අධිවේගී මාර්ග භාවිත කරන මගීන්ගේ ආරක්ෂාව ඉහළ නැංවීමේ අරමුණින්, 2025 අගෝස්තු මස 01 වනදා සිට සැහැල්ලු වාහනවල ගමන් ගන්නා සියලු දෙනාට ආසන පටි පැළඳීම රජය විසින් අනිවාර්ය කර ඇත. ඊට අමතරව, එම වසරේම සැප්තැම්බර් මස 01 වනදා සිට අධිවේගී මාර්ගවල ධාවනය වන බස් රථවල සියලුම මගීන්ට ද මෙම නීතිය එක සේ ක්රියාත්මක වනු ඇති බව නිවේදනය කෙරේ.
ප්රවාහන, මහාමාර්ග, වරාය සහ සිවිල් ගුවන්සේවා අමාත්ය බිමල් රත්නායක මහතා මෙම තීරණ පිළිබඳව දැනුම් දුන්නේ කොළඹ මධ්යම බස් නැවතුම්පොළේ පැවති නිරීක්ෂණ චාරිකාවකට එක්වෙමිනි.
සැහැල්ලු වාහනවල පසුපස අසුන්වල ගමන් ගන්නා මගීන්ට පවා මෙම නීතිය ක්රියාත්මක වන බව ඒ මහතා අවධාරණය කළේය.
මෙරට මාර්ග අනතුරු හේතුවෙන් වාර්ෂිකව සිදුවන ඉහළ මරණ සංඛ්යාව සැලකිය යුතු මට්ටමින් අවම කර ගැනීම මෙම නව නීති හඳුන්වා දීමේ මූලික අපේක්ෂාව බව අමාත්යවරයා මෙහිදී පෙන්වා දුන්නේය.
2011 වසරේ සිටම ආසන පටි පැළඳීම නීතිගත කර තිබුණද, එය බොහෝ විට සැහැල්ලු වාහනවලට පමණක් සීමා වී බස් සහ ලොරි රථ රියදුරන් විසින් නොසලකා හැර තිබූ බව පෙන්වා දුන් අමාත්යවරයා, එම නීතිය වහාම ක්රියාත්මක වන පරිදි එම රියදුරන්ට ද අනිවාර්ය බව සඳහන් කළේය.
මෙම පියවර හුදෙක් නීතිය තදින් ක්රියාත්මක කිරීමක් පමණක් නොව,
මාර්ග අනතුරුවලින් සිදුවන ජීවිත සහ දේපළ හානිය අවම කිරීම සඳහා රජය ගෙන යන පුළුල් වැඩපිළිවෙළක එක් අදියරක් බවද අමාත්යවරයා වැඩිදුරටත් පැහැදිලි කළේය.
Comments
Post a Comment
Your comment will be visible after approval