මුහුදේ අතරමං වී ඇති රුසියානු බොරතෙල් මිලදී ගැනීම සඳහා ඇමෙරිකානු භාණ්ඩාගාර දෙපාර්තමේන්තුව විසින් ඉන්දියාවට තාවකාලික සහනයක් ප්රකාශයට පත් කර තිබේ. ඇමෙරිකානු භාණ්ඩාගාර ලේකම් ස්කොට් බෙසන්ට් සඳහන් කරන පරිදි, දින 30ක කාලයක් සඳහා ක්රියාත්මක වන මෙම අවසරය මගින් ගෝලීය වෙළෙඳපොළ තුළ තෙල් සැපයුම අඛණ්ඩව පවත්වා ගැනීමට අපේක්ෂා කෙරේ.
එමෙන්ම, ඉරානය විසින් ගෝලීය බලශක්ති සැපයුම අවදානමට ලක් කිරීම හේතුවෙන් මතුව ඇති පීඩනය සමනය කිරීම ද මෙහි ප්රධාන අරමුණක් වී ඇත. ඉන්දියාවෙන් තෙල් ලබාගන්නා ශ්රී ලංකාවටද මෙම සහනය අර්බුදයෙන් වැළකිමට ආරංචියකි.මෙම තීරණය සැලසුම් සහගත කෙටි කාලීන පියවරක් ලෙස හඳුන්වා දී ඇති අතර, එයින් රුසියානු රජයට සැලකිය යුතු මූල්යමය ප්රතිලාභයක් අත් නොවන බව ඇමෙරිකාව අවධාරණය කරයි. ඊට හේතුව වන්නේ දැනටමත් මුහුදේ නෞකා තුළ පවතින තෙල් තොග සඳහා පමණක් මෙම අනුමැතිය හිමි වීමයි. මින් පෙර, යුක්රේනය ආක්රමණය කිරීමෙන් පසු ඇමෙරිකානු ජනාධිපති ඩොනල්ඩ් ට්රම්ප් විසින් රුසියානු බොරතෙල් සඳහා සම්බාධක පනවන ලද අතර, යුද්ධය සඳහා යෙදවෙන මූල්ය ප්රවාහයන් අවහිර කිරීමේ අරමුණින් රුසියානු තෙල් මිලදී ගැනීමෙන් වළකින ලෙස වොෂින්ටනය ඉන්දියාවට දැඩිව බලපෑම් කර තිබුණි.
2022 වසරේ සිට අඩු මිලට රුසියානු තෙල් මිලදී ගන්නා ප්රධානතම රටක් බවට ඉන්දියාව පත්ව සිටියද, ඇමෙරිකානු බලපෑම් සහ දෙරට අතර ඇති කරගත් නව වෙළෙඳ එකඟතාවන් මත පසුගිය මාස කිහිපය තුළ එම තත්ත්වය සැලකිය යුතු ලෙස වෙනස් විය. ඒ අනුව 2026 වසරේ මුල් භාගය වන විට ඉන්දියාවට රුසියාවෙන් ලැබෙන තෙල් ප්රතිශතය 20% කටත් වඩා අඩුවී, මාස 44ක කාලයක් තුළ වාර්තා වූ අවම අගයට පත් විය. මේ සමඟම ඉන්දියානු පිරිපහදු සමාගම් සිය සැපයුම් ජාලය සෞදි අරාබිය ඇතුළු ගල්ෆ් කලාපීය රටවල් සහ ඇමෙරිකාව වෙත යොමු කරමින් සිය බලශක්ති ප්රභවයන් විවිධාංගීකරණය කිරීමට පියවර ගත්හ.
කෙසේ වෙතත්, ඉරානය සම්බන්ධ කරගනිමින් වර්ධනය වන ඇමෙරිකානු - ඊශ්රායල ගැටුම් හේතුවෙන් මේ වන විට ගෝලීය තෙල් සැපයුමට දැඩි බලපෑම් එල්ල වී ඇත. විශේෂයෙන්ම ඉන්දියාවේ බොරතෙල් ආනයනයෙන් 40% ක් පමණ ගෙන එන ප්රධාන මුහුදු මාර්ගය වන හෝමූස් සමුද්ර සන්ධිය හරහා සිදුවන ප්රවාහන කටයුතුවලට බාධා එල්ල වීම මත ඉන්දියාවට යම් බලශක්ති හිඟයකට මුහුණ දීමට සිදුව තිබේ. ගෝලීය තෙල් මිල ඉහළ යෑමේ අවදානමක් පවතින මෙම තීරණාත්මක පසුබිම තුළ, අවශ්යතාවයට සරිලන පරිදි තෙල් සැපයීමට රුසියාව යළිත් වරක් සූදානමින් සිටින බව වාර්තා වේ.
ඇමෙරිකාව විසින් අප්රේල් මස මුල් සතිය දක්වා ක්රියාත්මක වන පරිදි වහාම ලබා දී ඇති මෙම තාවකාලික සහනයට අනුව, 2026 මාර්තු 5 වැනිදාට පෙර නෞකාවලට පටවා ඇති රුසියානු තෙල් තොග මිලදී ගැනීමට ඉන්දියාවට හැකියාව ලැබේ. මැදපෙරදිග අර්බුදය හමුවේ ඇතිවී තිබෙන හදිසි බලශක්ති අවශ්යතාවන් සපුරා ගැනීම සඳහා ඉන්දියානු පිරිපහදු සමාගම් මේ වන විටත් කඩිනමින් එම තෙල් තොග මිලදී ගැනීමට කටයුතු කරමින් සිටිති. මෙය සම්පූර්ණයෙන්ම රුසියානු තෙල් මත යැපීමක් නොව, පවතින අර්බුදයෙන් මිදීම සඳහා ඇමෙරිකානු අනුමැතිය සහිතව ගන්නා ලද හදිසි සහ ප්රායෝගික පියවරක් පමණක් බව පෙනී යයි.