🔥 ඇඳිරි නීතිය දිගටම - කොළඹ-ගම්පහ-පුත්තලමට පැය 8 විරාමය අඟහරුවාදා සෙසු දිස්ත්‍රික්ක වලට පැය 8 විරාමය සඳුදා

දැනට බලපැවැත්වෙන ඇදිරි නීතිය කෙටි විරාමයක් සහිතව දිගටම ක්‍රියාත්මක කරන බව ජනාධිපති මාධ්‍ය අංශය අද සවස දන්වා ඇත.
කොළඹ, ගම්පහ සහ පුත්තලම දිස්ත්‍රික්කවල දැන් ක්‍රියාත්මක ඇඳිරි නීතිය මාර්තු 24 අඟහරුවාදා උදේ 6.00 ඉවත් කර එදිනම, එනම් 24 අඟහරුවාදා දහවල් 2.00 ට
නැවත පනවනු ලැබේ.

සෙසු දිස්ත්‍රික්කවල මාර්තු 23, සඳුදා උදේ 6.00 ට ඉවත් කර එදිනම දහවල් 2.00 සිට 24 අඟහරුවාදා උදේ 6.00 දක්වා බලපැවැත්වෙන අතර ඇඳිරි නීතිය නැවත පැනවීම ගැන පසුව දැනුම් දෙනු ලැබේ.

ඇඳිරි නීතිය ඉවත් කෙරෙන සෑම අවස්ථාවකම දිවයින පුරා සියලු මත්පැන් අළෙවි සැල් වසා තැබිය යුතු බව රජය දැනුම් දෙයි.

ගොවිතැන් කටයුතු සිදු කෙරෙන දිස්ත්‍රික්කවල ගොවි ජනතාවට සිය කාර්යයන් බාධාවකින් තොරව කරගෙන යාමට ඉඩ දෙන ලෙස රජය පොලීසියට උපදෙස් දී ඇත.

අත්‍යාවශ්‍ය ආහාර ද්‍රව්‍ය සහ සෙසු භාණ්ඩ තොග ප්‍රමාණවත් තරම් ගබඩා කර ඇති බැවින් අනවශ්‍ය ලෙස භාණ්ඩ රැස් කිරීමට කලබල නොවන ලෙස රජය ජනතාවට දැනුම් දෙයි.

එළවළු ඇතුලු අත්‍යාවශ්‍ය ද්‍රව්‍ය ප්‍රවාහනයට ද ඉඩ සලසා තිබේ.

එසේම අත්‍යාවශ්‍ය ආහාර ද්‍රව්‍ය බාධාවකින් තොරව අවශ්‍ය ස්ථාන වෙත ප්‍රවාහනය කිරීමට විධිවිධාන සලසා ඇත.