ඉන්ධන මිල ඉහළ යාමට සාපේක්ෂව බස්නාහිර පළාත තුළ ධාවනය වන ත්රිරෝද රථවල ගමන් ගාස්තුව රුපියල් 10 කින් ඉහළ නැංවීමට තීරණය කර ඇත. ඊයේ (23) මධ්යම රාත්රියේ සිට මෙම නව ගාස්තු සංශෝධනය බලාත්මක වන බව බස්නාහිර පළාත් මාර්ගස්ථ මගී ප්රවාහන අධිකාරියේ සභාපති ගාමිණී ජාසිංහ මහතා ඊයේ පස්වරුවේ නිල වශයෙන් නිවේදනය කළේය.
ඒ අනුව, මින් පෙර රුපියල් 100ක් ලෙස පැවති පළමු කිලෝමීටරය සඳහා වන ගාස්තුව රුපියල් 110ක් දක්වා වැඩි කර තිබේ. එසේම, දෙවන කිලෝමීටරයේ සිට ඉදිරියට සෑම කිලෝමීටරයක් සඳහාම අය කළ රුපියල් 85ක මුදල රුපියල් 90ක් දක්වා ඉහළ නංවා ඇති අතර, මෙම නව ගාස්තු ක්රමය බස්නාහිර පළාතට පමණක් සීමා වන බවද සභාපතිවරයා වැඩිදුරටත් අවධාරණය කළේය.ත්රිරෝද රථ වෘත්තීය සමිති විසින් ඉන්ධන මිල ඉහළ යාම පදනම් කරගනිමින් කළ ඉල්ලීමක් සලකා බැලීමෙන් අනතුරුව මෙම පියවර ගෙන තිබේ. මාර්ගස්ථ මගී ප්රවාහන අධිකාරියට අයත් මිල කමිටුව ‘සූම්’ (Zoom) තාක්ෂණය ඔස්සේ රැස්වී අදාළ ගාස්තු වැඩි කිරීමේ තීරණයට එළඹුණු බව ජාසිංහ මහතා සඳහන් කළේය. බස්නාහිර පළාතට අමතරව සෙසු පළාත්වල ක්රියාත්මක වන ත්රිරෝද රථ සංගම් ද සිය ගමන් ගාස්තු ඉහළ දැමීමට ඉදිරියේදී පියවර ගන්නා බව මේ අතරතුර ප්රකාශ කර ඇත.
මේ හා සමගාමීව පාසල් ප්රවාහන සේවා ගාස්තු සම්බන්ධයෙන් ද විවිධ සංගම් අදහස් පළ කර තිබේ. සමස්ත ලංකා අන්තර් පළාත් සිසු ප්රවාහන සංගමයේ සභාපති රුවන් ප්රසාද් මහතා ප්රකාශ කළේ පාසල් වෑන් රථ ගාස්තු ද සියයට 10ක ප්රතිශතයකින් ඉහළ දැමීමට ඔවුන් පියවර ගන්නා බවයි. කෙසේ වෙතත්, සමස්ත ලංකා පාසල් ළමුන් ප්රවාහන සංගමයේ සභාපති ලලිත් චන්ද්රසිරි මහතා සඳහන් කළේ සිය සංගමය පාසල් වෑන් රථ ගාස්තු වැඩි කිරීම පිළිබඳව සලකා බැලීම එළඹෙන මැයි මාසයේදී සිදු කිරීමට අවධානය යොමු කර ඇති බවයි.
