වෙනිසියුලාවේ ජනාධිපති නිකලස් මදුරෝ සහ ඔහුගේ බිරිඳ වන සිලියා ෆ්ලෝරස් ඇමරිකානු විශේෂ බලකා ක්රියාන්විතයක් මගින් අත්අඩංගුවට ගෙන ඇමරිකාව වෙත රැගෙන යාමෙන් පසු එරට අගනුවර වන කරකස් හි දැඩි උණුසුම් තත්ත්වයක් හටගෙන තිබේ. මෙම සිදුවීමත් සමඟම වෙනිසියුලාවේ අන්තර්වාර ජනාධිපතිවරිය ලෙස ඩෙල්සි රොඩ්රිගස් දිවුරුම් දී ඇති නමුත්, රටේ පාලනය තමන් සතු බව ඇමරිකානු ජනාධිපති ඩොනල්ඩ් ට්රම්ප් ප්රකාශ කිරීමත් සමඟ ආරක්ෂක තත්ත්වය පිළිබඳව අවිනිශ්චිතතාවයක් මතුව ඇත.
කරකස් අගනුවර වීදි පුරා සන්නද්ධ පොලිස් නිලධාරීන් මුර සංචාරයේ යෙදෙන අයුරු දැක්වෙන දර්ශන අභ්යන්තර කටයුතු අමාත්ය ඩියොස්ඩාඩෝ කැබෙලෝ විසින් ප්රසිද්ධ කර ඇති අතර, ආරක්ෂක අංශ සාමාජිකයින් "සැමවිටම පක්ෂපාතීයි, කිසිදා ද්රෝහී නොවෙමු" යනුවෙන් කෑගසන වීඩියෝ දර්ශන ද අන්තර්ජාලයේ සංසරණය වේ.ජනාධිපති මන්දිරය අසලින් රාත්රී කාලයේ වෙඩි හඬවල් ඇසී ඇති අතර, ආරක්ෂක නිලධාරීන්ගේ කතාබහට අනුව එය ඩ්රෝන යානා පැමිණීමකට ප්රතිචාර දැක්වීමක් විය හැකි බවට සැක කෙරේ. කෙසේ වෙතත් මේ වන විට බොහෝ වෙළඳසැල් වසා දමා ඇති අතර, විවෘතව ඇති සීමිත වෙළඳසැල් හිමියන් ද දේපළ ආරක්ෂා කර ගැනීම සඳහා සුනඛයින් යොදා ගනිමින් සහ වරකට පාරිභෝගිකයින් පස් දෙනෙකු පමණක් ඇතුළු කරමින් දැඩි ආරක්ෂක පියවර අනුගමනය කරන බව වාර්තා වේ. සාමාන්ය ජනතාව වීදි බැසීමට බියෙන් පසුවන අතර, සන්නද්ධ කණ්ඩායම් විසින් සිවිල් වැසියන් නවතා ඔවුන්ගේ ජංගම දුරකථන පරීක්ෂා කරමින් වත්මන් තත්ත්වයට අදාළ දෑ තිබේ දැයි සොයා බලන බවට ද තොරතුරු ලැබී තිබේ.
වෙනිසියුලාවේ පිටුවහල්ව සිටින විපක්ෂ නායිකා මරියා කොරිනා මචාඩෝ, මදුරෝ අත්අඩංගුවට ගැනීම "මනුෂ්යත්වය, නිදහස සහ මානව ගරුත්වය වෙනුවෙන් තැබූ යෝධ පියවරක්" ලෙස හඳුන්වා දී ඇත. ඇයගේ පක්ෂය වන වෙන්ටේ වෙනිසියුලා ව්යාපාරය එරට සියලු දේශපාලන සිරකරුවන් වහාම නිදහස් කරන ලෙස ඉල්ලා සිටින අතර, මචාඩෝ පවසන්නේ තමා හැකි ඉක්මනින් නැවත වෙනිසියුලාවට පැමිණීමට අපේක්ෂා කරන බවයි. කෙසේ වෙතත්, අන්තර්වාර ජනාධිපතිවරිය විශ්වාස කළ නොහැකි බව ඇය අවධාරණය කර ඇති අතර, මදුරෝගේ පාලන තන්ත්රයේ බොහෝ ප්රබලයන් තවමත් බලයේ රැඳී සිටීම හේතුවෙන් ජනතාව තුළ බිය සහ සැකය තවදුරටත් පවතී.
මෙම ක්රියාන්විතය සම්බන්ධයෙන් අදහස් දක්වමින් ඇමරිකානු කථානායක මයික් ජොන්සන් ප්රකාශ කර ඇත්තේ මෙය යුද්ධයක් ප්රකාශ කිරීමක් හෝ ආක්රමණයක් නොවන බවත්, හුදෙක් මත්ද්රව්ය ජාවාරම් සම්බන්ධ පාලන තන්ත්රයක හැසිරීම වෙනස් කිරීම සඳහා ගත් පියවරක් බවත්ය. මේ අතර, මෙම සිදුවීමත් සමඟ ග්රීන්ලන්තයේ අයිතිය පිළිබඳ ගැටළුව ද නැවත කරළියට පැමිණ ඇති අතර, ඇමරිකානු ජාතික ආරක්ෂාව සඳහා ග්රීන්ලන්තය අවශ්ය බව ට්රම්ප් පුන පුනා ප්රකාශ කර සිටී. එක්සත් ජාතීන්ගේ මානව හිමිකම් කාර්යාලය සහ ප්රංශය ඇතුළු යුරෝපා රටවල් කිහිපයක් ඇමරිකාවේ මෙම හමුදා මැදිහත්වීම ජාත්යන්තර නීතියේ මූලධර්ම උල්ලංඝනය කිරීමක් බව පවසමින් සිය විරෝධය පළ කර ඇති අතර, චීනය ද ඇමරිකාවේ ක්රියාකලාපය දැඩි ලෙස විවේචනය කර තිබේ.
