රජ මාළිගාවක් යනු සුඛෝපභෝගී ජීවිතයේ කූටප්රාප්තිය බව අප කාගේත් විශ්වාසයයි; නමුත් බ්රිතාන්යයේ තෙවැනි චාල්ස් රජුගේ කෑම මේසයේ ක්රියාත්මක වන එක්තරා නීතියක් එම සුරංගනා කතා සිතුවිලි සම්පූර්ණයෙන්ම කණපිට හරවයි.
තමන්ගේ ආහාර වේලකින් පසු ඉතිරි වන කිසිදු කෑමක් ඉවත දැමීම රජු විසින් දැඩි ලෙස තහනම් කර තිබේ. මේ බව හෙළි කරන්නේ චාල්ස් රජුගේ බිරිඳ වන කැමිලා රැජිනගේ පුත්රයා මෙන්ම ප්රකට ආහාර විචාරකයෙකු ද වන ටොම් පාකර් බෝල්ස් විසිනි. පනස් එක් හැවිරිදි ඔහු සිය නවතම ග්රන්ථය වන 'Cooking And The Crown' හරහා රජ පවුලේ කෑම මේසයේ ඇති මෙම අපූරු රහස ලෝකයට අනාවරණය කර ඇත.
සාමාන්යයෙන් රජවරුන්ගේ භෝජනාගාරවලින් දිනපතා ඉවතලන අතිරික්ත ආහාර ප්රමාණය සුළුපටු නැත. එහෙත් චාල්ස් රජු ඊට හාත්පසින්ම වෙනස් බවත්, කෑම මේසයෙන් ඉතිරි වන සෑම දෙයක්ම ඊළඟ දිනයේ වෙනත් ආහාරයක් බවට පරිවර්තනය වීම හෝ නැවත ප්රයෝජනයට ගැනීම එහි අනිවාර්ය කරුණක් බවත් ටොම් පාකර් සිය ග්රන්ථයේ සටහන් කර තිබේ. ආහාර නාස්තිය දැඩි ලෙස පිළිකුල් කරන රජු කිසිවක් කුණු කූඩයට දැමීමට ඉඩ නොදෙන බව රාජකීය ලේඛක රිචඩ් ෆිට්ස්විලියම්ස් ද වැඩිදුරටත් තහවුරු කරයි.
එක්සත් රාජධානිය තුළ පමණක් වසරකට ආහාර ටොන් මිලියන 9.5ක් පමණ නාස්ති වන පසුබිමක රජුගේ මෙම ආදර්ශය අතිශය තීරණාත්මක එකකි. ෆෙයාෂෙයාර් (FareShare) ආයතනයේ දත්තවලට අනුව බ්රිතාන්යයේ මිලියන 11කට අධික ජනතාවක් එදිනෙදා කුසගින්න නිවාගැනීමට දැඩි අරගලයක නිරත වෙති. මෙම බිහිසුණු සමාජ ඛේදවාචකයට පිළියමක් ලෙස චාල්ස් රජු සහ කැමිලා රැජින එක්ව 2023 වසරේදී ‘Coronation Food Project’ නමින් දැවැන්ත ව්යාපෘතියක් ද දියත් කළහ. එයින් අපේක්ෂා කළේ නාස්තිය අවම කරමින් ආහාර අර්බුදයට මුහුණ දී සිටින ජනතාවට සහනයක් සැලසීමයි.
ආහාර සුරක්ෂිතතාව පමණක් නොව, සමස්ත පරිසර පද්ධතියම රැකගැනීම වෙනුවෙන් රජු සිය සම්පූර්ණ කාර්ය මණ්ඩලයම මෙහෙයවා ඇති අයුරු විශ්මයජනකය. බකිංහැම් මාලිගයේ බලශක්ති පරිභෝජනය අවම කිරීම, උද්යානවල කෘමිනාශක භාවිතය සීමා කර වනජීවීන්ට හිතකර පරිසරයක් සැකසීම සහ යල්පැනගිය තාක්ෂණික උපකරණ ප්රතිචක්රීකරණය සඳහා පරිත්යාග කිරීම වැනි තිරසර පියවර රැසක් එහි ක්රියාත්මකය. බොහෝ ලෝක නායකයින් සුඛෝපභෝගී ජීවිත ගත කරමින් පරිසර සමුළු අමතද්දී, බ්රිතාන්යයේ රජු තම කාර්යභාරය නිවසේ කෑම මේසයෙන්ම ආරම්භ කර තිබීම සෙසු පාලකයින්ට කදිම පිළිතුරක් සපයයි.
කිරුළක බර මනින්නේ එය නිර්මාණය කර ඇති රත්තරන්වලින් නොව, එය දරන පුද්ගලයාගේ හෘදය සාක්ෂියේ ප්රමාණයෙන් බව චාල්ස් රජුගේ කෑම මේසය අද ලෝකයටම නිහඬව පවසමින් සිටී.
