ගය වැළඳුණු පුද්ගලයින්ගේ සංඛ්යාව වාර්තාගත ලෙස ඉහළ ගොස් ඇති බව පිළිකා පිළිබඳ පර්යේෂණ සිදුකරන ප්රමුඛ පෙළේ පුණ්යායතනයක් විසින් නිකුත් කරන ලද විශ්ලේෂණ වාර්තාවකින් අනාවරණය වී තිබේ. ඒ අනුව 2022 වසරේදී පමණක් මෙලනෝමා රෝගීන් 20,980 දෙනෙකු වාර්තා වී ඇති අතර, මෙරට ඉතිහාසයේ මෙවැනි රෝගීන් සංඛ්යාවක් වාර්තා වූ පළමු අවස්ථාව මෙය වේ.
අනාගතය පිළිබඳ පුරෝකථනය කරමින් එම ආයතනය පෙන්වා දෙන්නේ 2040 වසර වන විට වාර්ෂිකව හඳුනාගන්නා නව රෝගීන් සංඛ්යාව 26,500ක් දක්වා ඉහළ යා හැකි බවයි. මෙය වර්තමානය හා සසඳන විට පිරිමින් අතර 23%ක සහ කාන්තාවන් අතර 26%ක වැඩිවීමක් පෙන්නුම් කරයි. එක්සත් රාජධානියේ ජනගහනය වර්ධනය වීම සහ වයස්ගත වීම මෙම පිළිකා රෝගීන් වැඩිවීමට ප්රධාන හේතු වී ඇති බව එම ආයතනය වැඩිදුරටත් සඳහන් කරයි.මෙසේ වාර්තාගත අයුරින් රෝගීන් ඉහළ යාම බෙහෙවින් කනස්සල්ලට කරුණක් බව පෙන්වා දෙන පිළිකා පර්යේෂණ ආයතනයේ ප්රධාන විධායක නිලධාරිනී මිචෙල් මිචෙල්, මෙලනෝමා රෝගය වැළඳීමට බලපාන ප්රධානතම සාධකයක් වන්නේ අධික ලෙස පාරජම්බුල (UV) කිරණවලට නිරාවරණය වීම බව අවධාරණය කරයි. එක්සත් රාජධානිය තුළ වාර්තා වන පිළිකා රෝගීන්ගෙන් දහයෙන් නව දෙනෙකුම හිරු එළියට සහ හිරු එළිය ලබාගන්නා යන්ත්රවලට (sunbeds) අධික ලෙස නිරාවරණය වීම හේතුවෙන් රෝගයට ගොදුරු වී ඇති බව සොයාගෙන ඇත. පිළිකා රෝගයෙන් ආරක්ෂා වීමට නම් හිරු එළිය ශක්තිමත් කාලයේදී සෙවණේ රැඳී සිටීම, ශරීරය හොඳින් ආවරණය වන පරිදි ඇඳුම් පැළඳුම් භාවිතා කිරීම සහ අවම වශයෙන් SPF 30ක් සහිත හිරු ආවරණ ආලේප කිරීම අනිවාර්ය බව විශේෂඥයින්ගේ මතයයි.
පිරිමින් අතර පිළිකා රෝගය බහුලවම දක්නට ලැබෙන්නේ පපුව, පිට සහ උදරය ඇතුළු කඳ ප්රදේශයේ වන අතර, කාන්තාවන් අතර එම රෝග තත්ත්වය වැඩි වශයෙන් දකින්නට ලැබෙන්නේ උකුලේ සිට පාද දක්වා පහළ කොටස්වලය. හිරු රශ්මිය තදින් පවතින දිනවල පමණක් නොව, වලාකුළු සහිත දිනවලදී පවා දැඩි හිරු එළියෙන් සමට හානි විය හැකි බවත්, පිළිකා රෝගය වළක්වා ගැනීමට නම් එදිනෙදා ජීවිතයේදී සූර්ය ආරක්ෂණ උපක්රම අනුගමනය කිරීම අත්යවශ්ය බවත් සෞඛ්ය අංශ නිරන්තරයෙන් සිහිපත් කරයි. කිසියම් අසාමාන්ය කැළලක්, වෙනස් වන මවුලයක් හෝ සුව නොවන තුවාලයක් සම මත පවතී නම්, එය නොසලකා හරින්නේ නැතිව වහාම වෛද්ය ප්රතිකාර සඳහා යොමුවීමෙන් පිළිකා රෝගය මුල් අවස්ථාවේදීම හඳුනාගෙන ජීවිත බේරා ගැනීමට හැකියාව ලැබෙනු ඇත.
