ශ්රී ලංකාව තුළ රැඳී සිටිමින් අන්තර්ජාලය ඔස්සේ නීතිවිරෝධී මූල්ය ජාවාරම් සහ සයිබර් අපරාධවල නිරත වූ විදේශිකයන් විශාල පිරිසක් අත්අඩංගුවට ගැනීමේ දැවැන්ත මෙහෙයුම් මාලාවක් මේ දිනවල ක්රියාත්මක වෙමින් පවතී. එහි නවතම පියවර ලෙස රාජගිරිය සහ තලංගම යන ප්රදේශ කේන්ද්ර කරගනිමින් සිදුකළ වැටලීම්වලදී විදේශිකයන් එකසිය පනහකට අධික සංඛ්යාවක් ආරක්ෂක අංශ භාරයට ගෙන තිබේ.
රාජගිරිය, මැද වැලිකඩ පාරේ පිහිටි බහුමහල් නිවාස සංකීර්ණයක කුලී පදනම මත රැඳී සිටිමින් රහසිගතව පවත්වාගෙන ගිය ජාත්යන්තර මූල්ය වංචා මධ්යස්ථානයක් වටලා විදේශිකයන් 120කට ආසන්න පිරිසක් අත්අඩංගුවට ගැනීමට පොලිසිය සමත් විය. මෙම සැකකරුවන් අතර චීනය, වියට්නාමය, මැලේසියාව, මැඩගස්කරය, පිලිපීනය, තායිලන්තය සහ කාම්බෝජය යන රටවලට අයත් ජාතිකයින් සිටින බව තහවුරු වී ඇත. වැටලීම සිදුකරන අවස්ථාවේදී ඔවුන් සතුව තිබූ පරිගණක සහ ජංගම දුරකථන තොගයක් පොලිස් භාරයට ගෙන ඇති අතර, එතැනින් පලාගිය තවත් පිරිසක් සොයා වැලිකඩ පොලිසිය මේ වන විටත් වැඩිදුර මෙහෙයුම් දියත් කර තිබේ.
මීට සමගාමීව, මැයි මස දෙවනදා වලාන මධ්යම දූෂණ මර්දන බලකාය සහ තලංගම පොලිසිය ඒකාබද්ධව කොස්වත්ත ප්රදේශයේ සිදුකළ තවත් වැටලීමකින් පරිගණක අපරාධවලට සම්බන්ධ බවට සැකකෙරෙන චීන ජාතිකයින් 37 දෙනෙකු අත්අඩංගුවට ගනු ලැබීය. වයස අවුරුදු 23ත් 44ත් අතර පසුවන මෙම පිරිසට පිරිමි පුද්ගලයින් 36 දෙනෙකු සහ එක් කාන්තාවක් ඇතුළත් වේ. පරිගණක අපරාධ පනත යටතේ අත්අඩංගුවට ගත් මෙම පිරිස ලබන 07 වනදා දක්වා රක්ෂිත බන්ධනාගාරගත කිරීමට කඩුවෙල මහේස්ත්රාත් අධිකරණය නියෝග කර ඇත. ඔවුන් රැඳී සිටි නිවස මුද්රා තබා ඇති අතර, එහි තිබී සොයාගත් ඩෙක්ස්ටොප් පරිගණක 35ක්, ටැබ් 37ක්, ජංගම දුරකථන 147ක් සහ සිම්පත් 100ක ප්රමාණයක් අපරාධ පරීක්ෂණ දෙපාර්තමේන්තුවේ පරිගණක අපරාධ විමර්ශන ඒකකය වෙත යොමු කර තිබේ.
අත්අඩංගුවට පත් වූ බහුතරයක් විදේශිකයන් මාස තුනක සංචාරක වීසා මත මෙරටට පැමිණ ඇති බව මූලික විමර්ශනවලදී හෙළි වී ඇත. තලංගමදී අත්අඩංගුවට ගත් පිරිස අතරින් දෙදෙනෙකු වලංගු වීසා නොමැතිවද, තවත් අයෙකු විදේශ ගමන් බලපත්රයක් නොමැතිවද මෙරට රැඳී සිට ඇති අතර, එක් සැකකරුවෙකු සතුව තිබී නීතිවිරෝධී දුම්වැටි 2100ක්ද පොලිසිය විසින් සොයාගනු ලැබීය. මොවුන් සුඛෝපභෝගී නිවාස කුලියට ගෙන හැකර් ප්රහාර සහ අන්තර්ජාල මූල්ය ජාවාරම්වල නිරත වී ඇති බවට සැකකෙරේ.
පසුගිය මාර්තු මාසයේ සිට මේ දක්වා කාලය තුළ පමණක් මෙවැනි සයිබර් අපරාධ සම්බන්ධයෙන් චීන ජාතිකයින් 320කට අධික පිරිසක් ශ්රී ලංකාවේ විවිධ ප්රදේශවලින් නීතියේ රැහැනට කොටු වී ඇත. මාර්තු මැද භාගයේදී අනුරාධපුර සහ මිහින්තලේ ප්රදේශවලින් චීන ජාතිකයින් 126ක්ද, මාර්තු අග මීගමුවෙන් 16ක්ද අත්අඩංගුවට පත්විය. මීට අමතරව අප්රේල් මුලදී හලාවත ඉරණවිල ප්රදේශයේදී විදේශිකයන් 150කට ආසන්න පිරිසක් ලැප්ටොප් 100ක් සහ ජංගම දුරකථන 250කට අධික ප්රමාණයක් සමගින් අත්අඩංගුවට පත් වූයේ මෙරට විශාලතම අන්තර්ජාල මූල්ය වංචා මෙහෙයුම ලෙසිනි. ඉන් අනතුරුව අප්රේල් 16 වනදා කටුනායක ගුවන්තොටුපළේදීද ජංගම දුරකථන 383ක් සහ ටැබ් 101ක් සමගින් චීන ජාතිකයින් 9 දෙනෙකුද ආරක්ෂක අංශ වෙත කොටු විය.
