රඹුටන් කෑම ගුණයි - වැඩිපුර කෑම අගුණයි

 මේ දිනවල මල්වාන ප්‍රදේශයේ සැරිසරන්නන්ට හමුවන දසුනක් වන්නේ රතු බල්බ මෙන් දිලිසෙන රඹුටන් ගෙඩි සපිරි ගස්ය. රස, පැණි රඹුටන් අප බොහෝ දෙනා ආසාවෙන් පරිභෝජනය කරන පලතුරක් වුවද, එහි සැඟවුණු පෝෂණීය ගුණාංග හා සෞඛ්‍ය ප්‍රතිලාභ පිළිබඳව බොහෝ දෙනා දැනුවත් නොවේ. මැලේසියාව සහ නිවර්තන අග්නිදිග ආසියාවේ

නිජබිම වන මෙම නිවර්තන පලතුර ලිචී සමඟ සම්බන්ධ වන අතර එහි රසය හා පෙනුම ඉතා සමාන වේ. නමුත් ලිචී වලට වඩා විශාල වන රඹුටන් ගෙඩිය තුළ සුදු මාංසල පලතුර පැණි රසයි. "රඹුට්" යන මැලේ වචනයෙන් ගෙන ඇති එහි නම හිසකෙස් සඳහා යොදන වචනය වන අතර එහි බාහිර පෙනුම හිසකෙස් සමාන බැවිනි.

පෝෂණීය ගුණාංග

රඹුටන් යනු ඛනිජ ලවණ හා විටමින් වලින් පරිපූර්ණ පලතුරකි. මැංගනීස්, සින්ක්, සෝඩියම්, පොටෑසියම්, පොස්පරස්, කැල්සියම්, යකඩ සහ මැග්නීසියම් වැනි ඛනිජ ලවණ බහුලව අඩංගු වේ. එමෙන්ම බී විටමින් ගණනාවක් සහ විටමින් සී ඉහළ මට්ටමක පවතී. මෙම පලතුරුවල ප්‍රෝටීන්, ආහාරමය තන්තු සහ කාබෝහයිඩ්‍රේට් කුඩා ප්‍රමාණයක් ද ඇත. සමස්ත සෞඛ්‍යයට උපකාරී වන කුරුඳු අම්ලය සහ වෙනත් ප්‍රතිඔක්සිකාරක ඇතුළු අද්විතීය කාබනික සංයෝග කිහිපයක් ද ඇතුළත් වේ.

සෞඛ්‍ය ප්‍රතිලාභ

1. ශක්ති මට්ටම ඉහළ නැංවීම

රඹුටන් හොඳ ශක්ති ප්‍රභවයක් වන අතර ටින් කළ රඹුටන් ග්‍රෑම් 100 ක් කැලරි 82 ක් පමණ සපයයි. මෙම ශක්තිය බහුලව ලැබෙන්නේ කාබෝහයිඩ්‍රේට් වලින් වන අතර ප්‍රෝටීන් සහ මේද සුළු ප්‍රමාණයක් ද ලබා දෙයි. රඹුටන් වල සුක්‍රෝස්, ෆෲක්ටෝස් සහ ග්ලූකෝස් වැනි ස්වාභාවික සීනි අඩංගු වන අතර ක්ෂණික ශක්තියක් ලැබීමට මෙය ඉවහල් වේ. ඉහළ ජල ප්‍රතිශතයක් ද ඇති බැවින් ක්‍රීඩකයින්ට ඉතා වැදගත් කෙටි ආහාරයක් ලෙස සැලකේ.

2. බර අඩු කර ගැනීමට උපකාරී වීම

රඹුටන් සියයට 82 කට වඩා ජලයෙන් සමන්විත වන අතර කැලරි අඩු නමුත් ආහාරමය තන්තු ප්‍රමාණය ඉහළය. මේ නිසා අධික බරින් පෙළෙන අයට සුදුසු කෙටි ආහාරයක් වේ. රඹුටන් පැණි රස බැවින් මිහිරි දත් සංතෘප්ත කිරීමට උපකාරී වන අතරම, කැලරි ප්‍රමාණය පාලනය කර ගැනීමට ද හැකියාව ලැබේ.

