ගල්අඟුරු ආනයන ක්රියාවලියට අදාළව මතුව ඇති ආන්දෝලනාත්මක තත්ත්වය හමුවේ බලශක්ති අමාත්ය කුමාර ජයකොඩි සහ එම අමාත්යාංශයේ ලේකම් මහාචාර්ය උදයංග හේමපාල යන මහත්වරුන් අද (2026 අප්රේල් 17) පස්වරුවේ සිය ධුරවලින් ඉල්ලා අස්වී ඇති අතර, ඉන් හිස්වූ අමාත්යාංශ ලේකම් ධුරය සඳහා ශ්රී ලංකා ක්රමසම්පාදන සේවයේ ජ්යෙෂ්ඨ නිලධාරියෙකු වන ජී.එම්.ආර්.ඩී. අපොන්සු මහතා ජනාධිපති අනුර කුමාර දිසානායක මහතා විසින් වහාම පත් කරනු ලැබ තිබේ.
ජනාධිපතිවරයා වෙත සිය ඉල්ලා අස්වීමේ ලිපි භාරදෙමින් ඔවුන් ප්රකාශ කර ඇත්තේ, ගල්අඟුරු ප්රසම්පාදනය පිළිබඳව සොයා බැලීමට අද දින පත් කරන ලද විශේෂ ජනාධිපති පරීක්ෂණ කොමිෂන් සභාවේ කටයුතු කිසිදු බලපෑමකින් තොරව, ස්වාධීනව සහ විනිවිදභාවයෙන් යුතුව පවත්වාගෙන යාමට ඉඩ සැලසීම වෙනුවෙන් ස්වේච්ඡාවෙන් මෙම තීරණය ගත් බවයි.බාල ගල්අඟුරු ගෙන්වීම සම්බන්ධයෙන් විපක්ෂයෙන් එල්ල වූ දැඩි විවේචන මධ්යයේ පසුගිය සතියේ අමාත්යවරයාට එරෙහිව විශ්වාසභංග යෝජනාවක් ද ඉදිරිපත් වූ අතර එය පාර්ලිමේන්තුවේදී වැඩි ඡන්දයෙන් පරාජයට පත්විය. කෙසේ වෙතත්, අමාත්යවරයා තවදුරටත් තනතුරේ රැඳී සිටීම ජනතා විමුක්ති පෙරමුණට දේශපාලනික වශයෙන් දැඩි අවාසියක් ගෙන දෙන බවට පැලවත්ත පක්ෂ මූලස්ථානයෙන් ජනාධිපතිවරයා වෙත නිරන්තරයෙන් කරුණු ඉදිරිපත් වී තිබූ බව ද වාර්තා වේ. මීට සමගාමීව, 2009 වසරේ සිට මේ දක්වා සිදු කර ඇති සියලුම ගල්අඟුරු ආනයනයන් පිළිබඳව විධිමත් අපරාධ පරීක්ෂණයක් පවත්වන ලෙස ඉල්ලා ජනාධිපති ලේකම්වරයා විසින් අපරාධ පරීක්ෂණ දෙපාර්තමේන්තුවට පැමිණිල්ලක් ද කර ඇත.
මේ සම්බන්ධයෙන් කරුණු පැහැදිලි කිරීම සඳහා රජයේ ප්රවෘත්ති දෙපාර්තමේන්තුවේදී විශේෂ මාධ්ය සාකච්ඡාවක් කැඳවා තිබූ අතර, එහිදී අදහස් දැක්වූ අමාත්ය විජිත හේරත් මහතා අවධාරණය කළේ අමාත්යවරයා කිසිදු ආකාරයක මූල්ය වංචාවකට ඍජුව සම්බන්ධ වී නොමැති බවයි. ජාත්යන්තර පර්යේෂණාගාර වාර්තා සහ නිසි ප්රසම්පාදන උපදේශනයන්ට අනුකූලව ගල්අඟුරු ආනයනය කර ඇති බවත්, කෝප් කමිටු විමර්ශනවලදී හෝ විගණන වාර්තාවලදී අමාත්යවරයා දූෂණයකට සම්බන්ධ බවට කිසිදු සාක්ෂියක් අනාවරණය වී නොමැති බවත් හෙතෙම පෙන්වා දුන්නේය. එහෙත්, ගෙන්වන ලද ගල්අඟුරුවල ගුණාත්මකභාවයේ යම් අඩුවක් පවතින බවත්, ඒ හේතුවෙන් විදුලි උත්පාදන ධාරිතාවට බලපෑමක් එල්ල වී ඇති බවත් රජය ඉතා විවෘතව සහ නිහතමානීව පිළිගන්නා බව ඔහු වැඩිදුරටත් ප්රකාශ කළේය.
