ඉදිරි දෙසැම්බර් මාසයේදී ආරම්භ වීමට නියමිත ශ්‍රීපාද වන්දනා වාරයට පෙර එහි අලුත්වැඩියා කටයුතු පිළිබඳව සමාජ මාධ්‍ය ඔස්සේ දැඩි කතාබහක් නිර්මාණය වී තිබේ. ඒ, යූටියුබ්කරුවකු වන අශේන් සේනාරත්න විසින් ශ්‍රීපාදස්ථානයේ නඩත්තු කටයුතු හා ආරක්ෂාව විවේචනය කරමින් නිකුත් කළ වීඩියෝවක් සහ ඊට ප්‍රතිචාර දක්වමින් ශ්‍රීපාදස්ථානාධිපති පූජ්‍ය බෙන්ගමුවේ ශ්‍රී ධම්මදින්න නායක හිමියන් කළ දැඩි ප්‍රකාශයත් සමඟිනි.
ශ්‍රීපාදස්ථානයට ඇතුළුවීම තහනම් කර ඇති අවාර සමයක, වසා තිබූ ගේට්ටුවකින් පැන අනවසරයෙන් ඇතුළු වී මෙම වීඩියෝව රූපගත කර ඇති බවට නායක හිමියෝ චෝදනා කරති. උන්වහන්සේ පවසන පරිදි, අදාළ පුද්ගලයාට ඇතුළුවීම වළක්වාලමින් තම රාජකාරිය නිසි පරිදි ඉටුකළ ආරක්ෂක නිලධාරියාටද ඔහු එහිදී බැණවැදී ඇත. තම පෞද්ගලික අභිමතාර්ථ සහ ප්‍රචාරණ අරමුණු වෙනුවෙන් රජයට සහ ආරක්ෂක අංශවලට අසත්‍ය චෝදනා එල්ල කරමින් ඔහු ශ්‍රීපාදස්ථානය තුළ ඉතා අශෝභන ලෙස හැසිරී ඇති බවද උන්වහන්සේ ප්‍රකාශ කළහ.
කෙසේ වෙතත්, අශේන් සේනාරත්න සිය වීඩියෝවෙන් පෙන්වා දී තිබුණේ ශ්‍රීපාදස්ථානයේ ඇතැම් ආරක්ෂිත වැටවල් හා විදුලි පහන් ආශ්‍රිත කොටස්වල දැඩි හානි පවතින බවයි. එක් ස්ථානයකදී ආරක්ෂිත වැටක් ස්පර්ශ කිරීමේදී තමන්ට විදුලි සැර වැදුණු බවත්, විදුලි කාන්දුවක් පවතින බවට සැක කළ හැකි එවැනි තත්ත්වයක් තුළ ශ්‍රීපාදස්ථානය වෙත පැමිණෙන විදේශීය සංචාරකයකුට අනතුරක් සිදුවුවහොත් එය රටටම අපකීර්තියක් වනු ඇති බවත් ඔහු එහිදී පෙන්වා දුන්නේය. ඊට අමතරව, 'දිට්වා' සුළි කුණාටුවෙන් පසුව නායයෑම්වලින් ගලා ආ සුන්බුන් සහ අපද්‍රව්‍ය තවමත් නිසි පරිදි ඉවත් කර නොමැති බවටද ඔහු චෝදනා කළේය.
ඉදිරි වන්දනා වාරයට පෙර මෙම තත්ත්වය කඩිනමින් පිළිසකර කිරීම සඳහා ජනාධිපතිවරයා, අග්‍රාමාත්‍යවරිය, අමාත්‍යවරුන් සහ පාර්ලිමේන්තු මන්ත්‍රීවරුන් ඇතුළු බලධාරීන් වහාම මැදිහත් විය යුතු බව අවධාරණය කළ ඔහු, "මේ ප්‍රොජෙක්ට් එක දැන්ම පටන් ගන්න වෙනවා දෙසැම්බර්වල ඉවර කරන්න නම්. ඉක්මනට මේ දේවල් ටික පිළිසකර කරලා මේ ශ්‍රීපාදය රැකගන්න වැඩ කරන්න. ඒක අපේ රාජකාරියක් වගේම ඔයාලගෙත් රාජකාරියක්. ජනතාවගේ රාජකාරියක්. ඒ වගේම ජනාධිපතිතුමනි, ඔබෙත් රාජකාරියක්" යනුවෙන් සඳහන් කළේය. බලධාරීන්ට මෙය සිදුකිරීමට නොහැකි නම් එම කටයුතු තමන්ට භාරදෙන ලෙසද ඔහු බලකර සිටියේ, “බැරි නම් දෙන්න මං කරන්නම්. මට දවසයි යන්නේ මේක හදන්න. බැරි නම් මට දෙන්න මං මේක බලාගන්නම්. මං මේ රට කරන්නම්. ඔයාට බැරි නම් කියන්න, මං මේක බලාගන්නම්” යනුවෙනි.
