මෙරට අත්යවශ්ය සහ ජීවිතාරක්ෂක ඖෂධ අඛණ්ඩව සැපයීමේ ක්රියාවලිය මේ වන විට දැඩි අවදානමකට ලක්ව ඇති බැවින්, එම සැපයුම් ජාලය කඩිනමින් ස්ථාවර කිරීම සඳහා ප්රායෝගික පියවර ගන්නා ලෙස ශ්රී ලංකා ඖෂධ කර්මාන්ත මණ්ඩලය අදාළ සියලුම බලධාරීන්ගෙන් දැඩිව ඉල්ලා සිටියි.
ඉදිරි කාලයේදී රජයේ මෙන්ම පෞද්ගලික අංශයේද ඖෂධ හිඟය තවදුරටත් වර්ධනය වීමේ දැඩි ප්රවණතාවක් පවතින බවට එම මණ්ඩලය අනතුරු අඟවයි. මෙවැනි තත්වයක් උද්ගත වුවහොත් එය හුදෙක් රෝගීන්ට පමණක් නොව සමස්ත සෞඛ්ය පද්ධතියටම, එනම් රෝහල්, ඖෂධසල් සහ වෛද්යවරුන් ඇතුළු සියලුම පාර්ශ්වයන්ට දැඩි බලපෑමක් එල්ල කරමින් බරපතළ අර්බුදයක් නිර්මාණය කරනු ඇත.
ඖෂධ යනු සාමාන්ය පාරිභෝගික භාණ්ඩයක් ලෙස සැලකිය නොහැකි අතර, ඒවා හදිසි සත්කාරක සේවා, දෛනික ප්රතිකාර ලබාදීම්, දිගුකාලීන රෝග පාලනය මෙන්ම ජීවිතාරක්ෂක වෛද්ය මැදිහත්වීම් සඳහා අත්යවශ්ය සාධකයක් වේ. එබැවින් ජනතාව වෙත ඖෂධ බෙදා හැරීමේ සමස්ත යාන්ත්රණයම අතිශය තීරණාත්මක කාර්යභාරයක් ඉටු කරයි. මේ අතරතුර, ආසන්න වශයෙන් සියයට 38කින් පමණ ඉහළ ගොස් ඇති ඉන්ධන මිල ගණන් ඉදිරියේදී තවදුරටත් ඉහළ යාමේ අවදානමක් පවතින බවද වාර්තා වේ. මීට අමතරව භාණ්ඩ ප්රවාහන ගාස්තු සියයට 40කට වඩා වැඩි ප්රමාණයකින් ඉහළ ගොස් ඇති අතර, ඖෂධ නිෂ්පාදනය සඳහා යොදා ගන්නා සක්රීය අමුද්රව්ය සහ ඇසුරුම් ද්රව්යවල ගෝලීය මිල ගණන්ද මේ වන විට ශීඝ්රයෙන් ඉහළ ගොස් තිබේ.
ඇමෙරිකානු ඩොලරයට සාපේක්ෂව ශ්රී ලංකා රුපියලේ අගය පහත වැටීම හේතුවෙන් ආනයන පිරිවැය තවදුරටත් ඉහළ යාමද මෙම අර්බුදය කෙරෙහි සෘජුවම බලපා ඇතැයි ශ්රී ලංකා ඖෂධ කර්මාන්ත මණ්ඩලය තවදුරටත් අවධාරණය කරයි. අදාළ ඖෂධ තොග නියමිත කාලසීමාවන් තුළ බෙදාහැරීමේ පද්ධතිය හරහා සංසරණය නොවුණහොත්, නව ඇණවුම් ලබාදීම, වරායෙන් තොග නිදහස් කර ගැනීම සහ එදිනෙදා සැපයුම් කටයුතු සාමාන්ය පරිදි පවත්වාගෙන යාම සැපයුම්කරුවන්ට අතිශයින්ම දුෂ්කර වනු ඇත. විශේෂයෙන්ම ශ්රී ලංකාව වැනි සාපේක්ෂව කුඩා ප්රමාණයේ ඇණවුම් මත යැපෙන වෙළෙඳපොළක් තුළ, සැපයුම් ජාලයේ ඇතිවන සුළු ප්රමාදයක් වුවද සමස්ත ඖෂධ තොග සීමා වීමට සහ සම්පූර්ණ බෙදාහැරීමේ ක්රියාවලියම පුළුල් ලෙස අඩාල වීමට ක්ෂණිකව බලපානු ලබයි.
