2026 අයවැය මගින් ප්රාග්ධන වියදම් ඉහළ නැංවීම සහ ‘දිට්වා’ (Ditwah) සුළි කුණාටුවෙන් පසු අපේක්ෂිත ප්රතිසංස්කරණ කටයුතු හේතුවෙන් ශ්රී ලංකාවේ ඉදිකිරීම් කර්මාන්තයට හිතකර වාතාවරණයක් නිර්මාණය වී තිබුණද, රාජ්ය නිලධාරීන් ව්යාපෘති ආරම්භ කිරීමට දක්වන උදාසීනත්වය හේතුවෙන් කර්මාන්තයේ අපේක්ෂිත පිබිදීමට බාධා එල්ල විය හැකි බව ශ්රී ලංකා ඉදිකිරීම් කර්මාන්ත මණ්ඩලය පවසයි.
එම මණ්ඩලයේ මහලේකම් සහ ප්රධාන විධායක නිලධාරී ඉංජිනේරු නිශ්ශංක එන්. විජේරත්න මහතා පෙන්වා දෙන්නේ, ඉදිකිරීම් ක්ෂේත්රයේ යලි පිබිදීමක් සඳහා අවශ්ය පසුබිම ලේඛනගතව සකස් වී ඇති බවයි. ‘දිට්වා’ සුළි කුණාටුවෙන් සිදුවූ හානිය 2004 වසරේ සුනාමි ව්යසනයෙන් සිදුවූ හානියට වඩා වැඩි බැවින්, රට තුළ විශාල ප්රතිසංස්කරණ ක්රියාවලියක අවශ්යතාවයක් පවතින බවද ඔහු වැඩිදුරටත් සඳහන් කළේය.
එහෙත්, ව්යාපෘති කඩිනමින් ආරම්භ කිරීම සඳහා රාජ්ය සේවයේ නිලධාරීන් නිසි මූලිකත්වයක් නොගැනීම හමුවේ මෙම බලාපොරොත්තු යථාර්ථයක් නොවීමට ඉඩ ඇති බවට විජේරත්න මහතා අනතුරු අඟවයි. 2025 අයවැය මගින් ප්රාග්ධන සංවර්ධන කටයුතු සඳහා රුපියල් බිලියන 1,200ක් වෙන් කර තිබුණද, ඉන් ප්රයෝජනයට ගෙන ඇත්තේ 25%ක පමණ මුදලක් බව මහලේකම්වරයා පෙන්වා දුන්නේය.
2026 අයවැය මගින් ප්රාග්ධන වියදම් සඳහා රුපියල් බිලියන 1,600ක් යෝජනා වී තිබුණද, රාජ්ය නිලධාරීන්ගේ පවතින ක්රියාකලාපය දිගින් දිගටම පැවතියහොත් රුපියල් බිලියන 300කට වැඩි වටිනාකමකින් යුත් වැඩ කොටසක් සම්පූර්ණ කිරීමට නොහැකි වනු ඇති බව ඔහුගේ අදහසයි. පවතින දේශපාලන වාතාවරණය හමුවේ තාක්ෂණික ඇගයීම් කමිටු සහ ටෙන්ඩර් මණ්ඩලවල සිටින රාජ්ය නිලධාරීන් දැඩි ආරක්ෂාකාරී පිළිවෙතක් අනුගමනය කිරීම මෙම ප්රමාදයන්ට ප්රධාන හේතුවක් වී ඇති බව ඔහු වැඩිදුරටත් පැහැදිලි කළේය.
මෙම කමිටු සඳහා පළපුරුදු වෘත්තිකයන්ගේ හිඟයක් පවතින හෙයින්, ඊට විසඳුමක් ලෙස අත්දැකීම් බහුල හිටපු රාජ්ය නිලධාරීන් නම් කිරීමට ඉදිකිරීම් කර්මාන්ත මණ්ඩලය යෝජනා කර ඇත. තවද, රජය විසින් පත් කර ඇති ව්යාපාරිකයන්ගෙන් සැදුම්ලත් අරමුදල් කළමනාකරණ කමිටුව මුදල් රැස්කිරීමට පමණක් සීමා වන බැවින්, ප්රතිසංස්කරණ කටයුතු මෙහෙයවීම සඳහා අමාත්යාංශ ලේකම්වරුන් සහ ජ්යෙෂ්ඨ නිලධාරීන්ගෙන් සමන්විත කාර්ය සාධක බලකායක් පිහිටුවිය යුතු බව ඉංජිනේරු නිශ්ශංක විජේරත්න මහතා අවධාරණය කළේය.