ශ්රී ලංකාවේ රාජ්ය රෝහල්වල උසස් රෝග විනිශ්චය සේවාවන් සඳහා පවතින ඉල්ලුම සැලකිය යුතු ලෙස වර්ධනය වී තිබේ. බෝ නොවන රෝග ව්යාප්තියත් සමඟ CT ස්කෑන්, MRI ස්කෑන්, DSA සහ හෘද කැතීටකරණ වැනි අධි තාක්ෂණික පරීක්ෂණ සඳහා රෝගීන්ගේ අවශ්යතාව සීඝ්රයෙන් ඉහළ ගොස් ඇත.
මෙම තත්ත්වය හමුවේ, රාජ්ය සෞඛ්ය සේවාව තුළ පවතින මෙම සේවාවන්හි ඌනතාවලට පිළියමක් ලෙස සෞඛ්ය අමාත්යාංශය නව ක්රමවේදයක් හඳුන්වා දීමට පියවර ගෙන ඇත.කෙසේ වෙතත්, රජයේ රෝහල් පද්ධතිය තුළ පවතින සීමිත උපකරණ සංඛ්යාව හේතුවෙන්, මෙම පරීක්ෂණ ලබා ගැනීම සඳහා රෝගීන්ට දිගු පොරොත්තු ලේඛනවල රැඳී සිටීමට සිදුව ඇත. මෙය ප්රතිකාර ප්රමාද වීමට හේතු වී ඇති අතර, රෝගීන් දැඩි අපහසුතාවයකට පත් කර තිබේ. තවද, මෙවැනි අධි තාක්ෂණික උපකරණ මිලදී ගැනීම හා නඩත්තු කිරීම සඳහා විශාල මූල්ය ප්රතිපාදන අවශ්ය වන අතර, පවතින මූල්ය සීමාවන් සහ සංකීර්ණ ප්රසම්පාදන ක්රියාවලීන් හේතුවෙන් මෙම ගැටලුවට කඩිනම් විසඳුම් ලබා දීම අභියෝගාත්මක වී ඇත.
ඉහත සඳහන් අභියෝග සැලකිල්ලට ගනිමින්, රජය රාජ්ය - පෞද්ගලික හවුල්කාරිත්ව (PPP) මාදිලියක් යටතේ මෙම රෝග විනිශ්චය සේවාවන් ලබා ගැනීමට තීරණය කර තිබේ. මෙම වැඩපිළිවෙළ යටතේ, සේවා සපයන්නන්ට කාර්ය සාධනය මත පදනම් වූ ගෙවීම් ක්රමවේදයක් ක්රියාත්මක වනු ඇත. මේ සඳහා විධිමත් හා විනිවිදභාවයෙන් යුත් ප්රසම්පාදන ක්රියාවලියක් අනුගමනය කිරීමට නියමිතය. මෙම නව ක්රමවේදය මඟින් රෝගීන්ට වඩාත් කාර්යක්ෂම, කඩිනම් සහ ගුණාත්මක සේවාවක් ලබා දීමට හැකි වනු ඇතැයි අපේක්ෂා කෙරේ.