3. රක්තහීනතාව වැළැක්වීම

රඹුටන් වල රතු රුධිර සෛල නිෂ්පාදනය සඳහා අත්‍යවශ්‍ය වන යකඩ සහ තඹ සාමාන්‍ය ප්‍රමාණයක් අඩංගු වේ. හිමොග්ලොබින් නිෂ්පාදනය සඳහා යකඩ අවශ්‍ය වන අතර විටමින් සී ද රඹුටන් වල අඩංගු වීම යකඩ අවශෝෂණය කිරීමට උපකාරී වේ. මෙය රක්තහීනතාව වැළැක්වීමට ඉවහල් වේ.

4. අඩු LDL (නරක) කොලෙස්ටරෝල් මට්ටම

රඹුටන් බීජ ඔලෙයික් අම්ලය ඇතුළු මේද කිහිපයකින් පොහොසත් වේ. ඔලෙයික් අම්ලය මොනොසැටරේටඩ් මේදයක් වන අතර එය LDL (අඩු ඝනත්ව ලිපොප්‍රෝටීන්) කොලෙස්ටරෝල් මට්ටම අඩු කිරීමට දායක වේ. සමහර පර්යේෂණ අනුව HDL (හොඳ කොලෙස්ටරෝල්) මට්ටම ඉහළ නැංවීමට ද හැකියාව ඇත.

5. පාචනයෙන් සහනය ලැබීම

රඹුටන් පහසුවෙන් දිරවිය හැකි අතර පාචනය ඇති රෝගීන් සඳහා නිර්දේශිත ආහාරයකි. ඉහළ ජල ප්‍රතිශතය නිසා විජලනය වීම වැළැක්වීමට ද උපකාරී වේ. රඹුටන් කොළ හිසේ කැක්කුම සඳහා ඖෂධයක් ලෙස ද භාවිතා කළ හැකිය.

6. අස්ථි සෞඛ්‍යය ප්‍රවර්ධනය කිරීම

රඹුටන් මැංගනීස් වලින් පොහොසත් ප්‍රභවයක් වන අතර ග්‍රෑම් 100 ක රඹුටන් මගින් දෛනික අවශ්‍යතාවයෙන් සියයට 16 ක් පමණ සපුරාලයි. මැංගනීස් අස්ථි හා සම්බන්ධක පටක සෑදීමට හා නඩත්තු කිරීමට උපකාරී වන අතර කැල්සියම් අවශෝෂණයට ද දායක වේ. මෙය අස්ථි ස්කන්ධය හා ශක්තිය වැඩි කිරීමට උපකාරී වේ.

පිළිකා ප්‍රතිරෝධී ගුණය

පර්යේෂකයින් විසින් සොයාගෙන ඇති අනුව, රඹුටන් ඇටයේ NLTI නමින් හඳුන්වන ට්‍රිප්සීන් නිශේධකාරකයක් අඩංගු වේ. මෙය අණුක ස්කන්ධය කිලෝ ඩෝල්ටන් 22.5 ක සංයෝගයක් වන අතර පිළිකා වලට ප්‍රතිකර්ම කිරීමේදී අත්‍යාවශ්‍ය සංයෝගයකි. ට්‍රිප්සීන් යනු ශරීරයේ පවතින ස්වාභාවික එන්සයිමයක් වන අතර, මෙහි සාන්ද්‍රණය පාලනය කිරීමෙන් පිළිකා වැළැක්වීමට හැකි බවට සාක්ෂි ඇත.

ප්‍රතිඔක්සිකාරක වලින් සපිරි

පර්යේෂණ වලට අනුව රඹුටන් ලෙල්ල තුළ ඉහළ ප්‍රතිඔක්සිකාරක ප්‍රමාණයක් අඩංගු වේ. මැංගුස් වැනි පලතුරු වලටත් වඩා මේ අතින් රඹුටන් ඉහළින් සිටී. ප්‍රතිඔක්සිකාරක වලට සෛල විනාශය හා විකෘති වීම අඩු කිරීමේ හැකියාව ඇත. අපගේ ආහාර වල අඩංගු මුක්ත ඛණ්ඩක වලින් සෛල ඔක්සිකරණය වීම වැළැක්වීමට ප්‍රතිඔක්සිකාරක උපකාරී වේ. සෛල විකෘති වීම පිළිකා, හදවත් රෝග, සම රැළි වැටීම වැනි ගැටලු ඇති කළ හැකි බැවින් රඹුටන් භාවිතය ඉතා වැදගත් වේ.

