රජයේ වෛද්ය නිලධාරීන්ගේ සංගමය සහ සෞඛ්ය අමාත්යවරයා අතර පවතින අර්බුදය තවදුරටත් උග්ර වෙමින් පවතින අතර, වෛද්යවරුන්ගේ වෘත්තීය සමිති ක්රියාමාර්ග සහ නවක වෛද්ය පත්වීම් සම්බන්ධයෙන් පාර්ශ්වයන් දෙකම දැඩි ස්ථාවරයක පසු වෙයි.
රජයේ වෛද්ය නිලධාරීන්ගේ සංගමය අද පෙරවරු 8.00 සිට දිවයින පුරා රෝහල් රැසක් ආවරණය වන පරිදි වෘත්තීය සමිති ක්රියාමාර්ගයක් ආරම්භ කර ඇති බව එහි ලේකම් වෛද්ය ප්රභාත් සුගතදාස මහතා තහවුරු කළේය. කෙසේ වෙතත්, රෝගීන්ට සිදුවන අපහසුතා අවම කිරීමේ අරමුණින් මාතෘ, ළමා, පිළිකා, වකුගඩු, මානසික රෝග සහ විද්යායතන රෝහල් මෙම ක්රියාමාර්ගයෙන් බැහැර කර තිබේ. පවතින ගැටලු විසඳීම සඳහා අද දිනයේදී හදිසි මධ්යම කාරක සභාවක් කැඳවා ඉදිරි ක්රියාමාර්ග තීව්ර කිරීමටද වෛද්ය සංගමය තීරණය කර ඇත.
සෞඛ්ය අමාත්ය වෛද්ය නලින්ද ජයතිස්ස මහතා විසින් සෞඛ්ය වෘත්තිකයින් සේවයෙන් ඉවත් කරන බවට සිදුකළ බව කියන ප්රකාශය ප්රායෝගිකව ක්රියාවට නංවා පෙන්වන ලෙස වෛද්ය සංගමය අමාත්යවරයාට විවෘත අභියෝගයක් එල්ල කර තිබේ. අමාත්යවරයාගේ ප්රකාශ සහ ක්රියාකලාපය අතර පරස්පරතාවයක් පවතින බව පවසන වෛද්ය සුගතදාස මහතා, වැරදි තීරණ ගෙන ඉතිහාසයේ කුණු කූඩයට වැටුණු කළු චරිත බවට පත්වූ සෞඛ්ය අමාත්යවරුන්ගේ ලැයිස්තුවට එක් නොවන ලෙසද ඔහුට අනතුරු අඟවයි. එමෙන්ම, වියරුවෙන් මිදී විවෘත සංවාදයක් සඳහා පැමිණෙන ලෙසද සංගමය අමාත්යවරයාට ආරාධනා කර සිටියි.
අනෙක් අතට, මෙම වර්ජනය කිසිදු සාධාරණ පදනමක් නොමැතිව හුදෙක් දේශපාලනික අරමුණු මත රජය අපහසුතාවයට පත් කිරීම සඳහා දියත් කරනු ලැබුවක් බව සෞඛ්ය අමාත්යවරයා අවධාරණය කරයි. ඔහු පෙන්වා දෙන්නේ වසර ගණනාවක අධ්යාපනයෙන් පසු සීමාවාසික පුහුණුව අවසන් කළ නවක වෛද්යවරුන් 453 දෙනෙකු රජයේ සේවයට එක්කර ගැනීමේ ක්රියාවලිය වෛද්ය සංගමය විසින් තම වුවමනාවන් වෙනුවෙන් ප්රාණ ඇපයට ගෙන ඇති බවයි.
මෙම සීමාවාසික වෛද්යවරුන්ට රජයේ සේවයට ඇතුළත් වීම සඳහා අයදුම් කිරීමට ලබා දී ඇති අවසන් කාලසීමාව එළඹෙන සෙනසුරාදා දහවල් 12.00 න් අවසන් වන බවත්, එය කිසිම හේතුවක් මත දීර්ඝ නොකරන බවත් අමාත්යවරයා තරයේ ප්රකාශ කර සිටියි. නියමිත වේලාවට අයදුම් නොකරන වෛද්යවරුන්ගේ වර්තමාන රෝහල් සේවය සහ වැටුප් නතර වන අතර, ඔවුන්ට පෞද්ගලික අංශයට යොමුවීමට සිදුවනු ඇත. යම් හෙයකින් පසුව රාජ්ය සේවා කොමිසම හරහා අභියාචනා කර යළි අයදුම් කළද, කුසලතා අනුපිළිවෙල නොසලකා ඔවුන්ට ඊළඟට පැමිණෙන 1300ක කණ්ඩායමේද අවසානයට එක්වීමට සිදුවන බව ඔහු පැහැදිලි කළේය.
කවර හෝ කණ්ඩායමක් මෙම පත්වීම් ලබාගැනීමට බාධා කරන්නේ නම් හෝ කිසියම් අයුරකින් නවක වෛද්යවරුන්ට තර්ජනය කරන්නේ නම් කිසිදු බියකින් තොරව වහාම සෞඛ්ය අමාත්යාංශයට ඒ බව දැනුම් දෙන ලෙසද අමාත්යවරයා ඉල්ලා තිබේ. එලෙස ලැබෙන පැමිණිලි සම්බන්ධයෙන් ශ්රී ලංකා පොලීසිය සහ අපරාධ පරීක්ෂණ දෙපාර්තමේන්තුව (CID) හරහා සඳුදා දිනෙන් පසු දැඩි විමර්ශන ආරම්භ කර නීතිමය පියවර ගන්නා බව සෞඛ්ය අමාත්යවරයා වැඩිදුරටත් ප්රකාශ කර ඇත.