මෙම චෝදනාවලට පිළිතුරු සපයන බෙන්ගමුවේ ධම්මදින්න නායක හිමියන් පෙන්වා දෙන්නේ, දිට්වා සුළි කුණාටුවෙන් හැටන් මාර්ගයට සිදුවූ හානි මේ වන විටත් යථා තත්ත්වයට පත්කර ඇති බවයි. ජනාධිපතිවරයාගේ උපදෙස් පරිදි රත්නපුර සහ නුවරඑළිය දිසාපතිවරුන්, නියෝජ්‍ය පොලිස්පතිවරුන් ඇතුළු ආරක්ෂක අංශ එක්ව එම කටයුතු සිදුකළ බව උන්වහන්සේ තහවුරු කළහ. මාර්ගයේ එක් ස්ථානයක විශාල වශයෙන් ගොඩගැසී තිබූ සාමාන්‍ය පස් නොවූ කුණු සහ සුන්බුන් කන්දක් ඉවත් කිරීම සඳහා, ආරක්ෂක අංශ ඇතුළු පුද්ගලයන් 150කට අධික පිරිසක් යොදවා මාසයකට ආසන්න කාලයක් අතිශය දුෂ්කර මෙහෙයුමක් සිදුකළ බවද උන්වහන්සේ සිහිපත් කළහ.
අවාර සමයේදී සිදුවන අනවසර ඇතුළුවීම් සහ විනාශ කිරීම් පිළිබඳවද නායක හිමියන් මෙහිදී බලධාරීන්ගේ අවධානයට යොමු කළහ. උන්වහන්සේ පෙන්වා දුන්නේ, වසර 60කට අධික කාලයක් කිසිදු නඩත්තුවක් නොමැතිව පැවති පළාබද්දර මාර්ගයේ ඉඳිකටුපාන දක්වා ඇති අම්බලම් හතර සහ වැසිකිළි පද්ධති හිටපු දිසාපති සුනිල් කන්නන්ගර මහතාගේ සමයේදී තමන්ගේ මැදිහත්වීමෙන් ප්‍රතිසංස්කරණය කළද, අවාරයේ පැමිණෙන ඇතැම් පිරිස්වල අසීලාචාර ක්‍රියාකාරකම් හේතුවෙන් එම දොර ජනෙල් ඇතුළු දේපොළ නිරන්තරයෙන් විනාශයට පත්වන බවයි. මීට පෙර අවාරයේ ගමන් කිරීම පාලනය කිරීම සඳහා වනජීවී නිලධාරීන් මගින් නල්ලතන්නිය පැත්තෙන් රුපියල් 6000, 7000 ක මුදලකට ටිකට්පත් නිකුත් කර මුදල් අයකිරීමේ ක්‍රමයක් යෝජනා වුවද, විවිධ බලපෑම් මත නිලධාරීන් සමඟම එයද නතර වූ බව උන්වහන්සේ වැඩිදුරටත් සඳහන් කළහ.
මෙරට ආගමික මෙන්ම සංචාරක කර්මාන්තය අතින්ද ඉහළ වටිනාකමක් සහිත ජාතික සම්පතක් වන ශ්‍රීපාදස්ථානයේ ආරක්ෂාව, පිරිසිදුකම සහ වන්දනාකරුවන්ගේ ජීවිත ආරක්ෂාව තහවුරු කිරීම කිසිවකුටත් මඟහැරිය නොහැකි සියලු පාර්ශ්වයන්ගේම සාමූහික වගකීමක් ලෙස පවතී.
