මෑතකදී පැවැත්වුණු සිංගප්පූරු ගුවන් සංදර්ශනයේදී (Singapore Airshow) ඇති වූ සාකච්ඡාවලින් අනතුරුව, ශ්රී ලාංකික ප්රකට ව්යාපාරික ඩඩ්ලි සිරිසේන මහතා විසින් ලොව වඩාත් ජනප්රිය මධ්යම ප්රමාණයේ ව්යාපාරික ජෙට් යානයක් වන 'සෙස්නා සයිටේෂන් ලැටිටියුඩ්' (Cessna Citation Latitude) යානයක් මිලදී ගැනීම කෙරෙහි සිය අවධානය යොමු කර තිබේ.
මගීන් නම දෙනෙකුට පමණ පහසුවෙන් ගමන් කළ හැකි, නැගී සිටීමට තරම් ප්රමාණවත් ඉඩකඩ සහිත කුටියකින් සමන්විත මෙම ව්යාපාරික ගුවන් යානය, ප්රැට් ඇන්ඩ් විට්නි (Pratt & Whitney) PW306D1 වර්ගයේ ද්විත්ව එන්ජින් මගින් බලගන්වා ඇත. පැයට කිලෝමීටර් 825 ක (නොට්ස් 446 ක) පමණ වේගයකින් පියාසර කළ හැකි මෙයට, නාවික සැතපුම් 2,700 ක පමණ උපරිම දුර ප්රමාණයක් ආවරණය කිරීමේ හැකියාව පවතී. එමෙන්ම, නිව්යෝර්ක් සිට ලොස් ඇන්ජලීස් දක්වා වැනි මහාද්වීප හරහා කෙරෙන දීර්ඝ ගුවන් ගමන් සඳහා කිසිදු අතරමැද නැවැත්වීමකින් තොරව පියාසර කිරීමට ද මෙම ජෙට් යානයට හැකියාව ඇත.
ඇමරිකාවේ කැන්සාස් ප්රාන්තයේ විචිටා (Wichita) හි සිය මූලස්ථානය පිහිටුවා ඇති ගෝලීය ගුවන් සේවා ප්රමුඛයෙකු වන ටෙක්ස්ට්රොන් ඒවියේෂන් (Textron Aviation) සමාගම විසින් මෙම යානය නිෂ්පාදනය කරනු ලබයි. 2015 වසරේදී මෙම යානා මාදිලිය හඳුන්වා දුන් දා සිට මේ දක්වා ලොව පුරා ගුවන් යානා 400 කට අධික ප්රමාණයක් පාරිභෝගිකයින් වෙත ලබා දී ඇති අතර, එහි අන්තර්ගත පහසුකම් අනුව යානයක වටිනාකම ඇමරිකානු ඩොලර් මිලියන 20 ත් 22 ත් අතර අගයක් ගනී. ඔවුන්ගේ සෙස්නා සහ බීච්ක්රාෆ්ට් (Beechcraft) යන ප්රධාන සන්නාම යටතේ මේ වන විට රටවල් 170 කට වැඩි ප්රමාණයක් සඳහා ගුවන් යානා 250,000 කට අධික ප්රමාණයක් නිෂ්පාදනය කර බෙදාහැර තිබීම විශේෂත්වයකි.
මෙම අනාගත ගනුදෙනුව සඳහා ශ්රී ලංකාව තුළ මැදිහත්කරු ලෙස කටයුතු කරනු ලබන්නේ, ශ්රී ලංකාව සහ මාලදිවයින සඳහා ටෙක්ස්ට්රොන් ඒවියේෂන් සමාගමේ බලයලත් නියෝජිතයා වන ඉන්ෆොටෙක්ස් පුද්ගලික සමාගමයි (INFOTECHS (PVT) Ltd). ගුවන් නියමුවන් පුහුණු කිරීම, මගී ප්රවාහනය සහ විවිධ විශේෂ මෙහෙයුම් කටයුතු සඳහා භාවිත කරන පුළුල් පරාසයක ගුවන් යානා සපයමින් ශ්රී ලංකාවේ ගුවන් සේවා ක්ෂේත්රය නඟා සිටුවීම සඳහා ටෙක්ස්ට්රොන් සමාගම අඛණ්ඩව සිය දායකත්වය ලබා දෙයි.
