පාසල් සඳහා සිසුන් ඇතුළත් කරගැනීමේ හා ශිෂ්යාධාර ලබා දීමේ අරමුණින් වාර්ෂිකව පවත්වනු ලබන 5 ශ්රේණිය ශිෂ්යත්ව විභාගය 2026 වසරේ දී අගෝස්තු මස 09 වැනි ඉරිදා දින පැවැත්වීමට නියමිත බව විභාග කොමසාරිස් ජනරාල්වරයා විසින් නිවේදනය කර ඇත.
මෙම විභාගය සඳහා අයදුම්පත් භාරගැනීම සම්පූර්ණයෙන්ම මාර්ගගත (online) ක්රමවේදය ඔස්සේ පමණක් සිදු කෙරෙන අතර, ඒ සඳහා 2026 මාර්තු මස 30 වැනිදා සිට අප්රේල් මස 30 වැනිදා දක්වා කාලය ලබා දී තිබේ. අප්රේල් 30 වැනි දින මධ්යම රාත්රී 12.00න් පසුව අදාළ මාර්ගගත පිවිසුම වසා දැමෙන බවත්, කිසිදු කරුණක් පදනම් කරගනිමින් අයදුම්පත් භාරගැනීමේ අවසන් දිනය නැවත දීර්ඝ නොකරන බවත් විභාග දෙපාර්තමේන්තුව දැඩිව අවධාරණය කරයි.
මෙවර ශිෂ්යත්ව විභාගයට පෙනී සිටීමේ අවස්ථාව හිමිවන්නේ රජයේ පාසල්වල හෝ රජයේ අනුමත පෞද්ගලික පාසල්වල 5 ශ්රේණියේ අධ්යාපනය ලබන සිසු දරුවන්ට පමණි. ඊට අමතරව, ශිෂ්යාධාර දීමනාව ලබා ගැනීම සඳහා සුදුසුකම් ලබන්නේ අඩු ආදායම්ලාභී පවුල්වලට අයත්, 2027 ජනවාරි 31 වැනි දිනට වයස අවුරුදු 11 නොඉක්මවූ සිසුන් පමණක් බව ද අදාළ නිවේදනයේ වැඩිදුරටත් දැක්වේ.
අයදුම් කිරීමේ ක්රියාවලියට අදාළ සම්පූර්ණ උපදෙස් මාලාව සහ ව්යවස්ථාව https://onlineexams.gov.lk/eic යන නිල වෙබ් අඩවියට පිවිසීමෙන් පහසුවෙන් ලබාගත හැකි වේ. විශේෂ අවශ්යතා සහිත සිසුන් වෙනුවෙන් අයදුම් කළ යුතු නිවැරදි ක්රමවේදය ද එම උපදෙස් පත්රිකාවේ සවිස්තරාත්මකව අන්තර්ගත කර ඇත. විභාගය සම්බන්ධයෙන් යම් වැඩිදුර තොරතුරක් දැනගැනීමට අවශ්ය නම් 011-2784537, 011-2786616, 011-2784208, 011-2486200, සහ 011-2784201 යන දුරකථන අංක මගින් හෝ 1911 යන ක්ෂණික ඇමතුම් අංකය මගින් විමසීම් කළ හැක. මීට අමතරව gr5schexam@gmail.com යන විද්යුත් තැපැල් ලිපිනය මෙන්ම 011-2784422 යන ෆැක්ස් අංකය ද ඒ සඳහා විවෘතව පවතී.
