යෝෂිත රාජපක්ෂ සහ ඩේසි ෆොරස්ට් ට අධිචෝදනා

 හිටපු ජනාධිපති මහින්ද රාජපක්ෂ මහතාගේ පුත් යෝෂිත රාජපක්ෂ සහ ඔහුගේ මව් පාර්ශ්වයේ මිත්තණිය වන ඩේසි ෆොරස්ට් යන අයට එරෙහිව මුදල් විශුද්ධිකරණය වැළැක්වීමේ පනත යටතේ කොළඹ මහාධිකරණය හමුවේ අද (02) අධිචෝදනා පත්‍ර භාරදෙනු ලැබීය.

නීතිපතිවරයා විසින් ගොනු කර ඇති මෙම නඩුවට අදාළව, 2009 මාර්තු 31 වනදා සිට 2013 දෙසැම්බර් 12 වනදා දක්වා වූ කාලසීමාව තුළ නීතිවිරෝධී ලෙස උපයාගත් බවට චෝදනා එල්ල වන රුපියල් මිලියන 59කට අධික මුදලක්, පෞද්ගලික බැංකු ගිණුම් තුනක ස්ථාවර තැන්පතු ලෙස පවත්වාගෙන යෑම තුළින් මුදල් විශුද්ධිකරණ පනත යටතේ වරදක් සිදුකර ඇති බවට විත්තිකරුවන්ට එරෙහිව චෝදනා තුනක් යටතේ චෝදනා ගොනු කර තිබේ.

කොළඹ මහාධිකරණ විනිසුරු ප්‍රදීප් අබේරත්න මහතා ඉදිරියේ විභාගයට ගැනුණු මෙම නඩුවේදී, විත්තිකරුවන්ට අධිචෝදනා භාරදීමෙන් අනතුරුව, ඔවුන් එක් අයෙකුට රුපියල් මිලියනය බැගින් වූ ශරීර ඇප දෙකක් මත මුදා හැරීමට නියෝග කෙරිණි. එමෙන්ම, විත්තිකරුවන් දෙදෙනාගේ ඇඟිලි සලකුණු ලබාගෙන ඒ පිළිබඳ වාර්තාවක් කැඳවන ලෙසද විනිසුරුවරයා වැඩිදුරටත් නියම කළේය.



පැමිණිල්ල වෙනුවෙන් පෙනී සිටි රජයේ අධිනීතීඥ ඔස්වල්ඩ් පෙරේරා මහතා අධිකරණයට කරුණු දක්වමින්, මෙම නඩුවට සමාන්තර නඩුවක් කොළඹ අංක එක මහාධිකරණයේදී ලබන 11 වනදා කැඳවීමට නියමිත බව පෙන්වා දුන්නේය. නඩු දෙකෙහිම ලේඛන එකිනෙකට සමාන වන බැවින්, එම ලේඛනවල යම් අඩුපාඩුවක් පවතී නම් ඒ බව තමන් වෙත දැනුම් දෙන ලෙස ඔහු විත්තියේ නීතිඥවරුන්ගෙන් ඉල්ලීමක් කළේය.

ඊට ප්‍රතිචාර දැක්වූ විත්තිය නියෝජනය කළ ජනාධිපති නීතිඥවරුන් වන සම්පත් මෙන්ඩිස් සහ අනිල් සිල්වා යන මහත්වරු, අදාළ ලේඛන පරීක්ෂා කිරීමෙන් අනතුරුව යම් අඩුපාඩුවක් ඇත්නම් ඒ පිළිබඳව අධිකරණය දැනුවත් කරන බවට සහතික වූහ. කරුණු සලකා බැලීමෙන් අනතුරුව, නඩුව නැවත කැඳවීම සඳහා අගෝස්තු මස 4 වනදා දින නියම කරන ලදී. 



'අධි චෝදනා' යනු කුමක්ද?


ශ්‍රී ලංකාවේ අධිකරණ පද්ධතියේ "අධි චෝදනා" යනු මහාධිකරණය හෝ ශ්‍රේෂ්ඨාධිකරණය මගින් විභාගයට ගන්නා බරපතල අපරාධ නඩු සඳහා ලබා දෙන විශේෂිත චෝදනා වේ. මෙම චෝදනා සාමාන්‍යයෙන් අපරාධ නඩු සඳහා ඉදිරිපත් කරනු ලබයි, එහිදී විශේෂිත නීතිමය ක්‍රමවේදයන් අනුගමනය කරනු ලබයි.

අධි චෝදනා විභාගය සිදු කරන ආකාරය:

 මහාධිකරණය තුළ 'Trail at Bar' ලෙස හැඳින්වෙන විශේෂ ත්‍රිපුද්ගල විනිසුරු මඩුල්ලක් මගින් මෙම නඩු විභාග කරයි. මෙම නඩු සඳහා සාමාන්‍යයෙන් ජූරියක් සහිතව හෝ රහිතව විභාගය සිදු වේ.
අවසාන අභියාචන අධිකරණයක් ලෙස ශ්‍රේෂ්ඨාධිකරණය මගින්ද අධි චෝදනා සම්බන්ධ නඩු විභාග කරනු ලබයි.

විශේෂ ලක්ෂණ:

 අධි චෝදනා යටතේ විනිසුරුවරුන්ට සාක්ෂි, සාධාරණ සැක, සහ වරදකාරීත්වය පිළිබඳ තීරණ ගැනීමේ විශේෂ බලතල තිබේ. මෙම නඩු සඳහා ශ්‍රී ලංකාවේ දේශීය හෝ ජාත්‍යන්තර අපරාධ සම්බන්ධයෙන් නීතිමය ක්‍රියාමාර්ග ගන්නා අවස්ථාවන් ද ඇතුළත් වේ.