ලෝක මට්ටමින් උද්ගතව පවතින ඉන්ධන අර්බුදය හේතුවෙන් ශ්රී ලංකාවේ සියලුම රජයේ සහ රජයේ අනුමත පෞද්ගලික පාසල්වල අධ්යයන කටයුතු සතියකට දින හතරකට පමණක් සීමා කිරීමට අධ්යාපන, උසස් අධ්යාපන සහ වෘත්තීය අධ්යාපන අමාත්යාංශය තීරණය කර තිබේ. ඒ අනුව, නැවත දැනුම් දෙන තුරු සෑම සතියකම බදාදා දිනය පාසල් නිවාඩු දිනයක් ලෙස සැලකෙන බව අමාත්යාංශය විසින් නිකුත් කරන ලද නවතම නිල චක්රලේඛයේ සඳහන් වේ.
මෙම තීරණයට සමගාමීව පාසල්වල දෛනික පරිපාලන කටයුතු සහ ඉගෙනුම් ක්රියාවලිය පවත්වාගෙන යාම සම්බන්ධයෙන් සියලුම පළාත් සහ කලාප අධ්යාපන බලධාරීන් වෙත විශේෂ උපදෙස් මාලාවක් ද නිකුත් කර ඇත.බදාදා දිනය නිවාඩු දිනයක් ලෙස ප්රකාශයට පත් කළ ද, එදිනට නිවසේ සිට අධ්යාපන කටයුතුවල නිරත වීම සඳහා සිසුන්ට අවශ්ය පැවරුම්, අභ්යාස සහ පුනරීක්ෂණ කටයුතු ලබා දීමට පියවර ගන්නා ලෙස සියලුම විදුහල්පතිවරුන් වෙත උපදෙස් ලබා දී ඇත. තවද, විෂය නිර්දේශ ආවරණය කිරීම සඳහා පාසල් වෙත ඉතිරිව පවතින කාලය සීමිත බැවින්, පාසල් මගින් හෝ වෙනත් බාහිර ආයතන මගින් සංවිධානය කරන විවිධ වැඩසටහන් සහ උත්සව සඳහා පාසල් කාලය යොදා නොගත යුතු බව ද අමාත්යාංශය දැඩිව අවධාරණය කර සිටියි.
ඉන්ධන අර්බුදයට මුහුණ දීමේ පියවරක් ලෙස, පාසල් මගින් පවත්වනු ලබන ඕනෑම උත්සවයක් හෝ වැඩසටහනක් ඉන්ධන පරිභෝජනය අවම වන ආකාරයෙන් සංවිධානය කළ යුතු බවට ද රජය උපදෙස් දී තිබේ. ඒ යටතේ, අධික ලෙස ඉන්ධන වැය වන රථ පෙළපාළි වැනි අංග පැවැත්වීම සම්පූර්ණයෙන්ම තාවකාලිකව අත්හිටුවා ඇත. මීට අමතරව, පාසල් අධ්යාපන චාරිකා සංවිධානය කිරීම මෙන්ම ඉදිරි දිනවලදී යාමට සැලසුම් කර ඇති සියලුම චාරිකා සඳහා සිසුන් සහභාගි කරවීම ද නැවත දැනුම් දෙන තුරු තාවකාලිකව අත්හිටුවීමට පියවර ගෙන තිබේ. රට තුළ පවතින තත්ත්වය යහපත් වූ පසු පාසල් පවත්වාගෙන යාම සම්බන්ධයෙන් ඉදිරියේදී වැඩිදුර උපදෙස් නිකුත් කිරීමට අමාත්යාංශය බලාපොරොත්තු වෙයි.
