[Trending][btop]
[News][stack]

කොළඹට දුම්රියෙන් වැලි ගෙන්න සූදානමක්


 දිවයිනේ විවිධ ප්‍රදේශයන්හි සිට  කොළඹට වැලි ප්‍රවාහනය කිරීම සඳහා  දුම්රිය යොදා ගැනීම සම්බන්ධයෙන් මූලික  සාකඡාවක් පෙරේදා (19) මහවැලි සංවර්ධන අමාත්‍යාංශයේ දී පැවැත්විණි.  මෙම සාකච්ඡාවට වාරිමාර්ග අමාත්‍ය චමල් රාජපක්ෂ, ප්‍රවාහන අමාත්‍ය ගාමිණි   ලොකුගේ, මහවැලි කලාප සංවර්ධන රාජ්‍ය අමාත්‍ය සිරිපාල ගම්ලත්,
ප්‍රවාහන  නියාමනය, බස් ප්‍රවාහන සේවා සහ දුම්රිය මැදිරි සහ මෝටර් රථ කර්මාන්ත  පිළිබඳ රාජ්‍ය අමාත්‍ය දිලුම් අමුණුගම, දුම්රිය සාමාන්‍යාධිකාරි ඩිලන්ත ප්‍රනාන්දු යන මහත්වරු සහභාගි වූහ. මහවැලි කලාපයන්හි සිට කොළඹ නගරය සහ ඒ ආශ්‍රිත ප්‍රදේශවලට වැලි  ප්‍රවාහනය සඳහා දැනට යොදා ගනු ලබන්නේ ලොරි රථ වන අතර, එහිදී  ප්‍රවාහනය සඳහා අධික පිරිවැයක් දැරීමට සිදුවන අතර එහෙයින් වැලි කියුබ් එකක මිල රුපියල් 45,000ක් පමණ වී ඇති බව මෙම සාකච්ඡාවෙදී අනාවරණය විය.

වැලි ප්‍රවාහනය සඳහා දුම්රිය යොදා ගැනීමෙන් සහනදායක මුදලකට වැලි වෙළෙඳපොළට නිකුත් කිරීමට හැකි බව සාකච්ඡාවට සහභාගි වී සිටි නිලධාරිහු අමාත්‍යවරුන්ට පෙන්වා දුන්හ.  ලොරි රථ මගින් වැලි ප්‍රවාහනය කිරීමේ දී මාර්ග අනතුරු ඉහළ යාම, පාරිසරික බලපෑම, ඉන්ධන සඳහා ඉහළ පිරිවැයක් දැරීම, මහාමාර්ග විශාල වශයෙන් අබලන් වීම හමුවේ හැකිතාක් විකල්ප භාවිත කිරීම සුදුසු බවට සාකච්ඡාවේදී අවධානය යොමු කෙරිණි.

-රේඛා තරංගනී ෆොන්සේකා-