බූස්ස අධි ආරක්ෂිත බන්ධනාගාරයේ ඊයේ ඇති වූ නොසන්සුන්කාරී තත්ත්වය මේ වන විට පාලනය කර ඇතැයි බන්ධනාගාර බලධාරීන් ප්රකාශ කරයි.
මෙම ගැටුම්කාරී තත්ත්වය ආරම්භ වූයේ ඊයේ පස්වරුවේ ‘ඩී’ වාට්ටුවේ රඳවා සිටින අධි ආරක්ෂිත රැඳවියන් පිරිසක් ශාරීරික ව්යායාම සඳහා පිටතට රැගෙන විත් නැවත වාට්ටුවට ඇතුළත් කිරීමට සූදානම් කිරීමේදීය.
නැවත වාට්ටු වෙත ඇතුළත් වීමට විරෝධය පළ කළ රැඳවියන් කිහිප දෙනෙක් බන්ධනාගාර වහලය මතට නැග ඝෝෂා කරමින් කලහකාරී ලෙස හැසිරී ඇති බවත්, ඔවුන් බන්ධනාගාර දේපළවලට ද හානි සිදු කර ඇති බවත් බන්ධනාගාර අභ්යන්තර ආරංචි මාර්ග වාර්තා කරයි.
මෙම තත්ත්වය පාලනය කිරීම සඳහා, බන්ධනාගාර නිලධාරීන් සහ පොලිස් විශේෂ කාර්ය බලකායේ (STF) නිලධාරීන් පනහක පමණ කණ්ඩායමක් ඒකාබද්ධ මෙහෙයුමක් දියත් කළේය. එහිදී දෙපාර්ශවය අතර උණුසුම් වචන හුවමාරුවක් සහ යම් පොරබැදීමක් සිදුව තිබේ.
ආරක්ෂක අංශ විසින් එල්ල කරන ලද පහරදීම් හේතුවෙන් රැඳවියන් කිහිප දෙනෙකුට තුවාල සිදුවූ බවට නිල නොවන තොරතුරු වාර්තා වුවද, මේ පිළිබඳව බන්ධනාගාර නිලධාරීන් විසින් මෙතෙක් නිල තහවුරු කිරීමක් සිදු කර නොමැත.
මෙම සිද්ධියට සම්බන්ධ වූ රැඳවියන් අතර ගනේමුල්ලේ සංජීව ඝාතන සිද්ධියේ ප්රධාන සැකකරුවකු වන සමිඳු දිල්ශාන් ද සිටින බවට තොරතුරු අනාවරණය වී ඇත. මීට අමතරව, මත්ද්රව්ය ජාවාරම් හා සංවිධානාත්මක අපරාධ සම්බන්ධයෙන් චෝදනා ලැබ සිටින බටුමීයා, හාවා, කනත්තේ සුදු සහ බිලාල් වැනි අයද මෙම ගැටුමට සම්බන්ධ වී ඇතැයි වාර්තා වේ.
මෙම ගැටුම්කාරී තත්ත්වයට ආසන්නතම හේතුව වී ඇත්තේ බූස්ස බන්ධනාගාරය සඳහා අලුතින් පත් වූ අධිකාරීවරයා විසින් පැනවූ නව නීතිරීති බව සඳහන් වේ. විශේෂයෙන්ම, පිටතින් ගෙනෙන ආහාර පාර්සල් හුවමාරු කර ගැනීම හරහා මත්ද්රව්ය සහ තහනම් ද්රව්ය බන්ධනාගාරය තුළට ගෙන ඒමේ ජාවාරමක් පවතින බවට නිරීක්ෂණය වී තිබීම හේතුවෙන්, රැඳවියන් කණ්ඩායම් වශයෙන් ආහාර බෙදා ගැනීම පාලනය කිරීමට නව අධිකාරීවරයා පියවර ගෙන තිබේ.
කෙසේ වෙතත්, ඊයේ රාත්රිය වන විට ආරක්ෂක අංශවල මැදිහත්වීමෙන් තත්ත්වය සම්පූර්ණයෙන් පාලනය කර, සියලු රැඳවියන් නැවත ඔවුන්ගේ වාට්ටු වෙත යොමු කිරීමට කටයුතු කර ඇතැයි බන්ධනාගාර දෙපාර්තමේන්තුව පවසයි.
සිද්ධිය පිළිබඳව විමර්ශනයක් පැවැත්වීම සඳහා විශේෂ පරීක්ෂණ කමිටුවක් පත් කිරීමට තීරණය කර ඇති අතර, කලහකාරී ලෙස හැසිරුණු රැඳවියන් හඳුනාගෙන ඔවුන් වෙනත් බන්ධනාගාර වෙත මාරු කිරීම පිළිබඳව ද බන්ධනාගාර දෙපාර්තමේන්තුවේ අවධානය යොමු වී ඇත.