දියවැඩියාවට උපකාරී වීම

රඹුටන් ලෙල්ලේ අඩංගු එන්සයිම වර්ග මගින් දියවැඩියා රෝගීන්ට ලබා දෙන Acarbose නම් බෙහෙත මෙන් ක්‍රියා කිරීමේ හැකියාව ඇත. මෙය අග්න්‍යාශයේ ඉන්සියුලින් නිෂ්පාදනයට බාධා කරන බීටා සෛල නිපදවීම පාලනය කරයි. මෙය හයිපර්ග්ලයිසීමියාව සඳහා ප්‍රතිකාර කිරීමට ද හැකියාව ඇත.

ආහාර ජීර්ණයට පහසුකම් සැලසීම

රඹුටන් තුළ පොලිසැකරයිඩ බහුලව අඩංගු වන අතර මෙය ප්‍රීබයෝටික් සංයෝගයක් ලෙස ක්‍රියා කරයි. කුඩා බඩවැලේදී ආම්ලික හා එන්සයිමික ජීර්ණයට සහ මහා බඩවැලේ හිතකර බැක්ටීරියාවලට උපකාර කරයි. මෙය ප්‍රතිශක්තීකරණය වැඩි දියුණු කිරීමට, ඛනිජ ලවණ අවශෝෂණයට, පුරස්ථි ග්‍රන්ථි පිළිකා වැළැක්වීමට සහ කොලෙස්ටරෝල් සාන්ද්‍රණය පාලනය කිරීමට දායක වේ.

රෝග ප්‍රතිරෝධක හැකියාව

රඹුටන් මගින් බැක්ටීරියා, වෛරස් සහ දිලීර වැනි ක්ෂුද්‍ර ජීවීන්ට එරෙහිව ප්‍රතිරෝධතාව ඉහළ නැංවේ. මෙමගින් ක්ෂුද්‍ර ජීවීන් නිසා ඇතිවන රෝග වලින් ආරක්ෂා වීමට හැකියාව ලැබේ.

විටමින් සී බහුලතාව

රඹුටන් විටමින් සී වලින් පොහොසත් වන අතර මෙය ප්‍රතිශක්ති පද්ධතිය ශක්තිමත් කිරීමට උපකාරී වේ. උණ හා සෙම්ප්‍රතිශ්‍යාව වැනි රෝග වලින් ආරක්ෂා වීමට සහ සුව වීමට මෙය ඉවහල් වේ. දිනකට අවශ්‍ය විටමින් සී ප්‍රමාණය වන 75mg - 90mg රඹුටන් ගෙඩි 10ක් පමණ ආහාරයට ගැනීමෙන් ලබා ගත හැකිය.

පරම්පරාගත ඖෂධීය භාවිතය

රඹුටන් ගස පුරා වන කොටස් බොහෝ ඖෂධීය අරමුණු සඳහා භාවිතා කර ඇත. උණ රෝගයට රඹුටන් ගසේ මුල, දිවේ ආසාදන සඳහා පොතු, හිසරදය සඳහා කොළ කොටා සාදන පල්ප් ආදී වශයෙන් භාවිතා කෙරේ. ඊට අමතරව, ජාවා වැසියන් විසින් රඹුටන් පොත්තේ පිට පැත්තේ ඇති සැපෝනින් වේලා කුඩා ප්‍රමාණ වලින් බෙහෙත් නිපදවා ඇත. මැලේසියාවේ රඹුටන් ලපටි පත්‍ර සහ ගෙඩියේ පොත්ත වර්ණක සාදා ගැනීමට ද යොදා ගනී.

අවවාද සහ සැලකිලිමත් විය යුතු කරුණු

රඹුටන් පරිභෝජනයේදී අධි රුධිර පීඩනය, දියවැඩියාව හා විෂ වීම පිළිබඳව සැලකිලිමත් විය යුතුය. මෙම ගැටලු ඇතිවන්නේ සාමාන්‍යයෙන් ඉදුණු පලතුරු ආහාරයට ගැනීමෙන් හෝ අධික ලෙස පරිභෝජනය කිරීමෙන්ය. අධික ලෙස ඉදවූ රඹුටන් වල අඩංගු සීනි ඇල්කොහොල් ගුණ ලබා ගත හැකි අතර මෙය කොලෙස්ටරෝල් මට්ටමට, රුධිර පීඩනයට හා දියවැඩියාවට අහිතකර විය හැකිය.