ශ්රී ලංකාවේ විශ්වවිද්යාල පද්ධතිය ගෝලීය ශ්රේණිගත කිරීම් දර්ශකයන්හි ඉහළ නැංවීමේ අරමුණින් රජය විසින් වැදගත් තීරණයක් ගෙන ඇත. එමඟින් මෙරට උසස් අධ්යාපන ක්ෂේත්රය නව මාවතකට යොමු කිරීමට අපේක්ෂා කෙරේ.
විශ්වවිද්යාල ජාත්යන්තරකරණ වැඩපිළිවෙළ යටතේ විදේශීය විශ්වවිද්යාල සමඟ අධ්යාපනික සහයෝගිතාව වර්ධනය කිරීම අත්යවශ්ය සාධකයක් ලෙස හඳුනාගෙන තිබේ. ඒ අනුව, වසර පහක කාලසීමාවක් සඳහා ක්රියාත්මක වන පරිදි අවබෝධතා ගිවිසුම් කිහිපයකට එළඹීම සඳහා අග්රාමාත්යතුමිය ඉදිරිපත් කළ යෝජනාවට අමාත්ය මණ්ඩල අනුමැතිය හිමි විය.මෙම වැඩපිළිවෙළ යටතේ ශ්රී ලංකා භික්ෂු විශ්වවිද්යාලය සහ තායිලන්තයේ මහා මකුට් බෞද්ධ විශ්වවිද්යාලය අතර විශේෂ අවබෝධතා ගිවිසුමකට අත්සන් තැබීමට නියමිතය. මෙමඟින් දෙරටේ පීඨ සහ සිසුන් අතර අධ්යාපනික හා සංස්කෘතික සබඳතා වර්ධනය කිරීමට අපේක්ෂා කෙරේ. ඊට අමතරව, සහයෝගීතා පර්යේෂණ, ශාස්ත්රීය වැඩමුළු මෙන්ම සම්මන්ත්රණ පැවැත්වීම ද මෙම ගිවිසුම හරහා සිදු වනු ඇත. එසේම, ශ්රී ලංකා භික්ෂු විශ්වවිද්යාලය ඉන්දුනීසියාවේ ජකර්තාහි පිහිටි නාලන්දා ආයතනය සමඟ ද අවබෝධතා ගිවිසුමකට එළඹීමට සූදානම් වේ. එම ගිවිසුම මඟින් අධ්යාපන, පර්යේෂණ හා ප්රජා සේවා යන ක්ෂේත්රයන්හි සහයෝගිතාව තවදුරටත් වර්ධනය කර ගැනීමටත්, විදේශීය විශේෂඥයින්ගේ සහ කථිකාචාර්යවරුන්ගේ දැනුම හුවමාරු කර ගැනීමටත් අවස්ථාව සැලසෙනු ඇත.
මීට අමතරව, කොළඹ විශ්වවිද්යාලය සහ පෝලන්තයේ එස්. ජී. එච්. වෝර්සෝ ආර්ථික විද්යා පාසල අතර ද අධ්යාපනික සහයෝගීතාව වර්ධනය කිරීමේ ගිවිසුමක් අත්සන් කිරීමට නියමිතය. මෙම එකඟතාව යටතේ ආර්ථික විද්යා ක්ෂේත්රයේ ඒකාබද්ධ පර්යේෂණ සිදු කිරීම, ඒකාබද්ධ ප්රකාශන එළිදැක්වීම මෙන්ම සිසුන් සහ කාර්ය මණ්ඩල හුවමාරු වැඩසටහන් ද ක්රියාත්මක කිරීමට සැලසුම් කර ඇත.