නොරච්චෝලේ බලාගාරය ආරම්භ කළ දා සිට මේ දක්වා අවස්ථා 41කදී ගල්අඟුරු නැව් 465ක් පමණ මෙරටට රැගෙන විත් ඇති අතර, එම බොහෝ අවස්ථාවලදී බරපතළ අක්රමිකතා සිදුව ඇති බවට පාර්ලිමේන්තුවේදී පවා කරුණු තහවුරු වී ඇති බැවින්, මෙම සම්පූර්ණ ක්රියාවලියම පුළුල් විමර්ශනයකට ලක් කිරීම රජයේ අරමුණ වී තිබේ. ඒ සඳහා 1978 අංක 04 දරන විශේෂ ජනාධිපති විමර්ශන කොමිෂන් සභා පනත යටතේ ශ්රේෂ්ඨාධිකරණ විනිසුරු ගිහාන් කුලතුංග මහතාගේ සභාපතිත්වයෙන් කොමිසමක් පත් කර ඇති අතර, අභියාචනාධිකරණ විනිසුරු ආදිත්ය පටබැඳි සහ මහාධිකරණ විනිසුරු සංජීව යන මහත්වරුන් එහි සෙසු සාමාජිකයන් ලෙසත්, පී.බී. බන්දුලසේන මහතා එහි ලේකම්වරයා ලෙසත් කටයුතු කරති. මාස හයක් වැනි කෙටි කාලයක් තුළ මහජනතාවට ද විවෘත වූ මෙම කොමිසමේ පරීක්ෂණ අවසන් කර වාර්තාව ලබා ගැනීමට නියමිත අතර, පුරප්පාඩු වූ බලශක්ති අමාත්ය ධුරය සඳහා නව පත්කිරීමක් ජනාධිපතිවරයා විසින් ඉදිරියේදී සිදු කිරීමට නියමිතය.
බලශක්ති අමාත්යාංශයේ නව ලේකම්වරයා ලෙස පත් කරන ලද ජී.එම්.ආර්.ඩී. අපොන්සු මහතා අද පස්වරුවේ ජනාධිපති කාර්යාලයේදී ජනාධිපති ලේකම් ආචාර්ය නන්දික සනත් කුමානායක මහතා අතින් සිය පත්වීම් ලිපිය ලබා ගත් අතර, ඔහු මීට පෙර මුදල් හා ආර්ථික කටයුතු පිළිබඳ ජනාධිපති ජ්යෙෂ්ඨ අතිරේක ලේකම්වරයා ලෙස කටයුතු කළේය. රුහුණ විශ්වවිද්යාලයෙන් භෞතික විද්යාව පිළිබඳ විශේෂවේදී උපාධියක් ද, කොළඹ සහ ඕස්ට්රේලියානු ජාතික විශ්වවිද්යාලවලින් මෙන්ම ජපානයේ IDEAS ආයතනයෙන් පශ්චාත් උපාධි ද හිමිකරගෙන ඇති ඔහු, ජාතික සැලසුම්කරණය, බදු ප්රතිපත්ති සහ රාජ්ය මූල්ය කළමනාකරණය සම්බන්ධයෙන් පුළුල් පළපුරුද්දක් සහිත අයෙකි. ජාතික සැලසුම් දෙපාර්තමේන්තුව, ජාතික අයවැය දෙපාර්තමේන්තුව සහ දේශීය ආදායම් දෙපාර්තමේන්තුව ඇතුළු ප්රධාන රාජ්ය ආයතන රැසක සේවා අත්දැකීම් ඇති අපොන්සු මහතා, රුහුණ විශ්වවිද්යාලය, ශ්රී ලංකා සංවර්ධන පරිපාලන ආයතනය (SLIDA) සහ කොළඹ විශ්වවිද්යාලයේ මානව සම්පත් අභිවර්ධන ආයතනය (IHRA) යන ආයතනවල බාහිර කථිකාචාර්යවරයෙකු ලෙස ද කටයුතු කර තිබේ.
